ဗိုင်းရပ်စ်ကူးစက်ပျံ့နှံ့မှုကို WHO က တုံ့ပြန်ဆောင်ရွက်ရာမှာ ၎င်းရဲ့ မူလတာဝန် မကျေခဲ့ဘူးလို့ ဆိုပါတယ်။
Ko John

အမေရိကန်သမ္မတ ဒေါ်နယ်ထရန့်က ကမ္ဘာ့ကျန်းမာရေးအဖွဲ့အစည်း (World Health Organization - WHO) ကို ရန်ပုံငွေထောက်ပံ့မှုတွေ ရပ်ဆိုင်းထားမယ်လို့ ဧပြီ ၁၄ ရက်နေ့မှာ ကြေညာလိုက်ပါတယ်။

(Photo: Reuters)

COVID-19 ကပ်ရောဂါအရေး ကိုင်တွယ်ဆောင်ရွက်ပုံမှုတွေအပေါ် ကျေနပ်မှုမရှိတာကြောင့် ရန်ပုံငွေထောက်ပံ့မှု ရပ်ဆိုင်းထားမယ်လို့ ထရန့်ကဆိုပါတယ်။ WHO ဟာ COVID-19 ရောဂါဖြစ်စေတဲ့ SARS-COV-2 ဗိုင်းရပ်စ်ကူးစက်ပျံ့နှံ့မှုကို တုံ့ပြန်ဆောင်ရွက်ရာမှာ ၎င်းရဲ့ မူလတာဝန် မကျေခဲ့ဘူးလို့ အမေရိကန်သမ္မတထရန့်က ပြောဆိုခဲ့ပါတယ်။

တရုတ်မှာ ဗိုင်းရပ်စ် စတင်တွေ့ရှိရပြီးနောက် WHO က စီမံဆောင်ရွက်မှုတွေ လွဲမှားခဲ့ကြောင်းနဲ့ ကူးစက်ပျံ့နှံ့မှုကို ဖုံးကွယ်ခဲ့ကြောင်း ထရန့်က စွပ်စွဲခဲ့ပြီး ထိုအတွက် တာဝန်ခံရမယ်လို့လည်း ဆိုပါတယ်။ အစောပိုင်းမှာလည်း သမ္မတထရန့်က WHO ဟာ တရုတ်ကို ဘက်လိုက်မှုရှိကြောင်း စွပ်စွဲထားခဲ့ပါတယ်။

(Photo: Alex Brandon/AP)

"ကိုရိုနာဗိုင်းရပ်စ် ကူးစက်ပျံ့နှံ့မှုနဲ့ပတ်သက်ပြီး လွဲမှားတဲ့ စီမံဆောင်ရွက်မှုတွေနဲ့ ဖုံးကွယ်မှုမှာ WHO ရဲ့ အခန်းကဏ္ဍအပေါ် ပြန်သုံးသပ်နေတုန်းမှာ ရန်ပုံငွေထောက်ပံ့မှု ရပ်ဆိုင်းထားဖို့ ကျွန်တော့်အစိုးရအဖွဲ့ကို ညွှန်ကြားထားပါတယ်" လို့ အမေရိကန်သမ္မတထရန့်က အိမ်ဖြူတော်မှာ ပြုလုပ်ခဲ့တဲ့ သတင်းစာရှင်းလင်းပွဲမှာ အတည်ပြု ပြောကြားခဲ့ပါတယ်။ "WHO က သူ့ရဲ့ မူလတာဝန်ကို မကျေပွန်ခဲ့ဘူး၊ ဒီအတွက် တာဝန်ခံရမယ်" လို့ ထရန့်က ဖြည့်စွက်ပြောပါတယ်။

အမေရိကန်ဟာ WHO အတွက် ရန်ပုံငွေအများဆုံး ထောက်ပံ့ပေးနေတဲ့ နိုင်ငံဖြစ်ပြီး ယမန်နှစ်က အမေရိကန်ဒေါ်လာ သန်း ၄၀၀ ရန်ပုံငွေပေးအပ်ခဲ့ပြီး WHO ရဲ့ စုစုပေါင်း ရန်ပုံငွေရဲ့ ၁၅ ရာခိုင်နှုန်းနီးပါး ဖြစ်ပါတယ်။ တရုတ်နိုင်ငံကတော့ ၂၀၁၈-၁၉ ခုနှစ်မှာ WHO အတွက် ရန်ပုံငွေ အမေရိကန်ဒေါ်လာ ၇၆ သန်းနဲ့ စေတနာအလျောက် ထည့်ဝင်တဲ့ရန်ပုံငွေ ဒေါ်လာ ၁၀ သန်း ပေးအပ်ခဲ့ကြောင်း WHO ရဲ့ ဝက်ဘ်ဆိုက်ကို ကိုးကားပြီး BBC သတင်းက ဖော်ပြပါတယ်။

(Photo: Xinhua)

အမေရိကန်ဟာ လက်ရှိမှာ COVID-19 ကူးစက်မှုနဲ့ သေဆုံးမှု အများဆုံးနိုင်ငံ ဖြစ်နေပါတယ်။ ယနေ့ (ဧပြီ ၁၅ ရက်) မွန်းလွဲပိုင်းအထိ အမေရိကန်မှာ COVID-19 ကူးစက်ခံရသူ ၆၁၄,၂၄၆ ဦးနဲ့ သေဆုံးသူ ၂၆,၀၆၄ ဦးအထိ ဆက်လက် မြင့်တက်နေပြီး ပြန်လည်သက်သာသူ ၃၈,၈၂၀ ဦးရှိခဲ့ပါတယ်။

COVID-19 ရောဂါဖြစ်စေတဲ့ SARS-COV-2 ဗိုင်းရပ်စ် စတင်တွေ့ရှိခဲ့တဲ့ တရုတ်နိုင်ငံမှာတော့ ကူးစက်မှုနဲ့ သေဆုံးမှုတွေ သိသာစွာ လျော့ကျသွားခဲ့ပြီး အသွားအလာ ပိတ်ပင်ကန့်သတ်တဲ့ lockdown အစီအမံတွေကိုလည်း ရုပ်သိမ်းနေပြီ ဖြစ်ပါတယ်။ ယနေ့ မွန်းလွဲပိုင်းအထိ တရားဝင် ထုတ်ပြန်တဲ့စာရင်းတွေအရ တရုတ်မှာ ဗိုင်းရပ်စ်ကူးစက်ခံရသူ ၈၂,၂၉၅ ဦး၊ သေဆုံးသူ ၃,၃၄၂ ဦးနဲ့ ပြန်လည်သက်သာသူ ၇၇,၈၁၆ ဦးဖြစ်ကြောင်း သိရပါတယ်။



က္က