အမေရိကန်နိုင်ငံ နယူးဂျာစီပြည်နယ် ဂျာစီမြို့မှာ နာရီနဲ့ချီကြာမြင့်တဲ့ ပစ်ခတ်မှုများ ဖြစ်ပွားခဲ့ပြီး ရဲအရာရှိတစ်ဦး၊ အရပ်သားသုံးဦးနဲ့ သံသယရှိသူနှစ်ဦးတို့ သေဆုံးခဲ့ကြောင်း သိရပါတယ်။

(Photo: AP)

၎င်းတို့နှစ်ဦးက ရိုင်ဖယ်သေနတ်များ ကိုင်ဆောင်ထားခဲ့ကြပြီး Kosher စူပါမတ်ကက်အတွင်းမှာ လူသုံးဦးကို ပစ်သတ်ခဲ့ပါတယ်။ အစောပိုင်းမှာ ပစ်သတ်ခံရတဲ့ ရဲစုံထောက်မှာ အသက် ၃၉ နှစ်အရွယ် ဂျိုးဇက်ဆီးလ်ဖြစ်ပြီး ရဲတပ်ဖွဲ့မှာ ၁၃ နှစ်ကြာ တာဝန်ထမ်းဆောင်ခဲ့သူလို့ သိရပါတယ်။ စူပါမတ်ကက်ကို SWAT အထူးတပ်ဖွဲ့က ဝိုင်းပတ်ပိတ်ဆို့ထားခဲ့ကာ အပြန်အလှန် ပစ်ခတ်မှုများဖြစ်ပွားခဲ့ပြီး အဆိုပါ သံသယရှိသူ သေနတ်သမားနှစ်ဦး သေဆုံးသွားခဲ့ပါတယ်။

(Photo: AFP via Getty Images)

ယခုဖြစ်ရပ်ကို မျက်မြင်တွေ့ရှိခဲ့သူတွေရဲ့ အဆိုအရ Kosher စူပါမတ်ကက်ကို SWAT က ဝိုင်းထားပြီးနောက် အပြန်အလှန် ပစ်ခတ်မှုများ နောက်ထပ် နှစ်နာရီကြာ ဖြစ်ပွားနေခဲ့တယ်လို့ Daily Mail သတင်းမှာ ဖော်ပြပါတယ်။ အပြင်းအထန် ဖြစ်ပွားခဲ့တဲ့ ပစ်ခတ်မှုအတွင်း ရဲတပ်ဖွဲ့ဝင်နှစ်ဦး အပါအဝင် လူအချို့လည်း ဒဏ်ရာရခဲ့တယ်လို့ ဆိုပါတယ်။ လက်ရှိအချိန်မှာ ထိုဖြစ်ရပ်ကို အကြမ်းဖက်တိုက်ခိုက်မှုလို့ မယုံကြည်ကြောင်းနဲ့ အခြေအနေကို ထိန်းသိမ်းနိုင်ပြီဖြစ်ကြောင်း ရဲတပ်ဖွဲ့က ထုတ်ပြန်ပါတယ်။