ဂျပန်နိုင်ငံ တိုကျိုမြို့မှာ ပြေးဆွဲနေတဲ့ မောင်းသူမဲ့ရထားတစ်စင်း လမ်းကြောင်းမှား ခုတ်မောင်းသွားခဲ့ပြီးနောက် ရထားတွဲရပ်တန့်ရန် နေရာမှာတပ်ဆင်ထားတဲ့ သံလမ်းအတားအဆီးကို ဝင်တိုက်ခဲ့မှုကြောင့် ခရီးသည် ၁၄ ဦး ဒဏ်ရာရခဲ့ကြောင်း ရဲတပ်ဖွဲ့က ယနေ့ (ဇွန် ၂ ရက်) ပြောပါတယ်။

(မောင်းသူမဲ့ရထား မတော်တဆမှုဖြစ်ခဲ့သည့် ဘူတာရုံမြင်ကွင်း) (Photo: Kyodo)

တွဲငါးတွဲပါတဲ့ မောင်းသူမဲ့ရထားဟာ စနေနေ့ (ဇွန် ၁ ရက်) ညပိုင်းက ၆၅ ပေကျော်ခန့် လမ်းကြောင်းမှား ခုတ်မောင်းသွားခဲ့ပြီးနောက် Shin-Sugita ဘူတာရုံမှာ ရထားတွဲများရပ်တန့်ရန် သံလမ်းပေါ်တပ်ဆင်ထားတဲ့ အတားအဆီးကို ဝင်တိုက်ခဲ့မိကြောင်း ရထားကုမ္ပဏီဥက္ကဋ္ဌ အကီဟီတို မီကာမီက ယမန်နေ့ညသန်းခေါင်းမှာ ပြုလုပ်ခဲ့တဲ့ သတင်းစာရှင်းလင်းပွဲမှာ ပြောခဲ့ပါတယ်။

(ဂျပန် မောင်းသူမဲ့ရထားတစ်စင်း) (Photo: soranews24)

ယိုကိုဟားမား ဆိပ်ကမ်းမြို့မှာရှိတဲ့ အဆိုပါ ဘူတာရုံဟာ မောင်းသူမဲ့ရထားလိုင်း Kanazawa Seaside Line ရဲ့ ရထားလမ်းဆုံး နောက်ဆုံး ဘူတာရုံလည်းဖြစ်ပါတယ်။ ယခု မတော်တဆမှုဖြစ်ပြီးနောက် မောင်းသူမဲ့ရထား ပြေးဆွဲမှုကို ရပ်နားထားပြီး မည်သည့်အချိန်မှာ ဝန်ဆောင်မှုများ ပြန်လည်စတင်မယ်လို့ မသေချာသေးကြောင်း မီကာမီက ပြောပါတယ်။