ကမ္ဘာတစ်ဝန်း COVID-19 ကူးစက်ခံရသူ အရေအတွက်ဟာ ယနေ့ (ဩဂုတ် ၂ ရက်) မနက်အစောပိုင်းမှာ ၁၈ သန်းကျော်လွန်လာခဲ့ကြောင်း ကမ္ဘာ့နိုင်ငံအသီးသီးရဲ့ COVID-19 ဖြစ်ပွားမှုအခြေအနေ ကိန်းဂဏန်းတွေကို အချိန်နဲ့တစ်ပြေးညီ ဖော်ပြနေတဲ့ Worldometers ဝက်ဘ်ဆိုက်မှာ ဖော်ပြထားပါတယ်။

(Image: Worldometers webpage screengrab)

လက်ရှိအချိန်အထိ COVID-19 ကြောင့် ကမ္ဘာတစ်ဝန်းမှာ လူဦးရေ ၆၈၈,၀၀၀ ကျော် သေဆုံးခဲ့ပြီး ၁၁.၃ သန်းကျော် ပြန်လည်သက်သာခဲ့ပါတယ်။ ပြီးခဲ့တဲ့ ဇူလိုင် ၂၉ ရက် ညသန်းခေါင်မှာ ကူးစက်ခံရသူ ၁၇ သန်းကျော်လွန်ခဲ့တာဖြစ်ပြီး ၃ ရက်ကျော်ရုံမျှ အချိန်အတွင်းမှာ နောက်ထပ် ကူးစက်ခံရသူ ၁ သန်းကျော် တိုးလာခဲ့ပါတယ်။

(Photo: Reuters)

COVID-19 ကြောင့် သေဆုံးသူအရေအတွက်ဟာလည်း ဇူလိုင် ၂၉ ရက်နေ့မှာ ၆၇၀,၀၀၀ ကျော်မှ ၃ ရက်ကျော်အတွင်း ၁၈,၀၀၀ ကျော် တိုးလာလခဲ့ပါတယ်။ အမေရိကန်၊ ဘရာဇီး၊ အိန္ဒိယနဲ့ တောင်အာဖရိကတို့မှာ ကူးစက်မှုအသစ်များ သိသိသာသာ မြင့်တက်နေပါတယ်။ တောင်အာဖရိကနိုင်ငံမှာ ကူးစက်ခံရသူ သန်းတစ်ဝက် (၅၀၀,၀၀၀) ကျော်လွန်လာခဲ့ပြီး ပဥ္စမမြောက် ကူးစက်မှုအများဆုံး နိုင်ငံဖြစ်နေပါတယ်။

(Photo: EPA)

COVID-19 ကြောင့် သေဆုံးမှုအများဆုံး ငါးနိုင်ငံအဖြစ် အမေရိကန်မှာ လူ ၁၅၇,၀၀၀ ကျော်၊ ဘရာဇီးမှာ ၉၃,၀၀၀ ကျော်၊ မက္ကစီကိုမှာ ၄၇,၀၀၀ ကျော်၊ ဗြိတိန်မှာ ၄၆,၀၀၀ ကျော်နဲ့ အိန္ဒိယမှာ ၃၇,၀၀၀ ကျော် သေဆုံးခဲ့ကြောင်း သိရပါတယ်။ ကမ္ဘာတစ်ဝန်းမှာလည်း COVID-19 ကူးစက်မှုတွေ ပြန်လည်မြင့်တက်လာမှုကြောင့် နိုင်ငံအများအပြားမှာ ထိန်းချုပ်ရေးအတွက် lockdown အစီအမံများ ပြန်လည်သတ်မှတ်မှုတွေ ရှိလာပါတယ်။

အာရှဒေသမှ ဂျပန်နိုင်ငံ အိုကီနာဝါစီရင်စုမှာ ကူးစက်မှုတွေ မြင့်တက်နေတာကြောင့် အရေးပေါ်အခြေအနေ သတ်မှတ်ကြေညာထားပါတယ်။ ဂျပန်အစိုးရက တိုကျိုမှာလည်း ကူးစက်မှုအခြေအနေ ပိုဆိုးလာပါက အရေးပေါ်အခြေအနေ ကြေညာသွားမယ်လို့ ဆိုပါတယ်။ ဟောင်ကောင်မှာလည်း ကူးစက်မှုတွေ မြင့်တက်နေတာကြောင့် စက်တင်ဘာ ၆ ရက်မှာ ကျင်းပပြုလုပ်ရန် စီစဥ်ထားတဲ့ လွှတ်တော်ရွေးကောက်ပွဲကို တစ်နှစ်ကြာ ရွှေ့ဆိုင်းလိုက်ပါတယ်။

(Photo: Reuters)

ကူးစက်မှုတွေ ပြန်မြင့်တက်လာတဲ့ ဩစတြေးလျနိုင်ငံမှာတော့ ဇူလိုင် ၃၀ ရက်နေ့က ထုတ်ပြန်မှုအရ ကူးစက်မှုအသစ်တွေ့ရှိရမှုနဲ့ သေဆုံးမှုများ စံချိန်တင် များပြားခဲ့ကြောင်း သိရပါတယ်။ အရှေ့တောင်အာရှမှ ဗီယက်နမ်နိုင်ငံမှာလည်း အစောပိုင်း COVID-19 ကူးစက်မှုတွေကို ထိန်းချုပ်နိုင်ခဲ့ပေမဲ့ လတ်တလောအတွင်း ဒါနန်းမြို့မှာ ကူးစက်မှုတွေ ပြန်တွေ့လာခဲ့ရပြီး ပထမဆုံး သေဆုံးမှုလည်းရှိလာခဲ့ပါတယ်။

COVID-19 ကူးစက်ဖြစ်ပွားမှုဟာ တစ်ကမ္ဘာလုံးအတိုင်းအတာအရ နှေးကွေးသွားတဲ့ လက္ခဏာမရှိသေးပါဘူး။ COVID-19 ကပ်ရောဂါဟာ ကမ္ဘာ့ကျန်းမာရေးအဖွဲ့အစည်း (World Health Organization - WHO) ရင်ဆိုင်ခဲ့ရတဲ့ အဆိုးဆုံး ကမ္ဘာလုံးဆိုင်ရာ ကျန်းမာရေးအရေးပေါ်အခြေအနေဖြစ်ကြောင်း WHO အကြီးအကဲ Tedros Adhanom Ghebreyesus က ဇူလိုင် ၂၇ ရက်မှာ ပြောခဲ့ပါတယ်။ ဒါ့အပြင် COVID-19 ကပ်ရောဂါ ကူးစက်ဖြစ်ပွားမှုဟာ ကာလရှည်ကြာနိုင်ဖွယ်ရှိကြောင်း WHO က ဩဂုတ် ၁ ရက်နေ့မှာ သတိပေးခဲ့ပါတယ်။

(Image: MoHS COVID-19 Dashboard screengrab)

WHO ရဲ့ အရေးပေါ်ကော်မတီက ကပ်ရောဂါအခြေအနေကို တွက်ဆသုံးသပ်ရန် အစည်းအဝေးတစ်ရပ် ပြုလုပ်ခဲ့ပြီးနောက် ကူးစက်ဖြစ်ပွားမှု ကာလရှည်ကြာနိုင်ဖွယ်ရှိကြောင်း WHO က သတိပေးလိုက်တာလည်း ဖြစ်ပါတယ်။ အရှေ့တောင်အာရှဒေသမှာလည်း COVID-19 ကူးစက်မှုနဲ့ သေဆုံးမှုတွေ နေ့စဥ် တိုးလာနေဆဲဖြစ်ပြီး အင်ဒိုနီးရှားနဲ့ ဖိလစ်ပိုင်ဟာ ဒေသတွင်း ကူးစက်မှုနဲ့ သေဆုံးမှု အများဆုံးနိုင်ငံတွေ ဖြစ်ပါတယ်။

မြန်မာနိုင်ငံမှာ ကျန်းမာရေးနဲ့အားကစား ဝန်ကြီးဌာနက ဩဂုတ် ၂ ရက် မနက် ၈ နာရီအချိန်အထိ နောက်ဆုံး ထုတ်ပြန်ထားမှုအရ COVID-19 အတည်ပြုလူနာ ၃၅၃ ဦး စစ်ဆေးတွေ့ရှိခဲ့ရပြီး ၂၉၇ ဦး ပြန်လည်သက်သာခဲ့ကာ ၆ ဦး သေဆုံးခဲ့ကြောင်း သိရပါတယ်။ ဩဂုတ် ၂ ရက် မနက်ပိုင်းအထိ မြန်မာနိုင်ငံမှာ လူဦးရေ ၁၁၇,၂၁၉ ဦးကို COVID-19 စစ်ဆေးခဲ့ကြောင်းနဲ့ စောင့်ကြည့်လူနာ ၆,၈၀၂ ဦးရှိကြောင်းလည်း ကျန်းမာရေးနဲ့အားကစား ဝန်ကြီးဌာရဲ့ ဝက်ဘ်ဆိုက်မှာ ဖော်ပြထားပါတယ်။