ဂျပန်နိုင်ငံ နေရာဒေသတွေမှာ စံချိန်တင် မိုးသည်းထန်ခဲ့ပြီးနောက် ရေကြီးမှုနဲ့မြေပြိုမှုများကြောင့် သေဆုံးသူအရေအတွက် ၁၅၅ ဦးအထိ မြင့်တက်လာကြောင်းနဲ့ ပျောက်ဆုံးနေသူတွေကို အသက်ရှင်လျက် ရှာဖွေတွေ့ရှိရန် မျှော်လင့်ချက်မှေးမှိန်လာကြောင်း အာဏာပိုင်တွေက ယနေ့ (ဇူလိုင် ၁၀ ရက်) ပြောပါတယ်။

ရေကြီးမြေပြိုမှုများအတွင်း လူဦးရေ ဒါဇင်နဲ့ချီ ပျောက်ဆုံးနေဆဲဖြစ်ပါတယ်။ ယမန်နေ့ (ဇူလိုင် ၉ ရက်) မှာ မိုးရွာသွန်းမှု လျော့နည်းသွားခဲ့ပြီး ကယ်ဆယ်ရေးသမားတွေက အစောပိုင်းမှာ သွားရောက်နိုင်ခဲ့ခြင်းမရှိတဲ့ နေရာတွေကို ရောက်ရှိနိုင်ခဲ့ပါတယ်။အဆိုပါနေရာများရှိ အပျက်အစီးများအောက်မှာ ပိတ်မိသေဆုံးသူတွေ ရှိနေနိုင်မှုကို အာဏာပိုင်တွေက စိုးရိမ်နေပါတယ်။ ယခုဖြစ်ရပ်ဟာ ဂျပန်မှာ ဆယ်စုနှစ်သုံးခုကျော်အတွင်း မိုးရွာသွန်းမှု နောက်ဆက်တွဲကြောင့် လူသေဆုံးမှုအများဆုံးလည်း ဖြစ်လာခဲ့ပါတယ်။

ဂျပန်မှာ ရေကြီးမြေပြိုမှုကြောင့် လူသေဆုံးတွေ မြင့်တက်လာခဲ့ပြီးနောက် ဝန်ကြီးချုပ်ရှင်ဇိုအဘေးက ၎င်းရဲ့ နိုင်ငံလေးခုသို့သွားရောက်မယ့် ခရီးစဉ်ကို ဖျက်သိမ်းလိုက်ပါတယ်။ အဘေးက ရေကြီးမြေပြိုမှုတွေ ဖြစ်ပွားခဲ့တဲ့ နေရာဒေသတွေကို ယခုသီတင်းပတ်နှောင်းပိုင်းမှာ သွာရောက်ကြည့်ရှုမယ်လို့ ဆိုပါတယ်။မိုးသည်းထန်စွာရွာပြီး ရေကြီးမြေပြိုတွေကြောင့် ဂျပန်နိုင်ငံ အလယ်ပိုင်းနဲ့အနောက်ပိုင်းတွေမှာ မြေပြင်အခြေအနေနဲ့ ရှုခင်းမြင်ကွင်းတွေ ပြောင်းလဲသွားခဲ့ပါတယ်။

Photo: CNN

မိုးသည်းထန်စွာ အဆက်မပြတ်ရွာသွန်းခဲ့ပြီး လေးရက်ကြာမြင့်ခဲ့ပြီဖြစ်ရာ ပျောက်ဆုံးနေသူတွေကို အသက်ရှင်လျက်တွေ့နိုင်ရန် မျှော်လင့်ချက်မှေးမှိန်လာတယ်လို့ ကယ်ဆယ်ရေးသမားတွေက ပြောပါတယ်။

ရေကြီးမှုတွေဖြစ်ခဲ့တဲ့ ဂျပန်အနောက်ပိုင်းရှိ ကျေးရွာအချို့မှာ ရွာလုံးကျွတ်ရေလွှမ်းမိုးခံခဲ့ရပြီး ဒေသခံတွေဟာ နေအိမ်ခေါင်းမိုးများပေါ်တက်နေခဲ့ပြီး ကယ်ဆယ်ရေးအဖွဲ့တွေကို စောင့်ဆိုင်းခဲ့ကြရပါတယ်။

Photo: Daily Sabah

Photo: Getty Images

Photo: Bloomberg

ဂျပန်နိုင်ငံမှာ မိုးသည်းထန်စွာ ရွာသွန်းမှုနဲ့ဆက်စပ်ပြီး အဆိုးရွားဆုံး သဘာဝဘေးအန္တရာယ်ကို ၂၀၁၄ ခုနှစ်မှာ နောက်ဆုံးအကြိမ် ကြုံတွေ့ခဲ့ရဖူးပါတယ်။ ထိုစဉ်က ဟီရိုရှီးမားဒေသမှ မိုးသည်းထန်စွာ ရွာသွန်းခဲ့ပြီးနောက် မြေပြိုမှုတွေ ဖြစ်ပွားခဲ့ရာ လူ ၇၄ ဦး သေဆုံးခဲ့ပါတယ်။