တရုတ်မှာ COVID-19 ကပ်ရောဂါတိုက်ဖျက်ရေး ကိုယ်ကျိုးစွန့်ကြိုးပမ်းရင်း အသက်စွန့်ခဲ့သူတွေနဲ့ ရောဂါကြောင့် သေဆုံးခဲ့သူတွေအတွက် ဝမ်းနည်းခြင်းအထိမ်းအမှတ်ကို ယနေ့ (ဧပြီ ၄ ရက်) ပြုလုပ်ခဲ့ကြပါတယ်။

ဘေဂျင်းဒေသစံတော်ချိန် ယနေ့မနက် ၁၀ နာရီမှာ COVID-19 တိုက်ဖျက်ရေး ရှေ့တန်းမှပါဝင်ခဲ့ပြီး သေဆုံးခဲ့ကြတဲ့ ဆေးဘက်ဝန်ထမ်းများနဲ့ ဆရာဝန်များ အပါအဝင် သေဆုံးခဲ့သူတွေအတွက် ဝမ်းနည်းခြင်းအထိမ်းအမှတ် သုံးမိနစ် ငြိမ်သက်ခဲ့ကြပါတယ်။ ကားများ၊ ရထားများနဲ့ သင်္ဘောများက ဟွန်းသံများနဲ့ အချက်ပေးဥဩသံများပေးခဲ့ကြပါတယ်။

၎င်းတို့ ရင်ဘတ်မှာ ဝမ်းနည်းခြင်းအထိမ်းအမှတ်အဖြစ် အဖြူရောင်ပန်းပွင့်များထိုးထားကြောင်းလည်း နိုင်ငံပိုင်သတင်းဌာနက ဖော်ပြပါတယ်။ COVID-19 ကပ်ရောဂါဖြစ်စေတဲ့ ဗိုင်းရပ်စ် စတင်တွေ့ရှိခဲ့ရာ တရုတ်နိုင်ငံမှာ ယနေ့ မွန်းလွဲပိုင်းအထိ ကူးစက်ခံရသူ ၈၁,၆၃၉ ဦးရှိပြီး ၃,၃၂၆ ဦး သေဆုံးခဲ့ကြောင်းနဲ့ ပြန်လည်သက်သာလာသူ ၇၆,၇၅၅ ဦးရှိခဲ့ပါတယ်။

(Photo: Xinhua)

လက်ရှိအချိန်မှာတော့ တရုတ်မှာ ဗိုင်းရပ်စ်ကူးစက်မှုနဲ့ သေဆုံးမှုတွေ သိသိသာသာ လျော့ကျသွားခဲ့ပြီး ယမန်နှစ် ဒီဇင်ဘာလကုန်က ဗိုင်းရပ်စ် စတင်တွေ့ရှိခဲ့ရာ ဝူဟန်မြို့အပါအဝင် ဟူဘေးပြည်နယ်မှာ လနဲ့ချီကြာ အသွားအလာ ပိတ်ပင်ကန့်သတ်ထားမှုကို စတင်ဖြေလျော့ပေးနေပြီ ဖြစ်ပါတယ်။ COVID-19 ကူးစက်မှုတွေဟာ တရုတ်မှာ လျော့ကျသွားခဲ့ပေမဲ့ အမေရိကန်၊ အီတလီ၊ စပိန်၊ ဂျာမနီ၊ ပြင်သစ်တို့မှာတော့ သိသာစွာ မြင့်တက်လာခဲ့ပြီး တရုတ်ထက် ပိုမိုများပြားခဲ့ပါတယ်။

ထို့အတူ အမေရိကန်၊ အီတလီ၊ စပိန်၊ ပြင်သစ်နဲ့ ဗြိတိန်တို့မှာ သေဆုံးသူအရေအတွက်ဟာလည်း တရုတ်မှာထက် ပိုမိုများပြားနေပါတယ်။ ကမ္ဘာတစ်ဝှမ်းမှာတော့ ယနေ့ မွန်းလွဲပိုင်းအထိ ဗိုင်းရပ်စ်ကူးစက်ခံရသူ ၁,၁၁၉,၇၀၂ ဦးနဲ့ သေဆုံးသူ ၅၉,၂၄၅ ဦးအထိ မြင့်တက်လာခဲ့ပြီး ပြန်လည်သက်သာသူဦးရေ ၂၂၉,၃၃၈ ဦးရှိခဲ့ကြောင်း သိရပါတယ်။