ဟောင်ကောင်မှာ လတ်တလောအတွင်း COVID-19 ကူးစက်မှုတွေ ပြန်မြင့်တက်နေပါတယ်။

COVID-19 ကူးစက်မှုတွေ ပြန်မြင့်တက်နေတဲ့ ဟောင်ကောင်မှာ ကူးစက်မှုထိန်းချုပ်ရန်အတွက် လူနှစ်ဦးထက်ပိုတဲ့ စုဝေးမှုမလုပ်ရန် တားမြစ်ပိတ်ပင်ခြင်း အပါအဝင် နောက်ထပ် ကန့်သတ်ချက်များ ဇူလိုင် ၂၇ ရက်နေ့က ကြေညာခဲ့ပါတယ်။

(Photo: Reuters)

နောက်ထပ် ထုတ်ပြန်လိုက်တဲ့ ကန့်သတ်ချက်တွေအနက် စားသောက်ဆိုင်တွေမှာ ဆိုင်ထိုင်စားသောက်မှု လုံးဝ ပိတ်ပင်ခြင်းနဲ့ အိမ်အပြင်ဘက် အပါအဝင် အများပြည်သူဆိုင်ရာ နေရာအားလုံးမှာ စည်းမျဥ်းဥပဒေအရ mask တပ်ထားရန်လည်း ပါဝင်ပါတယ်။ ဟောင်ကောင်အာဏာပိုင်တွေက ထုတ်ပြန်မှုအရ ဇူလိုင် ၂၇ ရက်နေ့မှာ COVID-19 ကူးစက်မှုအသစ် ၁၄၅ ခု တိုးလာခဲ့ပြီး ၁၄၂ ခုဟာ နယ်မြေအတွင်း ကူးစက်မှုတွေလို့ ဆိုပါတယ်။ ဟောင်ကောင်မှာ ကူးစက်မှုထိန်းချုပ်ရေး နောက်ထပ် ကန့်သတ်ချက်တွေဟာ ဗုဒ္ဓဟူးနေ့ (ဇူလိုင် ၂၉ ရက်) မှာ စတင်သက်ရောက်မှာ ဖြစ်ပါတယ်။



"အခြေအနေက အလွန် စိုးရိမ်စရာကောင်းပါတယ်" လို့ ဟောင်ကောင်အစိုးရ တာဝန်ရှိသူ Matthew Cheung က ပြောပါတယ်။ ယခု ကူးစက်ဖြစ်ပွားမှုဟာ ဟောင်ကောင်မှာ ကြုံခဲ့ရသမျှ အပြင်းထန်ဆုံးဖြစ်ကြောင်းလည်း ၎င်းကဆိုပါတယ်။ လတ်တလော ကူးစက်မှုတွေ ပြန်လည် မြင့်တက်လာခြင်းဟာ အများအားဖြင့် လူတွေ mask မတပ်ကြခြင်းကြောင့် ဖြစ်တယ်လို့ ဟောင်ကောင် ကျန်းမာရေးဆိုင်ရာအကြီးအကဲ Sophia Chan ပြီးခဲ့တဲ့ သီတင်းပတ်အတွင်း ကူးစက်မှုထိန်းချုပ်ရေး အစီအမံများကို ကြေညာစဥ်က မှတ်ချက်ပြုခဲ့ပါတယ်။

(Photo: Reuters)

"ဒါက ဟောင်ကောင်အတွက် အရေးအကြီးဆုံး အချိန်ပါ၊ ဟောင်ကောင်သူ ဟောင်ကောင်သားတွေကို သည်းခံကြဖို့နဲ့ တတ်နိုင်သမျှ အိမ်မှာပဲနေကြဖို့ ကျွန်မတို့ မေတ္တာရပ်ခံပါတယ်" လို့ Sophia Chan က ပြောပါတယ်။ ဟောင်ကောင်မှာ ဇန်နဝါရီလနှောင်းပိုင်းမှစပြီး လက်ရှိအချိန်အထိ လူ ၂,၆၀၀ ကျော်မှာ COVID-19 ကူးစက်မှုတွေ့ရပြီး သေဆုံးသူ ၂၀ ဦးရှိခဲ့ကြောင်း သိရပါတယ်။


ဆက်စပ်အကြောင်းအရာများ



က္က