အမေရိကန်သမ္မတ ဒေါ်နယ်ထရန့်က ဒီမိုကရေစီလိုလားတဲ့ ဟောင်ကောင်ဆန္ဒပြသူတွေကိုထောက်ခံတဲ့ ဥပဒေမူကြမ်းကို လက်မှတ်ရေးထိုး အတည်ပြုလိုက်ရာ တရုတ်အစိုးရထံမှ ဒေါသတကြီး ကန့်ကွက်ပြောဆိုမှုတွေ ထွက်ပေါ်လာပါတယ်။

(Photo: White House/AP)

ထိုအက်ဥပဒေကို အမေရိကန်လွှတ်တော် နှစ်ရပ်လုံးက အစောပိုင်းမှာ အတည်ပြုထားခဲ့ပြီး ဟောင်ကောင်ရဲ့ ကိုယ်ပိုင်အုပ်ချုပ်ခွင့်ရ အခြေအနေနဲ့ ကမ္ဘာ့ဘဏ္ဍာရေး အချက်အချာအဖြစ် ရပ်တည်နေမှုကို ထိန်းထားနိုင်ရန် ရည်ရွယ်တယ်လို့ ဆိုပါတယ်။ ဒါ့အပြင် လူ့အခွင့်အရေး ချိုးဖောက်မှုတွေအတွက်လည်း ဒဏ်ခတ်ပိတ်ဆို့မှုတွေ ချမှတ်နိုင်ရန် ဥပဒေပ ပြဌာန်းထားကြောင်း Reuters သတင်းမှာ ဖော်ပြထားပါတယ်။

(Photo: AFP)

ထရန့်က ဥပဒေကို လက်မှတ်ရေးထိုး အတည်ပြုလိုက်ပြီးနောက် တရုတ်အစိုးရဘက်မှ ဒေါသတကြီး တုံ့ပြန်ပြောဆိုမှုတွေ ထွက်ပေါ်လာခဲ့ပါတယ်။ အမေရိကန်က ဟောင်ကောင်အရေးမှာ ဆက်လက် ဝင်ရောက်စွက်ဖက်နေပါက တန်ပြန်ဆောင်ရွက်မှုတွေ လုပ်ဆောင်သွားမယ်လို့ တရုတ်နိုင်ငံခြားရေးဝန်ကြီးဌာနက ပြောပါတယ်။ လက်ရှိမှာ အမေရိကန်နဲ့ တရုတ်တို့က ၎င်းတို့နှစ်နိုင်ငံကြား ကုန်သွယ်ရေးစစ်ပွဲကို အဆုံးသတ်နိုင်ရန် ဆွေးနွေးညှိနှိုင်းမှုတွေ လုပ်ဆောင်နေကြရာ ယခုဥပဒေအတည်ပြုမှုက ထိုဆွေးနွေးညှိနှိုင်းမှုအပေါ် သက်ရောက်မှုရှိလာနိုင်ကြောင်း သုံးသပ်ထားကြပါတယ်။

(Photo: New York Tims)

ဆန္ဒပြသူတွေက တရားခံလွှဲပြောင်းရေး ဥပဒေမှုကြမ်း အပြီးတိုင်ရုပ်သိမ်းရေးအပြင် ရဲတပ်ဖွဲ့က ဆန္ဒပြမှုတွေကို နှိမ်နင်းဖြိုခွင်းမှုအပေါ် လွတ်လပ်တဲ့ စုံစမ်းစစ်ဆေးမှုပြလုပ်ရေး အပါအဝင် အချက်ငါးချက်ကို တောင်းဆိုထားခဲ့ပါတယ်။

(Photo: AFP)

လူဦးရေ ၇.၃ သန်းကျော်ရှိတဲ့ ဟောင်ကောင်ကို ၁၉၉၇ ခုနှစ် ဇူလိုင် ၁ ရက်နေ့မှာ ဗြိတိန်နိုင်ငံက တရုတ်နိုင်ငံသို့ ပြန်လည် လွှဲပြောင်းပေးခဲ့ပြီးနောက် 'တစ်နိုင်ငံ စနစ်နှစ်မျိုး' မူဝါဒဖြင့် ဟောင်ကောင်ကို အုပ်ချုပ်နေပါတယ်။ ဗြိတိန်နိုင်ငံ ပြန်လည် လွှဲပြောင်းပေးခဲ့ပြီးနောက် ဟောင်ကောင်ဟာ တရုတ်နိုင်ငံရဲ့ အထူးကိုယ်ပိုင်အုပ်ချုပ်ခွင့်ရ နယ်မြေအဖြစ် ရပ်တည်နေကြောင်း သိရပါတယ်။