မြောက်ကိုရီးယားခေါင်းဆောင် ကင်မ်ဂျုံအန်ရဲ့ ကျန်းမာရေးနဲ့ပတ်သက်ပြီး ထွက်ပေါ်နေခဲ့တဲ့ ကောလာဟလတွေဟာ အခြေအမြစ်မရှိကြောင်းနဲ့ ၎င်းဟာ နှလုံးခွဲစိတ်ကုသမှု ခံယူခဲ့ရတဲ့ အရိပ်လက္ခဏာများ မရှိကြောင်း တောင်ကိုရီးယား ထောက်လှမ်းရေးအေဂျင်စီက ပြောကြားလိုက်ပါတယ်။

(ဓာတ်မြေဩဇာစက်ရုံမှာ တွေ့ရသည့် ကင်မ်ဂျုံအန်) (Photo: KCNA)

ထိုသို့ လူအများမြင်ကွင်းမှ ပျောက်ကွယ်နေတဲ့ ကင်မ်ဂျုံအန်ဟာ အသည်းအသန် နေမကောင်းဖြစ်နေကြောင်း သို့မဟုတ် သေဆုံးသွားပြီဖြစ်ကြောင်း သတင်းအချို့က ဖော်ပြခဲ့ကြပါတယ်။ သို့သော် နောက်ပိုင်းမှာတော့ ကင်မ်ဂျုံအန်က ဓာတ်မြေဩဇာစက်ရုံဖွင့်ပွဲကို တက်ရောက်ခဲ့မှုနဲ့အတူ လူအများမြင်ကွင်းမှာ ပြန်လည်ထွက်ပေါ်လာခဲ့ပြီး ကျန်းမာရေးကောင်းနေပုံရှိတာ တွေ့ခဲ့ရပါတယ်။

(ဓာတ်မြေဩဇာစက်ရုံ ဖွင့်ပွဲအခမ်းအနားပုံရိပ်များ) (Photo: KCNA)

တောင်ကိုရီးယား ထောက်လှမ်းရေးအေဂျင်စီ အကြီးအကဲ Suh Hoon က လွှတ်တော်ကော်မတီမှာ ယမန်နေ့ (မေ ၆ ရက်) ကကင်မ်ဂျုံအန်နဲ့ ပတ်သက်ပြီး ရှင်းလင်းပြောကြားခဲ့ကြောင်း Yonhap သတင်းဌာနက ဖော်ပြပါတယ်။ ကင်မ်ဂျုံအန်ရဲ့ ကျန်းမာရေးနဲ့ပတ်သက်တဲ့ ကောလာဟလတွေဟာ မှန်ကန်ခဲ့ကြောင်း အရိပ်လက္ခဏာမရှိဘူးလို့ Suh Hoon က ပြောခဲ့တယ်လို့ Yonhap က ဆိုပါတယ်။ Suh Hoon က လွှတ်တော်ကော်မတီကို ပြောကြားမှုအရ ကင်မ်ဂျုံအန်ဟာ ယခုနှစ်အတွင်း လူအများမြင်ကွင်းမှာ ၁၇ ကြိမ် ထွက်ပေါ်ခဲ့ပြီးဖြစ်ကြောင်း သိရပါတယ်။

(ဓာတ်မြေဩဇာစက်ရုံ ဖွင့်ပွဲအခမ်းအနားပုံရိပ်များ) (Photo: KCNA)

"မြောက်ကိုရီးယားမှာ COVID-19 ဖြစ်ပွားမှု မရှိဘူးလို့ မပြောနိုင်ပါဘူး၊ ကင်မ်ဂျုံအန်က စစ်တပ်နဲ့ ပါတီအစည်းအဝေးတွေကဲ့သို့ ပြည်တွင်းကိစ္စတွေကို အဓိက အာရုံစိုက်နေခဲ့ပြီး ကိုရိုနာဗိုင်းရပ်စ် စိုးရိမ်ပူပန်မှုတွေကြောင့် လူအများမြင်ကွင်းမှာ သွားလာလှုပ်ရှားတာတွေကို နောက်ထပ် ကန့်သတ်ထားခဲ့တယ်" လို့ တောင်ကိုရီးယား လွှတ်တော်အမတ် Kim Byung-kee က သုံးသပ်ခဲ့ပါတယ်။

(၂၀၁၄ ခုနှစ်မှာတွေ့ရသည့် ကင်မ်ဂျုံအန်) (Photo: AFP)

မြောက်ကိုရီးယားခေါင်းဆောင် ကင်မ်ဂျုံအန်ဟာ ၂၀၁၄ ခုနှစ်ကလည်း လူအများမြင်ကွင်းမှ သီတင်းခြောက်ပတ်နီးပါးကြာ ပျောက်ကွယ်နေခဲ့ပြီးနောက် တုတ်ကောက်တစ်ချောင်းနဲ့အတူ ပြန်လည်ထွက်ပေါ်လာခဲ့ပါတယ်။ ထို့နောက် ရက်ပိုင်းအကြာမှာတော့ ကင်မ်ဂျုံအန် လူအများမြင်ကွင်းမှ ပျောက်ကွယ်နေခဲ့ခြင်းဟာ ၎င်းရဲ့ ခြေကျင်းဝတ်မှ အကျိတ်တစ်ခုကို ခွဲစိတ်ဖယ်ရှားခဲ့တာကြောင့်ဖြစ်ကြောင်း တောင်ကိုရီးယားထောက်လှမ်းရေးက ပြောခဲ့ကြောင်း AFP သတင်းမှာ ဖော်ပြပါတယ်။