တစ်နေ့အိပ်စက်ချိန် (၆) နာရီထက်လျော့နည်းရင် နှလုံးရောဂါနဲ့သေဆုံးနိုင်ခြေပိုများတယ်လို့ လေ့လာတွေ့ရှိချက်အသစ်များက ဆိုထားပါတယ်။ နှလုံးရောဂါနဲ့ဆီးချိုရောဂါအခံရှိသူတွေအတွက်ဆိုရင် ပိုလို့တောင်အန္တရာယ်များပါသေးတယ်။
Metabolic syndrome လို့လူသိများတဲ့ ခန္ဓာကိုယ်တွင်းဇီဝလုပ်ငန်းစဉ်တွေမူမမှန်ခြင်းမှာ သွေးတိုးခြင်း၊ ကိုလက်စထရောများပြားခြင်း၊ သွေးတွင်းအချိုဓာတ်များပြားခြင်း၊ အဝလွန်ခြင်း၊ သွေးတွင်းအဆီလွန်ကဲခြင်းစတဲ့အချက်တွေပါဝင်နေပါတယ်။ အထက်ပါဖော်ပြပါ အချက်တွေထဲက (၃)ချက်လောက်ရှိနေပြီဆိုရင် ခင်ဗျားမှာ metabolic syndrome ရှိနေနိုင်လို့ အထူးဂရုပြုသင့်ပါတယ်။
" Metabolic syndrome ရှှိတဲ့လူတွေဟာ ဝဝလင်လင်အိပ်စက်မယ်ဆိုရင် နှလုံးနဲ့ပတ်သက်တဲ့ရောဂါဖြစ်ပွားမှုနှုန်းတွေ လျော့ကျလာမှာဖြစ်ပြီး အချိန်မတိုင်ခင်နှလုံးဖောက်လို့သေဆုံးရတဲ့ဖြစ်ရပ်တွေလည်း လျော့နည်းလာမှာဖြစ်တယ်" လို့ လေ့လာရေး သုတေသီခေါင်းဆောင် ဂျူလီယို ဖာနန်ဒက် မန်ဒိုဇာက ဆိုပါတယ်။ သူက ပန်ဆယ်ဗေးနီးယားတက္ကသိုလ် မေလ်တန် ဟာရှေ ဆေးပညာဌာနရဲ့ အိပ်စက်ခြင်းဆိုင်ရာသုတေသနနဲ့ကုသရေးအဖွဲ့မှာ အလုပ်လုပ်ကိုင်နေတဲ့ အိပ်စက်ခြင်းဆိုင်ရာစိတ်ပညာရှင်တစ်ဦးဖြစ်ပါတယ်။
ဇီဝဗေဒသဘောတရားအရ ကြည့်မယ်ဆိုပြန်ရင်လည်း အိပ်စက်ချိန်နည်းတဲ့သူတွေဟာ သွေးတိုးနဲ့ သွေးတွင်းအချိုဓာတ်များပြားခြင်းတို့ရှိနေမယ်ဆိုရင် အသေစောနိုင်ခြေပိုများပါတယ်လို့ သုတေသီတွေကဆိုထားပါတယ်။ "ဖြစ်နိုင်ခြေရှိတာကတော့ metabolic syndrome ရှိတဲ့သူတွေဟာ ဝလင်အောင်အိပ်စက်ခြင်းမပြုဘူးဆိုရင် အာရုံကြောစနစ်မှာ ပြဿနာတွေဖြစ်နိုင်ပြီး ဇီဝဖြစ်စဉ်ပြောင်းလဲမှုတွေကိုလည်း နှေးကွေးစေနိုင်ပါတယ်။ ဒါကြောင့် metabolic syndrome ရှိသူတွေကို အိပ်စက်ခြင်းနဲ့ဆိုင်တဲ့သုတေသနတွေ ထပ်လုပ်ပြီး စမ်းသပ်စစ်ဆေးကြည့်ဖို့လိုအပ်ပါတယ်" လို့ ဖာနန်ဒက် မန်ဒိုဇာက အကြံပြုထားပါတယ်။
မည်သို့ပင်ဆိုစေကာမူ သွေးတိုး၊ ဆီးချိုရောဂါတွေရှိပြီး အဝလွန်သူတွေအနေနဲ့ နှလုံးနဲ့ဆက်နွယ်တဲ့ရောဂါတွေမဖြစ်ချင်ဘူးဆိုရင် အိပ်ရေးဝအောင်အိပ်စက်သင့်တာတော့အမှန်ပါပဲ။ နောက်ပြီး အိပ်စက်နေစဉ် အသက်ရှူရခက်ခဲခြင်း၊ အိပ်မပျော်ခြင်းနဲ့ ကြက်အိပ်ကြက်နိုးဖြစ်ခြင်းတို့လို အိပ်စက်ခြင်းနဲ့နွယ်တဲ့ ရောဂါတွေကို သက်သာပျောက်ကင်းစေနိုင်တဲ့ ဆေးဝါးနဲ့ နှစ်သိမ့်ဆွေးနွေးကုသခြင်းနည်းလမ်းတွေလည်း ရှိနေပြီပဲလို့ ဖာနန်ဒက် မန်ဒိုဇာကဆိုထားပါတယ်။
Source: Webmd