ဂျပန်မှာ COVID-19 ဗိုင်းရပ်စ်ကူးစက်မှုတွေ တရိပ်ရိပ်တိုးလာနေပြီး တိုကျိုတစ်နေရာတည်းမှာပင် ကူးစက်ခံရသူ ၁,၀၀၀ ကျော်ရှိနေပါတယ်။ ဂျပန်တစ်နိုင်ငံလုံးမှာတော့ ယနေ့ (ဧပြီ ၆ ရက်) မွန်းလွဲပိုင်းအထိ ဗိုင်းရပ်စ်ကူးစက်ခံရသူ ၃,၆၄၆ ဦးနဲ့ သေဆုံးသူ ၈၅ ဦးအထိ ရှိလာပါတယ်။ ပြန်လည်သက်သာလာသူ အရေအတွက်ကတော့ ၅၇၅ ဦး ဖြစ်ပါတယ်။

ဂျပန်ဟာ အမေရိကန်၊ ဥရောပရှိ နိုင်ငံများ၊ တရုတ်တို့နဲ့ နှိုင်းယှဥ်ပါက လက်ရှိမှာ ဗိုင်းရပ်စ်ကူးစက်မှုနှုန်း နှေးကွေးနေဆဲဖြစ်ပေမဲ့ တိုကျိုမြို့တော်မှာတော့ ကူးစက်မှုတွေ မြင့်တက်နေခဲ့ပါတယ်။ ဂျပန်မှာ အရေးပေါ်အခြေအနေ ကြေညာလိုက်ခြင်းဖြင့် ဗိုင်းရပ်စ်ကူးစက်မှု အပြင်းအထန် ဖြစ်ပွားနေတဲ့ နယ်မြေဒေသတွေမှာ လူတွေကို အိမ်မှာနေခိုင်းပြီး စီးပွားရေးလုပ်ငန်းများကို ပိတ်ပင်ထားစေရန် ဥပဒေအရ ပြောဆိုနိုင်ပါတယ်။ သို့သော် အခြားနိုင်ငံတွေမှာ စီမံဆောင်ရွက်နေသကဲ့သို့ အသွားအလာ ပိတ်ပင်ကန့်သတ်ပြီး lockdown ပုံစံ ဂျပန်မှာ လုပ်ဆောင်မှာမဟုတ်ဘူးလို့ သိရပါတယ်။