ဖိလစ်ပိုင်နိုင်ငံတောင်ပိုင်းမှာ ငလျင်တစ်ခုလှုပ်ခတ်ခဲ့ရာ လူ ၅၁ ဦး ဒဏ်ရာရပြီး နေအိမ်နဲ့ခရစ်ယာန်ဘုရားကျောင်းအချို့နဲ့ အခြား အဆောက်အအုံများ ပျက်စီးမှုတွေဖြစ်ပေါ်ခဲ့ကြောင်း ရဲတပ်ဖွဲ့က ပြောပါတယ်။

(Photo: @MovePH/Twitter)

ငလျင်ဗဟိုချက်အနီး မက်ဒရစ်မြို့ငယ်ရှိ ရဲစခန်းမှာ ငလျင်လှုပ်မှုကြောင့် စားပွဲများအောက်ကို ပြေးဝင်ခိုလှုံခဲ့ရကြောင်း၊ စာရွက်စာတမ်းများထည့်ထားတဲ့ ဗီရိုမှန်တံခါးကွဲပြီး တီဗီတစ်လုံး ပြုတ်ကျပျက်စီးခဲ့ကြောင်း ရဲအရာရှိ Wilson Uanite က ပြောပါတယ်။ "လူတွေ သူတို့အိမ်တွေထဲကနေ လမ်းပေါ်ထွက်ပြေးလာတာ မြင်ခဲ့ရတယ်၊ ဒေသခံတွေ ဒဏ်ရာရတာတွေရှိတယ်" လို့ ၎င်းကဖြည့်စွက်ပြောခဲ့ပါတယ်။

(Photo: @MovePH/Twitter)

ငလျင်ကြောင့် မက်ဒရစ်ခရိုင်ဆေးရုံ နံရံတွေမှာ အက်ကွဲကြောင်းများဖြစ်ပေါ်ခဲ့ပြီး လူနာတွေကို ရွှေ့ပြောင်းခဲ့တယ်လို့ သိရပါတယ်။ မက်ဒရစ်မြို့ငယ်ရှိ ကားရပ်နားနေရာဟောင်းတစ်ခု အမိုးပြိုကျမှုဖြစ်ခဲ့ပြီး မီးသတ်ကားနှစ်စီးနဲ့ အခြား ကားသုံးစီး အနည်းငယ်ပျက်စီးခဲ့ပါတယ်။

(Photo: Marianne Dua Ramos)

ငလျင်ကြောင့် ကန်တီလန်မြို့ငယ်လေးရှိ စားသောက်ဆိုင်တစ်ဆိုင် အနီးရှိမြစ်အတွင်း ပြိုကျသွားခဲ့ပါတယ်။ အဆိုပါ မြို့ငယ်ရှိ လူနေအိမ်တွေမှာ ပန်းကန်ပြားများ၊ ဖန်ခွက်များနဲ့ အလှဆင်ထားရှိတဲ့ ကြွေထည်မြေထည်ရုပ်တုများ ပျက်စီးမှုတွေဖြစ်ပေါ်ခဲ့တယ်လို့ ရဲအရာရှိ Johannes Tipon က AFP သတင်းဌာနကို ဖုန်းဖြင့်ပြောကြားပါတယ်။

ငလျင်လှုပ်ခဲ့ရာ ဒေသအတွင်း မက်ဒရစ်မြို့မှ ခြောက်ဦးနဲ့ ကန်တီလန်မြို့မှ မျက်နှာကြတ်အင်္ဂတေ ကွာကျထိမှန်ခံရတဲ့ သားအဖနှစ်ဦး အပါအဝင် လူ ၅၁ ဦး ဒဏ်ရာရခဲ့ကြောင်း ကယ်ဆယ်ရေးဝန်ထမ်းတွေက ပြောပါတယ်။ ဖိလစ်ပိုင်နိုင်ငံဟာ ငလျင်လှုပ်မှုတွေ အဖြစ်များတဲ့ ပစိဖိတ်မီးကွင်းဒေသ (Pacific 'Ring of Fire') မှာတည်ရှိနေပါတယ်။

(Photo: AFP)

ငလျင်အန္တရာယ်ရှိတဲ့ ပစိဖိတ်မီးကွင်းနေရာဟာ ဂျပန်နိုင်ငံမှ အစပြုပြီး အရှေ့တောင်အာရှကိုဖြတ်ကာ ပစိဖိတ် မြစ်ဝှမ်းဒေသတစ်လျှောက်အထိ ဆက်စပ်လျက်ရှိပါတယ်။ ဖိလစ်ပိုင်မှာ လတ်တလော ကာလအတွင်း အင်အားအပြင်းထန်ဆုံး ငလျင်အဖြစ် ယခုနှစ် ဧပြီလအတွင်း ရစ်ချ်တာစကေး ၆.၃ အဆင့်ရှိ ငလျင်တစ်ခု မနီလာမြို့မြောက်ဘက် ဒေသတစ်ခုမှာ လှုပ်ခတ်ခဲ့ပြီး လူ ၁၁ ဦးထက်မနည်း သေဆုံးကာ စူပါမက်ကတ်တစ်ခု ပြိုကျခဲ့ကြောင်းသိရပါတယ်။