အမေရိကန်နိုင်ငံမှာ အင်္ဂါနေ့ (ဇွန် ၃၀ ရက်) က COVID-19 ကူးစက်ခံရသူ နောက်ထပ် ၄၇,၀၀၀ တိုးလာခဲ့ပြီး နိုင်ငံအတွင်း ကပ်ရောဂါ စတင်ဖြစ်ပွားခဲ့ချိန်မှစပြီး နေ့စဥ် ကူးစက်မှုအသစ်တွေ့ရှိရမှု အများဆုံး စံချိန်သစ်တင်ခဲ့ကြောင်း Reuters သတင်းဌာနရဲ့ စာရင်းအရ သိရှိရပါတယ်။
(Photo: Reuters)
ကယ်လီဖိုးနီးယား၊ တက္ကဆက်နဲ့ အာရီဇိုးနားပြည်နယ်တွေဟာ အမေရိကန်မှာ COVID-19 ကူးစက်မှု ဗဟိုချက်နေရာသစ်များ ဖြစ်လာကြပြီး ကူးစက်မှုတွေ မြင့်တက်နေပါတယ်။ ထိုအတောအတွင်း အမေရိကန်ရဲ့ ထိပ်တန်းသုတေသီ ဒေါက်တာ Anthony Fauci ကလည်း နိုင်ငံမှာ COVID-19 ကူးစက်မှုတွေဟာ တစ်ရက်လျှင် ၁၀၀,၀၀၀ အထိ ဖြစ်လာနိုင်ကြောင်း သတိပေးထားပါတယ်။
"အခုအချိန်မှာ ကျွန်တော်တို့ လုံးဝ မထိန်းချုပ်နိုင်ဘူးဆိုတာ ရှင်းပါတယ်၊ ဒါက အရမ်းဆိုးလာမှာကို ကျွန်တော် သိပ်စိုးရိမ်ပါတယ်" လို့ National Institute of Allergy and Infectious Diseases (NIAID) အကြီးအကဲ ဒေါက်တာ Anthony Fauci က ပြောခဲ့ပါတယ်။ ဒါ့အပြင် ဗိုင်းရပ်စ်ကူးစက်မှုတွေ မြင့်တက်နေတဲ့ နေရာတွေကိုသာ အာရုံမစိုက်နိုင်ကြောင်းနဲ့ တစ်နိုင်ငံလုံးဟာ အန္တရာယ်ရှိနေကြောင်းလည်း ၎င်းကဆိုပါတယ်။
(Photo: Reuters)
အစောပိုင်း အချက်အလက်တွေက အလားအလာကောင်းပေမဲ့ ကာကွယ်ဆေးတစ်ခု ရရှိရန် မသေချာသေးဘဲ လာမယ့်နှစ်စပိုင်းမှာ ကာကွယ်ဆေးရရှိလာမယ်လို့ မျှော်လင့်နေရကြောင်း ဒေါက်တာ Anthony Fauci ပြောခဲ့ပါတယ်။ တက္ကဆက်နဲ့ဖလော်ရီဒါ အပါအဝင် အမေရိကန်ပြည်နယ် ၁၀ ခုထက်မနည်းမှာ ဇွန်လအတွင်း COVID-19 ကူးစက်မှုတွေ နှစ်ဆဖြစ်လာခဲ့ကြောင်းလည်း Reuters ရဲ့ လေ့လာဆန်းစစ်မှုအရ သိရှိရပါတယ်။
တက္ကဆက်နဲ့ အာရီဇိုးနားပြည်နယ်တို့ရှိ ဆေးရုံများမှာ COVID-19 လူနာတွေအတွက် အထူးကြပ်မတ်ကုသခန်း မလုံလောက်မှုတွေ ဖြစ်ပေါ်နေတယ်လို့ ဆိုပါတယ်။ အမေရိကန်ဟာ ကမ္ဘာတစ်ဝှမ်းမှာ COVID-19 ကူးစက်မှုနဲ့ သေဆုံးမှု အများဆုံးနိုင်ငံဖြစ်ပြီး လက်ရှိအချိန်အထိ ကူးစက်ခံရသူ ၂.၇ သန်းကျော်နဲ့ သေဆုံးသူ ၁၃၀,၀၀၀ ကျော်ရှိခဲ့ပါတယ်။
(Photo: AFP)
(Photo: AFP)
CDC က နိုင်ငံတစ်ဝှမ်း စုဆောင်းရယူခဲ့တဲ့ သွေးနမူနာများကို စစ်ဆေးမှုအရ ဗိုင်းရပ်စ်မှ ပဋိပစ္စည်းများရှိနေမှုအပေါ် အခြေခံပြီး COVID-19 ကူးစက်ခံရနိုင်သူ အရေအတွက်ကို ခန့်မှန်းခဲ့တာ ဖြစ်ပါတယ်။ ဝါရှင်တန်တက္ကသိုလ်ရဲ့ ခန့်မှန်းချက်အရ လာမယ့် အောက်တိုဘာလအရောက် အမေရိကန်မှာ COVID-19 ကြောင့် သေဆုံးသူ ၁၈၀,၀၀၀ ဖြစ်လာနိုင်ကြောင်း၊ သို့မဟုတ် အမေရိကန် ၉၅ ရာခိုင်နှုန်းက mask တပ်ထားပါက သေဆုံးသူအရေအတွက်ဟာ ၁၄၆,၀၀၀ ဖြစ်နိုင်တယ်လို့ ဆိုပါတယ်။