(၁) ခရီးအမျိုးအစား

လူကြီးမိဘတွေနဲ့ အပျော်ခရီးသွားတဲ့အခါ မသွားခင် ဘယ်လိုခရီးမျိုးသွားမလဲဆိုတာကြိုတင်စဉ်းစားပါ။ နားနားနေနေသွားရမယ့် အပန်းဖြေခရီးလား၊ ဘုရားဖူးလား၊ အလည်အပတ်ခရီးလား။ သုံးခုစလုံးမှာ သူ့ဟာနဲ့သူ အားသာချက်တွေ၊ အားနည်းချက်တွေရှိပါတယ်။ ဘုရားဖူးတို့၊ အလည်အပတ်ခရီးတို့ဆိုရင်တော့ လူကြီးတွေအတွက်ပင်ပန်းတာမို့ သွားရေးလာရေးကို ကြိုတင်စီစဉ်ဖို့တော့ လိုပါတယ်။

(၂) ဖြေးဖြေးသွားပါ။

နေရာသစ်တစ်ခုခုကိုပဲဖြစ်ဖြစ်၊ မရောက်ဖူးတဲ့မြို့တစ်မြို့ကိုပဲဖြစ်ဖြစ်ရောက်သွားရင် တစ်နေ့ထဲနဲ့ အကုန်လုံးကို လည်နိုင်ဖို့ မစဉ်းစားပါနဲ့။ ရောမမြို့ကို တစ်နေ့ထဲအပြီးမဆောက်ခဲ့ဘူးဆိုတဲ့ စကားပုံရှိပါတယ်။ အဲဒါကြောင့် လူကြီးတွေနဲ့သွားပြီဆိုရင် ဒါပြီးဘယ်သွားမယ်၊ ဘယ်သွားမယ်ဆိုတဲ့ စာရင်းကိုအတိအကျသွားမယ်ဆိုရင် ပင်ပန်းပါလိမ့်မယ်။ ဖြစ်နိုင်ရင်နားနားနေနေ နဲ့ တခုပြီး တခုအေးအေးဆေးဆေး သွားသင့်ပါတယ်။

(၃) တည်းခိုမယ့်ဟိုတယ်သေချာရွေးပါ။

ခရီးသွားလို့ ဟိုတယ်ရွေးမယ်ဆိုရင်တော့ သေချာတာ Wifi ကောင်းကောင်း၊ အထပ်မြင့်အဆောက်အဦးဆိုရင်လည်း ရှုခင်းကောင်းကောင်း၊ ဒါမှမဟုတ်လဲ ဇိမ်ခံဟိုတယ်ကြီးတွေမှာ အဆင်အပြင်ဆန်းဆန်းလေးတွေနဲ့ နေချင်ကြပါတယ်။ ဒါပေမယ့် လူကြီးတွေပါလာပြီဆိုရင် ဒီအချက်တွေထက် ဟိုတယ်မှာ ဓာတ်လှေခါးရှိရဲ့လား၊ မရှိရင် မြေညီထပ်အခန်းကို တောင်းပါ။ ဟိုတယ်ခန်းထဲမှာ ရေစိမ်ကန်လား၊ ရေချိုးခန်းလား၊ အခန်းကျယ်ကျယ်ဝန်းဝန်ရှိရဲ့လား၊ အလင်းရောင်ကောင်းကောင်းရရဲ့လား၊ ခါးနာတတ်တဲ့ လူကြီးတွေအတွက် မွှေ့ယာအဆင်ပြေလားဆိုမေးကြည့်ပါ။ နောက်ပြီး ဟိုတယ်ဘေးပတ်ဝန်းကျင်မှာ အရက်ဆိုင်တို့၊ ကာရာအိုတွေရှိမယ်ဆိုရင်လည်း ညဘက်ဆူညံတတ်တာမို့ လူကြီးတွေ အိပ်ဖို့ အဆင်မပြေပါဘူး။

(၄) ကျန်းမာရေး

လူကြီးတွေမှာ ပုံမှန်သောက်နေကျဆေးတွေယူလာဖို့ မမေ့ပါနဲ့။ အဲဒါထက်အရေးကြီးတာက အရေးပေါ်အခြေအနေမှာ ဆေးရုံ၊ ဆေးခန်း ဘယ်မှာရှိတယ်၊ ဆရာဝန်ဘယ်မှာခေါ်လို့ရတယ်ဆိုတာ စုံစမ်းထားပါ။ ဖြစ်နိုင်ရင် ခရီးမသွားခင်မှာ အာမခံဝယ်ထားပါ။

(၅) အစားအသောက်

ခရီးထွက်ရတဲ့အထဲမှာ အစားအသောက်ကြောင့်လဲပါတယ်လေ။ အဲဒီဒေသက နာမည်ကြီးတဲ့ အစားအစာ၊ နာမည်ကြီးတဲ့ စားသောက်ဆိုင်ဆိုရင် ရောက်ဖူး၊စားဖူးချင်ကြပါတယ်။ လူကြီးတွေကျတော့ အသက်ကြီးလာရင် အစားရွေးတယ်။ ငံလွန်းရင်၊ စပ်လွန်းရင် သူတို့ မစားနိုင်ကြဘူး။ အဲဒါကြောင့် သူတို့နဲ့ အဆင်ပြေမယ့် အစားအစာအဲဒီဆိုင်မှာ ရမရသိဖို့လိုပါတယ်။ နောက်ပြီး လူကြီးတွေ တနေကုန်ခရီးပန်းပြီး အပြင်ထွက်ပြီး မစားချင်ဘူးဆိုရင်လည်း ဟိုတယ်မှာ မှာစားနိုင်ဖို့ စီစဉ်ပေးဖို့လိုပါတယ်။