Thiha Htun

dominik-lowyears-122568.jpg 

ယောဂလေ့ကျင့်တယ်ဆိုတာ တကယ်တော့ ကျန်းမာသန်စွမ်းအောင်၊ စိတ်ရောကိုယ်ပါ ကြည်လင်လန်းဆန်းအောင်ဆိုတဲ့ ရည်ရွယ်ချက်နဲ့လေ့ကျင့်ကြတာဖြစ်ပါတယ်။ ယောဂလေ့ကျင့်ခြင်းမှာ အကျိုးကျေးဇူးအများကြီး ရှိသလို ဘဝနေထိုင်ပုံစနစ်မှာလည်း အများကြီးအထောက်အကူပြုနိုင်ပါတယ်။ ယောဂလေ့ကျင့်တဲ့လူတွေဟာ စိတ်တည်ငြိမ်ပြီး စိတ်ရဲ့ငြိမ်းချမ်းမှုကိုလည်း ရရှိကြပါတယ်။ ယောဂကို ကမ္ဘာတဝှမ်းလုံးကလူတွေက လေ့ကျင့်ကြပြီး လူတိုင်းကနှစ်သက်ကြတာ အကြောင်းရင်းတစ်ခုတော့ရှိပါတယ်။

ရုပ်ပိုင်းဆိုင်ရာပြဿနာတွေကို ဖြေရှင်းပေးဖို့အတွက် လေ့ကျင့်ကြတဲ့ယောဂဟန်ပန်တွေအများကြီးရှိပါတယ်။ အဲဒီထဲကမှ အောက်ပါယောဂလေ့ကျင့်နည်းလေးတွေကတော့ ခင်ဗျားကို အိပ်လို့ပိုကောင်းအောင် ကူညီပေးနိုင်ပါတယ်။

၁။ Salabhasana (ကျိုင်းကောင်ပုံစံ)

Locust-Pose-Salabhasana.jpg 

ဒီယောဂပုံစံလေးကတော့ အိပ်လို့ပိုကောင်းစေတာ တစ်ခုတည်းမဟုတ်ပါဘူး။ ဒီပုံစံလေးအတိုင်း လေ့ကျင့်ပေးမယ်ဆိုရင် အရိုးတွေကိုလည်း ပိုမိုသန်မာစေပါတယ်။ ဒီယောဂပုံစံကိုအရမ်းကောင်းမွန်တယ်လို့ သတ်မှတ်ကြတဲ့နောက်ထပ်အကြောင်းရင်းတစ်ခုကတော့ ဒီပုံစံလေးက တင်ပါးနဲ့ပေါင်တွင်းသားအကြောတွေကိုပါ ထိန်းညှိပေးလို့ပါပဲ။

ပြုလုပ်နည်းကတော့ အရမ်းလွယ်ကူပါတယ်။ ပုံထဲမှာဖော်ပြထားတဲ့အတိုင်း အရင်ဆုံးလှဲချလိုက်ပါ။ ပြီးရင်မိမိရဲ့လက် (၂) ဖက်ကို ကျောဘက်မှာဆုပ်ကိုင်ထားလိုက်ပါ။ လက် (၂) ဖက်နဲ့ ဝမ်းဗိုက်ကို ဆွဲမြှောက်နေချိန်မှာ အသက်ရှူသွင်းပါ။ အဲဒီအတိုင်း တတ်နိုင်သမျှထိန်းထားပြီး ရှေ့တည့်တည့် (သို့) အောက်ကိုစိုက်ကြည့်ပေးပါ။ အဲဒီပုံစံအတိုင်း တစ်မိနစ်လောက်ရအောင်နေပေးပါ။

၂။ Uttanasana (မတ်တတ်ရပ်ပြီး ရှေ့ကိုကိုင်းတဲ့ပုံစံ)

Remelius-0114.jpg 

ဒီယောဂပုံစံလေးကိုလည်း အိပ်ရေးပျက်တဲ့လူတွေအတွက် အရမ်းကောင်းတယ်လို့ ဆိုကြပါတယ်။ ပြုလုပ်နည်းကတော့ အရင်ဆုံး ခါးကိုဆန့်ပြီးမတ်မတ်ရပ်ပေးပါ။ ပြီးရင် ပုံထဲမှာပြထားတဲ့အတိုင်း ရှေ့ကို ကိုင်းပေးပါ။ ပြီးရင်လက် (၂) ဖက်ကို ခြေထောက် (၂) ဖက်မှာကိုင်ပြီးထိန်းထားပေးပါ။ အဲဒီပုံစံအတိုင်း (၁) မိနစ်လောက် ငြိမ်ငြိမ်နေပါ။

၃။ Janu Sirsasana (ဒူးနဲ့ဦးခေါင်းထိတဲ့ပုံစံ)

iStock_000034482390_Medium.jpg 

ဒီပုံစံကိုတော့ ပြုလုပ်ရခက်ခဲတဲ့ပုံစံတစ်ခုအဖြစ် အသိအမှတ်ပြုထားကြပါတယ်။ ဒါပေမယ့်လူတွေက လက်မလျော့ကြပါဘူး။ ဘာလို့လဲဆိုတော့ သူ့ရဲ့အကျိုးသက်ရောက်မှုက အားထုတ်ရကျိုးနပ်စေလို့ပါပဲ။ စစချင်းတော့ အခက်အခဲရှိနိုင်ပေမယ့် နောက်ပိုင်းကျရင်အဆင်ပြေသွားမှာပါ။

ဘယ်လိုလုပ်ရမလဲဆိုတော့ အရင်ဆုံးထိုင်ချလိုက်ပြီး ခြေထောက်တွေကိုဆန့်ထုတ်လိုက်ပါ။ ပြီးရင်ညာဘက်ခြေထောက်ကို ဘယ်ဘက်ပေါင်အတွင်းသားနဲ့ထိအောင်ကပ်ထားလိုက်ပါ။ ပြီးတာနဲ့ လက်နှစ်ဖက်ကို ဆန့်တန်းလိုက်ပြီး ခြေဖဝါးဆီကိုလက်လှမ်းလိုက်တဲ့ပုံစံနဲ့ ဘယ်ဘက်ခြေထောက်ပေါ်ကိုကွေးညွတ်လိုက်ပါ။ ခေါင်းကိုလည်း ပုံမှာပြထားတဲ့အတိုင်း အောက်စိုက်ထားလိုက်ပါ။ စက္ကန့်(၃၀) လောက်ကြာရင် ဘယ်ညာပြောင်းနိုင်ပါပြီ။

၄။ Supta Baddha Konasana (နောက်ကိုလှန်ချထားတဲ့ထောင့်ချိုးပုံစံ)

PD056SK_IMG_0376_SM_WEB1.jpg 

ဒီပုံစံကတော့ သက်တောင့်သက်သာရှိပြီး လုပ်ရတာလည်းလွယ်ကူတဲ့ပုံစံမျိုးပါ။ ဒီတစ်ခုတော့ ခင်ဗျားအနေနဲ့ဘာအခက်အခဲမှမရှိဘဲ လွယ်လွယ်ကူကူလုပ်နိုင်မယ်လို့ ယုံကြည်ပါတယ်။

ပြုလုပ်နည်းကတော့ အရင်ဆုံးနောက်ပြန်လှဲချလိုက်ပြီး ခေါင်းအောက်မှာစောင်တစ်ထည်ကိုခေါက်ပြီး ခုထားလိုက်ပါ။ ဒူးတွေကိုလည်းကွေးလိုက်ပြီး ခြေဖဝါးတွေကိုပူးကပ်ထားလိုက်ပါ။ လက် (၂) ဖက်ကိုတော့ ဘေးနားချထားလိုက်ပြီး သက်တောင့်သက်သာနေလိုက်ပါ။ အသက်ရှူသွင်း ရှူထုတ် အခါ (၂၀) လောက်လုပ်ပြီးသည်အထိ ဒီပုံစံအတိုင်းဆက်လုပ်ပေးလိုက်ပါ။

၅။ Savasana (လူသေကောင်လိုပုံစံ)

Savasana-Corpse-Pose-2.jpg 

ဒီပုံစံလေးကိုတော့ နောက်ဆုံးကျမှလုပ်ပေးနိုင်ပါတယ်။ ဘာလို့လဲဆိုတော့ ဒီတစ်ခုက သက်တောင့်သက်သာအရှိဆုံးနဲ့ အလွယ်ကူဆုံးနည်းလမ်းလေး ဖြစ်နေလို့ပါပဲ။ ဒီပုံစံအတိုင်း (၃) မိနစ်လောက် လုပ်ဖို့တောာ့ မမေ့ပါနဲ့။ ပြီးရင်တော့ သက်တောင့်သက်သာနဲ့အိပ်စက်နိုင်ပါပြီ။

Source: Youngisthan


က္က