ကိုယ်ဝန်ကို ကိုးလတိတိ လွယ်ထားရပြီး ဆယ်လထဲရောက်မှ မွေးဖွားတယ်လို့ ဆိုကြပါတယ်။ Human Reproduction ဆေးပညာဆိုင်ရာဂျာနယ်ရဲ့ ဖော်ပြချက်အရ ကိုယ်ဝန်ဆောင်ထားရတဲ့ ကာလ အပိုင်းအခြားဟာ သီတင်းပတ် ၅ ပတ်နဲ့အထက် ကွာခြားတတ်တယ်လို့ သိရပါတယ်။ Due Date ဆိုတာကလည်း ဓမ္မတာစီးဆင်းမှု နောက်ဆုံးရက်ကို အခြေခံတွက်ချက်ကာ မီးဖွားမယ့်ရက်ကို ခန့်မှန်းရုံသာ ဖြစ်ပါတယ်။ သုတေသန ရလဒ်များအရ Due Date အတိုင်း မီးဖွားတဲ့ကိုယ်ဝန်ဆောင်ဆိုတာ ၄% သာ ရှိပါသတဲ့။

ကိုယ်ဝန်ရခါစ အစောပိုင်းလတွေမှာ အချို့က အစားမစားနိုင်ကြပါဘူး။ "ဗိုက်ကြီးနာစွဲခြင်း" လို့ ခေါ်ကြတဲ့ အစားမစားနိုင်ခြင်း၊ ပျို့အန်ခြင်းတွေ ကြုံရပါတယ်။ အစာမစားနိုင်တဲ့အခါမျိုးမှာ အတင်းကြိတ်မှိတ်ပြီး စားနေရတာ စိတ်ဖိစီးမှု ဖြစ်စေပါတယ်။ အာဟာရဖြစ်မယ့် အရည်တစ်မျိုးမျိုးနဲ့ သစ်သီးတွေကို ရွေးချယ်နိုင်ပါတယ်။ ထမင်းတစ်နပ်လောက် မစားဘဲပြီး စွပ်ပြုတ်လေးသောက်လိုက်တာ ပြဿနာမရှိပါဘူးလို့ ကျန်းမာရေးပညာရှင်တွေက ဆိုပါတယ်။