ဗြိတိန်ဝန်ကြီးချုပ် ဘောရစ်ဂျွန်ဆင်ဟာ COVID-19 ရောဂါဗိုင်းရပ်စ် ကူးစက်ခံထားရကြောင်း တွေ့ရှိရပြီးနောက် ၁၀ ရက်အကြာ ယမန်နေ့ (ဧပြီ ၅ ရက်) က စစ်ဆေးမှုများအတွက် ဆေးရုံတက်ရောက်ခဲ့ကြောင်း ၎င်းရဲ့ရုံးခန်းက ပြောပါတယ်။

(Photo: UNPIXS Europe)

သို့သော် ၎င်းဟာ COVID-19 လက္ခဏာတွေထဲက တစ်ခုဖြစ်တဲ့ ကိုယ်ပူချိန်မြင့်တက်နေတာကြောင့် အိမ်မှာပင်ဆက်နေသွားမယ်လို့ ဝန်ကြီးချုပ်ဘောရစ်ဂျွန်ဆင်က ပြောခဲ့ပါတယ်။ ထို့နောက် ဒေါင်းနင်းလမ်းရှိ ဝန်ကြီးချုပ်ရုံးခန်းက ယမန်နေ့ညပိုင်းက ထုတ်ပြန်ရာမှာတော့ "သူ့ရဲ့ဆရာဝန် အကြံပေးမှုအရ ဝန်ကြီးချုပ်ဟာ စစ်ဆေးမှုတွေအတွက် ဒီည ဆေးရုံတက်ခဲ့ပါတယ်" လို့ ဖော်ပြထားပါတယ်။

(Photo: Christopher Furlong/Getty Images)

လက်ရှိအချိန်အထိ ဘောရစ်ဂျွန်ဆင်ဟာ ဗိုင်းရပ်စ်ကူးစက်ခံရတဲ့ အထင်ရှားဆုံး ကမ္ဘာ့ခေါင်းဆောင်တစ်ဦးလည်း ဖြစ်ပါတယ်။ ၎င်းရဲ့ ကိုယ်ဝန်ဆောင် လက်တွဲဖော် ကာရီဆိုင်မွန်စ်ဟာလည်း COVID-19 လက္ခဏာများနဲ့ တစ်ပတ်ကြာ နေမကောင်းဖြစ်ခဲ့သေးပေမဲ့ ယခုအခါမှာတော့ ပြန်လည်သက်သာနေပြီလို့ သိရပါတယ်။

(Photo: Sky News)

ဗြိတိန်အစိုးရအဖွဲ့မှ ဗိုင်းရပ်စ်ကူးစက်ခံရသူ ကျန်းမာရေးဝန်ကြီး မတ်ဟန်းကွတ်ခ်ကတော့ ဗိုင်းရပ်စ်ကူးစက်ခံရမှုကြောင့် နေအိမ်မှာ တစ်ပတ်ကြာနေခဲ့ပြီးနောက် ဧပြီ ၃ ရက်နေ့မှာ အလုပ်ပြန်လုပ်နေပြီ ဖြစ်ပါတယ်။ ဗြိတိန်မှာ ဆေးဘက်ဆိုင်ရာ အကြီးအကဲ ခရစ်ဝစ်တီလည်း COVID-19 လက္ခဏာများရှိခဲ့တယ်လို့ ဆိုပါတယ်။

ဝန်ကြီးချုပ်ဘောရစ်ဂျွန်ဆင်ရဲ့ အနီးကပ် အကြံပေးပုဂ္ဂိုလ် ဒိုမီနစ်ကမ်မင်းစ်ကတော့ သီးခြားခွဲနေထိုင်လျက်ရှိပါတယ်။ လက်ရှိအချိန်အထိ ဘောရစ်ဂျွန်ဆင်ဟာ အစိုးရအဖွဲ့ကို ဦးဆောင်နေဆဲလို့ ယူဆရပြီး ဝန်ကြီးများ၊ တာဝန်ရှိသူများနဲ့ အဆက်အသွယ်ရှိကြောင်း AFP သတင်းက ဖော်ပြပါတယ်။

(Photo: AFP)

ထိုအတောအတွင်း ယမန်နေ့မှာပင် ဗြိတိန်ဘုရင်မကြီး အဲလိဇဘက်သ်က COVID-19 ကပ်ရောဂါဖြစ်ပွားနေမှုနဲ့ ပတ်သက်ပြီး ရုပ်မြင်သံကြားမှတစ်ဆင့် နိုင်ငံကို မိန့်ခွန်းပြောခဲ့တယ်လို့ သိရပါတယ်။ အသက် ၉၃ နှစ်အရွယ် ဗြိတိန်ဘုရင်မကြီး ရုပ်မြင်သံကြားမှတစ်ဆင့် မိန့်ခွန်းပြောခြင်းဟာ အလွန်ရှားပါးတဲ့ ဖြစ်ရပ်တစ်ခုလို့ ဆိုပါတယ်။

ဘုရင်မကြီးအဲလိဇဘက်ဟာ ၎င်းရဲ့ ၆၈ နှစ်ကြာ နန်းသက်အတွင်း ယခုတစ်ကြိမ် အပါအဝင် ရုပ်မြင်သံကြားမှာ မိန့်ခွန်းပြောကြားမှု ငါးကြိမ်သာရှိခဲ့တာ ဖြစ်ပါတယ်။ ဘုရင်မကြီးက ဗြိတိန်မှာ COVID-19 တိုက်ဖျက်ရေး အားထုတ်ကြိုးပမ်းနေကြတဲ့ ကျန်းမာရေးဝန်ထမ်းတွေနဲ့ အဓိက အလုပ်သမားတွေကို ကျေးဇူးတင်ကြောင်း ထည့်သွင်းပြောကြားခဲ့ပါတယ်။

(Photo: Buckingham Palace/AFP)

"ကျွန်မတို့ ဒီရောဂါကို အတူတကွ တိုက်ဖျက်နေကြပါတယ်၊ ကျွန်မတို့ စည်းလုံးညီညွတ်ပြီး ပြတ်ပြတ်သားသား လုပ်ဆောင်ကြမယ်ဆိုရင် ကျွန်မတို့ ဒါကို ကျော်လွှားနိုင်မှာပါ" လို့ ဗြိတိန်ဘုရင်မကြီးက ပြောပါတယ်။ လက်ရှိမှာ ဗြိတိန်ဘုရင်မကြီး အဲလိဇဘက်သ်က ခင်ပွန်းသည် မင်းသားကြီးဖိလစ်နဲ့အတူ ဝင်ဆာရဲတိုက်မှာ နေထိုင်လျက်ရှိပြီး ထိုနေရာမှ ရုပ်မြင်သံကြားမိန့်ခွန်း ပြောကြားခဲ့တာ ဖြစ်ပါတယ်။

ယနေ့ (ဧပြီ ၆ ရက်) မနက်အစောပိုင်းအထိ စာရင်းတွေအရ ဗြိတိန်နိုင်ငံမှာ COVID-19 ကူးစက်ခံရသူ ၄၇,၈၀၆ ဦးနဲ့ သေဆုံးသူ ၄,၉၃၄ ဦးအထိ မြင့်တက်နေခဲ့ပြီး ပြန်လည်သက်သာသူ အရေအတွက် ၁၃၅ ဦးရှိခဲ့ပါတယ်။ ကမ္ဘာတစ်ဝှမ်းမှာတော့ ယနေ့ မနက်အစောပိုင်းအထိ ဗိုင်းရပ်စ်ကူးစက်ခံရသူ ၁,၂၆၈,၇၃၈ ဦး၊ သေဆုံးသူ ၆၉,၃၂၉ ဦးနဲ့ ပြန်လည်သက်သာလာသူ ၂၆၁,၁၃၅ ဦးရှိကြောင်း သိရပါတယ်။