မတည်မငြိမ်မှုတွေရှိနေတဲ့ ကက်ရှ်မီးယားကို အထူးကိုယ်ပိုင်အုပ်ချုပ်ခွင့်ရဒေသအဖြစ် သတ်မှတ်ထားမှုအား အိန္ဒိယအစိုးရက ပြန်လည်ရုပ်သိမ်းလိုက်ပြီလို့ သိရပါတယ်။
(Photo: AFP)
အထူးကိုယ်ပိုင်အုပ်ချုပ်ခွင့် ရုပ်သိမ်းလိုက်ခြင်းကြောင့် ကက်ရှ်မီးယားကို အိန္ဒိယအစိုးရကသာ တိုက်ရိုက် ကိုင်တွယ်အုပ်ချုပ်သွားတော့မှ ဖြစ်ပါတယ်။ အိန္ဒိယ ဗဟိုအစိုးရက ကက်ရှ်မီးယားကို အထူးကိုယ်ပိုင်အုပ်ချုပ်ခွင့်ရဒေသအဖြစ် သတ်မှတ်ထားတဲ့ ဖွဲ့စည်းပုံအခြေခံဥပဒေရဲ့ Article 370 ကို ပယ်ဖျက်မှာဖြစ်ကြောင်း ပြည်ထဲရေးဝန်ကြီး Amit Shah က ယမန်နေ့ (သြဂုတ် ၅ ရက်) မှာ လွှတ်တော်ကို ပြောကြားခဲ့ပါတယ်။
အိန္ဒိယ ဖွဲ့စည်းပုံအခြေခံဥပဒေရဲ့ Aritcle 370 အရ အိမ်နီးချင်း ပါကစ္စတန်နိုင်ငံနဲ့ ပိုင်ဆိုင်မှု အငြင်းပွားနေပြီး မတည်မငြိမ်ဖြစ်နေတဲ့ ကက်ရှ်မီးယားကို အထူးကိုယ်ပိုင်အုပ်ချုပ်ခွင့်ဒေသအဖြစ် သတ်မှတ်ထားပြီး အိန္ဒိယပြည်နယ်ဖြစ်တဲ့ ဂျမူးနဲ့ကက်ရှ်မီးယားမှာ ကိုယ်ပိုင်ဥပဒေများ ကျင့်သုံးစေခဲ့ကြောင်း သိရပါတယ်။
(Photo: AFP)
ယမန်နေ့က ကက်ရှ်မီးယားကို အထူးကိုယ်ပိုင်အုပ်ချုပ်ခွင့်ရဒေသအဖြစ်မှ ပယ်ဖျက်ကြောင်း မကြေညာမီ နာရီပိုင်းအလိုမှာ ထိုဒေသအတွင်း တယ်လီဖုန်းနဲ့ အင်တတာနက် ဝန်ဆောင်မှုများ ဖြတ်တောက်ထားခဲ့ပြီး ဂျမူးနဲ့ကက်ရှ်မီးယားပြည်နယ် ခေါင်းဆောင်တွေကို နေအိမ်အကျယ်ချုပ်ဖြင့် ထိန်းသိမ်းထားခဲ့ပါတယ်။
ကက်ရှ်မီးယားဒေသမှာ ပါကစ္စတန်အခြေစိုက် စစ်သွေးကြွအုပ်စုတွေက တိုက်ခိုက်မှုတွေ လုပ်ဆောင်လာနိုင်ဖွယ်ရှိကြောင်း အိန္ဒိယအစိုးရက သောကြာနေ့ (သြဂုတ် ၂ ရက်) မှာ သတိပေးချက် ထုတ်ပြန်ခဲ့ပြီးနောက် တင်းမာမှုတွေ မြင့်တက်နေခဲ့ကြောင်း Reuters သတင်းက ဖော်ပြပါတယ်။
(Map: BBC)
အိန္ဒိယနဲ့ပါကစ္စတန်တို့က မွတ်စလင်မ်အများစု နေထိုင်ကြတဲ့ ကက်ရှ်မီးယားဒေသဟာ ၎င်းတို့ပိုင်နက်ဖြစ်ကြောင်း အသီးသီး ပြောဆိုမှုတွေရှိပါတယ်။ သို့သော် အဆိုပါဒေသရဲ့ မတူညီတဲ့ နယ်မြေအစိတ်အပိုင်းတွေကို တစ်နိုင်ငံစီက ထိန်းချုပ်ထားပြီး အိန္ဒိယက ထိန်းချုပ်ထားတဲ့ ကက်ရှ်မီးယားနဲ့ ပါကစ္စတန်က ထိန်းချုပ်ထားတဲ့ ကက်ရှ်မီးယားအဖြစ် ရှိနေခဲ့ပါတယ်။ အိန္ဒိယနဲ့ပါကစ္စတန်တို့ဟာ ၁၉၄၇ ခုနှစ်မှာ ဗြိတိန်ထံမှ လွတ်လပ်ရေးရပြီးနောက်ပိုင်း စစ်ပွဲသုံးကြိမ်ဖြစ်ပွားခဲ့ဖူးပြီး တစ်ကြိမ်ကတော့ ကက်ရှ်မီးယားအရေးကြောင့် ဖြစ်ခဲ့ပါတယ်။