အမေရိကန်အစိုးရက တက္ကဆက်ပြည်နယ် ဟူစတန်မြို့ရှိ တရုတ်နိုင်ငံ ကောင်စစ်ဝန်ရုံးကို ၇၂ နာရီအတွင်း ပိတ်ပင်ရန် ယနေ့ (ဇူလိုင် ၂၂ ရက်) ညွှန်ကြားလိုက်ကြောင်း သိရပါတယ်။

(ဧပြီလအတွင်း တွေ့ရသည့် ဟူစတန်မြို့ရှိ တရုတ်ကောင်စစ်ဝန်ရုံး) (Photo: AP)

အမေရိကန်နဲ့ တရုတ်တို့ဟာ ကုန်သွယ်ရေးကိစ္စ၊ ဟောင်ကောင်အရေးနဲ့ COVID-19 ကပ်ရောဂါ အစရှိတဲ့ ကိစ္စရပ်တွေနဲ့ ပတ်သက်ပြီး သဘောထားကွဲလွဲကာ ဆက်ဆံရေး တင်းမာနေခဲ့ပါတယ်။ တရုတ်အစိုးရဘက်ကတော့ အမေရိကန်ရဲ့ လုပ်ရပ်ဟာ နိုင်ငံရေးအရ ရန်စမှုလို့ တုံ့ပြန်ပြောဆိုခဲ့ပါတယ်။ ယခုလုပ်ရပ်ဟာ လက်ခံနိုင်စရာမဟုတ်ကြောင်းနဲ့ မလိုလားအပ်တဲ့ လုပ်ရပ်ဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောခွင့်ရအမျိုးသား Wang Wenbin က ပြောခဲ့ပါတယ်။

(တရုတ်ကောင်စစ်ဝန်ရုံးရှေ့မှ မီးသတ်ကားတစ်စီး) (Photo: AP)

တရုတ်ကောင်စစ်ဝန်ရုံး အဆောက်အအုံဝင်းအတွင်း မည်သူမည်ဝါမှန်း မသိသူတွေက အမှိုက်ပုံးများထဲမှ စာရွက်တွေကို မီးရှို့ခဲ့ပြီးနောက် အမေရိကန်က ကောင်စစ်ဝန်ရုံးကိုပိတ်ရန် ညွှန်ကြားချက်ထွက်ပေါ်လာခဲ့တယ်လို့ BBC သတင်းက ဖော်ပြပါတယ်။ ထိုသို့ မီးရှို့ခဲ့ရာ တရုတ်ကောင်စစ်ဝန်ရုံးသို့ မီးသတ်တပ်ဖွဲ့ ရောက်ရှိလာခဲ့တယ်လို့ ဆိုပါတယ်။ ဟူစတန်မြို့ရှိ တရုတ်ကောင်စစ်ဝန်ရုံးကို အမေရိကန်နဲ့ တရုတ်တို့ကြား သံတမန်ဆက်ဆံရေး စတင်ထူထောင်ခဲ့တဲ့ ၁၉၇၉ ခုနှစ်မှာ စတင်ဖွင့်လှစ်ခဲ့တာ ဖြစ်ပါတယ်။