ကမ္ဘာလုံးဆိုင်ရာ ကပ်ရောဂါ COVID-19 စတင်တွေ့ရှိခဲ့ရပြီး တစ်ချိန်က ကူးစက်မှုတွေ အဆိုးဆုံး ဖြစ်ပွားခဲ့ရာ ဝူဟန်မြို့မှာ စာသင်ကျောင်းများနဲ့ မူကြိုကျောင်းများ အားလုံးကို လာမယ့် စက်တင်ဘာ ၁ ရက်နေ့မှစပြီး ပြန်လည်ဖွင့်လှစ်သွားတော့မယ်လို့ ဒေသဆိုင်ရာ အာဏာပိုင်တွေ ပြောပါတယ်။

(Photo: Reuters)

ဝူဟန်မြို့ အာဏာပိုင်တွေက ကူးစက်မှုအန္တရာယ် အပြောင်းအလဲရှိလာပါက အွန်လိုင်းစနစ်ဖြင့် ပြန်လည်သင်ကြားရန် အရေးပေါ်အစီအစဥ်တွေကိုလည်း ပြင်ဆင်ထားတယ်လို့ ဆိုပါတယ်။ ကျောင်းသူကျောင်းသားတွေကို ကျောင်းအသွားအပြန် mask တပ်ရန်နဲ့ ဖြစ်နိုင်ပါက အများပြည်သူ သယ်ယူပို့ဆောင်ရေးစနစ်ကို အသုံးမပြုကြရန် တာဝန်ရှိသူတွေက အကြံပြုထားပါတယ်။

(Photo: AFP)

ကျောင်းတွေကိုလည်း COVID-19 ကူးစက်မှုထိန်းချုပ်ရေး ပစ္စည်းကိရိယာများ စုဆောင်းထားရှိရန်နဲ့ ကူးစက်မှုအသစ်တွေအတွက် ကြိုတင်ပြင်ဆင်ရန် လေ့ကျင့်ဇာတ်တိုက်မှုများ လုပ်ဆောင်ထားကြရန် ညွှန်ကြားထားတယ်လို့ ဆိုပါတယ်။ ထို့အတူ ကျောင်းတွေမှာ မလိုအပ်ဘဲ စုဝေးမှုကို ပိတ်ပင်ကန့်သတ်ထားရမှာဖြစ်ပြီး ကျောင်းသူကျောင်းသားတွေရဲ့ အခြေအနေကို ကျန်းမာရေးအာဏာပိုင်များထံသို့ နေ့စဥ် သတင်းပို့ရမယ်လို့ ညွှန်ကြားထားကြောင်း Reuters သတင်းမှာ ဖော်ပြပါတယ်။

(Photo: Reuters)

ဝူဟန်မြို့မှာ COVID-19 ကြောင့် သေဆုံးသူ ၃,၈၆၉ ဦးရှိခဲ့ပြီး တရုတ်နိုင်ငံတစ်ဝန်း စုစုပေါင်း သေဆုံးသူအရေအတွက်ရဲ့ ၈၀ ရာခိုင်နှုန်းအထိ ဖြစ်ပါတယ်။ ဝူဟန်မြို့ဟာ lockdown ရုပ်သိမ်းခဲ့တဲ့ ဧပြီလမှစပြီး တဖြည်းဖြည်းချင်း ပုံမှန်အခြေအ‌နေ ပြန်ဖြစ်လာခဲ့ပါတယ်။

ဝူဟန်မြို့မှာ မေ ၁၈ ရက်နောက်ပိုင်း COVID-19 ဒေသတွင်းကူးစက်မှုများ မတွေ့ရှိရတော့ဘူးလို့ ဆိုပါတယ်။ တရုတ်နိုင်ငံမှာ လက်ရှိအချိန်အထိ COVID-19 ကူးစက်ခံရသူ ၈၅,၀၂၂ ဦး၊ သေဆုံးသူ ၄,၆၃၄ ဦးနဲ့ ပြန်လည်သက်သာသူ ၈၀,၁၂၆ ဦးရှိခဲ့ကြောင်း သိရပါတယ်။