အမေရိကန်မှာ အားအလွန်ကောင်းတဲ့ ဟာရီကိန်းမုန်တိုင်းမိုက်ကယ် ဝင်ရောက်တိုက်ခတ်ခဲ့မှုကြောင့် သေဆုံးသူအရေအတွက် ၁၃ ဦးအထိ မြင့်လာကြောင်းနဲ့ ဆက်လက် မြင့်တက်လာသေးကြောင်း သိရပါတယ်။

Photo: CNN

ဟာရီကိန်းမိုက်ကယ် (Hurricane Michael) ဖြတ်သန်းတိုက်ခတ်ခဲ့တဲ့ ဖလော်ရီဒါ ကမ်းရိုးတန်းမြို့လေးမှာ ကယ်ဆယ်ရေးအဖွဲ့တွေက အပျက်အစီးများကြား ရှာဖွေမှုတွေ ပြုလုပ်နေဆဲဖြစ်ပါတယ်။ ဗုဒ္ဓဟူးနေ့ (အောက်တိုဘာ ၁၀ ရက်) က ပြင်းအားအဆင့် ၄ (category 4) မုန်တိုင်းအဖြစ် ဟာရီကိန်းမိုက်ကယ် ကုန်းတွင်းပိုင်းဝင်ရောက်ခဲ့ရာ ဖလော်ရီဒါကမ်းရိုးတန်းရှိ မက္ကစီကိုကမ်းခြေမြို့ (Mexico Beach) ပျက်စီးသွားခဲ့ကြောင်း ဖလော်ရီဒါပြည်နယ်အုပ်ချုပ်ရေးမှူး ရစ်ခ်စကော့က ပြောပါတယ်။

လူဦးရေ ၁,၀၀၀ မျှသာ နေထိုင်ကြပြီး မက္ကစီကိုပင်လယ်ကွေ့မှာတည်ရှိတဲ့ ဟာရီကိန်းဒဏ်သင့် အဆိုပါမြို့ကို လှည့်လည်ကြည့်ရှုခဲ့ပြီးနောက် "ကြီးမားတဲ့ ဗုံးတစ်လုံး ပေါက်ကွဲထားသလိုဖြစ်ပြီး စစ်ပွဲဇုန်တစ်ခုအတိုင်းပါပဲ" လို့ ရစ်ခ်စကော့ကဆိုပါတယ်။ ကယ်ဆယ်ရေးအဖွဲ့တွေက မက္ကစီကိုကမ်းခြေမြို့မှာ အနံ့ခံခွေးများဖြင့် အပျက်အစီးတွေအောက်မှာ ပိတ်မိနေနိုင်သူတွေကို ယမန်နေ့ (အောက်တိုဘာ ၁၂ ရက်) ကလည်း ရှာဖွေနေခဲ့ကြပါတယ်။

Photo: UPI/Barcroft Images

Photo: CNN

မုန်တိုင်းတိုက်ခတ်ခဲ့ရာ ဒေသမှာ တပ်ဖွဲ့ဝင် ၅,၀၀၀ ကို အကူအညီပေးရန် စေလွှတ်ထားပြီး စစ်ဘက်ရဟတ်ယာဉ် ၁၀၀ နဲ့ ရေကြီးတဲ့နေရာတွေမှာပါ မောင်းနှင်သွားလာနိုင်တဲ့ high-water မော်တော်ယာဉ် ၁,၈၀၀ ကို အသုံးပြုနေကြောင်း ပင်တဂွန်စစ်ဌာနချုပ်က ပြောပါတယ်။ ဟာရီကိန်းမိုက်ကယ်ဟာ ၁၈၅၁ ခုနှစ်နောက်ပိုင်း ဖလော်ရီဒါကို ဝင်ရောက်တိုက်ခတ်ခဲ့တဲ့ အားအကောင်းဆုံး မုန်တိုင်းအဖြစ်လည်း မှတ်တမ်းဝင်ခဲ့ကြောင်း သိရပါတယ်။