ကနေဒါနိုင်ငံက သူမကို ခိုလှုံခွင့်ပေးခဲ့ပါတယ်

မိသားစုထံကနေ ထွက်ပြေးလာပြီးနောက် ထိုင်းနိုင်ငံ ဘန်ကောက်မြို့ရှိ လေဆိပ်တစ်ခုမှာ သောင်တင်နေခဲ့တဲ့ ဆယ်ကျော်သက် မိန်းကလေးဟာ သူမကို ခိုလှုံခွင့်ပေးလိုက်တဲ့ ကနေဒါနိုင်ငံသို့ ရောက်ရှိသွားပြီဖြစ်ပါတယ်။

(မိသားစုထံမှ ထွက်ပြေးလာသည့် ရာဟက်ဖ်) (Photo: UNHCR)

အသက် ၁၈ နှစ်အရွယ် ရာဟက်ဖ်မိုဟမ်မက် အယ်လ်ကူနန်က ဘန်ကောက်မှတစ်ဆင့် သြစတြေးလျနိုင်ငံသွားရန် ကြိုးစားခဲ့ပေမဲ့ ကနဦးမှာ တာဝန်ရှိသူတွေက သူမကို ကူဝိတ်နိုင်ငံသို့သွားရန် ပြောခဲ့တယ်လို့ဆိုပါတယ်။ ကူဝိတ်မှာ ရာဟက်ဖ်ရဲ့မိသားစုက သူမကို စောင့်ဆိုင်းနေကြတယ်လို့ သိရပါတယ်။



ရာဟက်ဖ်က ကူဝိတ်ကိုသွားရန် ငြင်းဆန်ခဲ့ပြီးနောက် လေဆိပ်ဟိုတယ်ခန်းထဲမှာ သော့ပိတ်နေခဲ့ရာ နိုင်ငံတကာက အာရုံစိုက်ခံရသူ ဖြစ်လာခဲ့ပါတယ်။ ရာဟက်ဖ်က အစ္စလာမ်ဘာသာကို စွန့်လွှတ်ခဲ့တယ်လို့ ပြောခဲ့ပါတယ်။ အစ္စလာမ်ဘာသာကို စွန့်လွှတ်မှုဟာ ရာဟက်ဖ်နေထိုင်ရာ ဆော်ဒီအာရေဗီးယားနိုင်ငံမှာ သေဒဏ်အပြစ်ပေးခံမယ့် လုပ်ရပ်လည်းဖြစ်ပါတယ်။






ကနေဒါကိုရောက်ရှိခြင်း

ဆယ်ကျော်သက်မိန်းကလေး ရာဟက်ဖ်က ကိုရီးယားလေကြောင်းလိုင်း (Korean Air) လေယာဉ်ဖြင့် ဆိုးလ်မြို့ကနေတစ်ဆင့် ကနေဒါနိုင်ငံ တိုရွန်တိုမြို့ရှိ Pearson အပြည်ပြည်ဆိုင်ရာလေဆိပ်ကို ဇန်နဝါရီ ၁၂ ရက်မှာ ရောက်ရှိလာခဲ့ပါတယ်။ ရာဟက်ဖ်က လေယာဉ်ပေါ်မှ သူမရဲ့ဓာတ်ပုံတွေကို Twitter မှာတင်ခဲ့ပြီး 'ငါလုပ်နိုင်ခဲ့ပြီ' လို့ ရေးသားထားပါတယ်။ 

ကနေဒါကိုရောက်ရှိလာတဲ့ ရာဟက်ဖ်ကို နိုင်ငံခြားရေးဝန်ကြီး ခရိုင်စီယာ ဖရီးလန်းဒ်က 'အလွန်သတ္တိရှိတဲ့ ကနေဒါနိုင်ငံသားအသစ်' လို့ ရည်ညွှန်းမိတ်ဆက်ခဲ့ပါတယ်။

(ကနေဒါကိုရောက်ရှိလာသည့် ရာဟက်ဖ်) (Photo: Carlos Osorio/Reuters)

ရာဟက်ဖ်ဟာ အခက်အခဲတွေနဲ့ ခရီးရှည်ကို ဖြတ်သန်းလာခဲ့ရတာကြောင့် ပင်ပန်းနေပြီဖြစ်ပြီး ယနေ့မှာတော့ သူမအနေနဲ့ တစ်စုံတစ်ရာ ပြောကြားသွားမှာမဟုတ်ကြောင်းလည်း ကနေဒါနိုင်ငံခြားရေးဝန်ကြီးက ဆိုပါတယ်။ "သူမက အလွန်သတ္တိရှိတဲ့ မိန်းကလေးငယ်တစ်ယောက်ပါ၊ အများကြီးဖြတ်သန်းခဲ့ပါတယ်၊ အခုတော့ သူမရဲ့ အိမ်အသစ်ကိုသွားနေပါပြီ" လို့လည်း နိုင်ငံခြားရေးဝန်ကြီးက ဖြည့်စွက်ပြောပါတယ်။

ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ရာဟက်ဖ်နဲ့ပတ်သက်ပြီး ခိုလှုံခွင့်ပေးရန် တောင်းဆိုခဲ့ကြောင်း အစောပိုင်းမှာ ကနေဒါဝန်ကြီးချုပ် ဂျက်စတင်ထရူဒီက ပြောထားခဲ့ပါတယ်။ "ကနေဒါက လူ့အခွင့်အရေးတွေနဲ့ အမျိုးသမီးအခွင့်အရေးတွေအတွက် အမြဲတမ်း ရပ်တည်သွားမယ်ဆိုတာ ရှင်းပါတယ်" လို့ ကနေဒါဝန်ကြီးချုပ်က ဆိုပါတယ်။

(ကနေဒါဝန်ကြီးချုပ် ဂျက်စတင်ထရူဒီ) (Photo: AFP)

ရာဟက်ဖ် ဖွင့်ဟခဲ့တဲ့ သူမရဲ့အကြောင်း

ရာဟက်ဖ်ဟာ သူမရဲ့မိသားစု သူမကိုသတ်မှာစိုးရိမ်တာကြောင့် ထွက်ပြေးလာခဲ့တယ်လို့ အစောပိုင်းမှာ BBC သတင်းဌာနကို ပြောခဲ့ပါတယ်။ "ကျွန်မရဲ့နိုင်ငံမှာ ကျွန်မ စာမသင်နိုင်ဘူး အလုပ်မလုပ်နိုင်ဘူး၊ ဒါကြောင့် ကျွန်မ လွတ်လပ်ချင်တယ်၊ ပြီးတော့ စာသင်ချင်တယ် အလုပ်လုပ်ချင်တယ်" လို့ ရာဟက်ဖ်က ဆိုပါတယ်။

ဒါ့အပြင် AFP သတင်းဌာနဲ့ တွေ့ဆုံရာမှာလည်း သူမရဲ့ဆံပင်ညှပ်လိုက်တဲ့အတွက် မိသားစုက သူမကို အခန်းထဲမှာ ခြောက်လကြာ သော့ပိတ်ထားခဲ့မှု အပါအဝင် စိတ်ရောကိုယ်ပါ နှိပ်စက်မှုတွေလုပ်ခဲ့တယ်လို့လည်း ရာဟက်ဖ်က ဖွင့်ဟခဲ့ပါတယ်။ ရာဟက်ဖ်မိသားစုရဲ့ ပြောရေးဆိုခွင့်ရှိသူကတော့ ယခုဖြစ်ရပ်နဲ့ပတ်သက်ပြီး မှတ်ချက်မပေးလိုကြောင်းနဲ့ ၎င်းတို့အနေနဲ့ မိန်းကလေးငယ်ရဲ့ ဘေးကင်းလုံခြုံမှုကိုသာ ဂရုစိုက်ကြောင်း ပြောခဲ့ပါတယ်။ 

(ကနေဒါမှာ ခိုလှုံခွင့်ရခဲ့သည့် ရာဟက်ဖ်) (Photo: Rahaf's Twitter)

ဆယ်ကျော်သက်မိန်းကလေး ရာဟက်ဖ်ဟာ မိသားစုနဲ့အတူ ကူဝိတ်ကို ခရီးထွက်လာခဲ့စဉ်အတွင်း ထိုင်းနိုင်ငံ ဘန်ကောက်မြို့ကို လေယာဉ်ဖြင့်ထွက်ပြေးလာခဲ့တာ ဖြစ်ပါတယ်။ သူမက ဘန်ကောက်ကနေ သြစတြေးလျကို ဆက်လက်သွားရောက်ရန် ရည်ရွယ်ထားခဲ့ပြီး ဗီဇာလည်းရှိခဲ့တယ်လို့ ဆိုပါတယ်။

သို့သော် ဘန်ကောက်ကိုရောက်ရှိစဉ် ဆော်ဒီသံတမန်တစ်ဦးက သူမရဲ့ပတ်စ်ပို့ကို သိမ်းယူသွားခဲ့ရာမှ လေဆိပ်မှာသောင်တင်နေခဲ့ကြောင်း သိရပါတယ်။ ဘန်ကောက်မှာရှိတဲ့ ဆော်ဒီသံရုံးက ယခုကိစ္စမှာ ဆော်ဒီအစိုးရက ပါဝင်ပတ်သက်မှုမရှိကြောင်း ငြင်းဆိုခဲ့ပြီး နောက်ပိုင်းမှာတော့ ရာဟက်ဖ်ရဲ့ပတ်စ်ပို့ကို ပြန်ပေးခဲ့ပါတယ်။




(ထိုင်းနိုင်ငံ သုဝဏ္ဏဘူမိလေဆိပ်မှာ တွေ့ရသည့် ရာဟက်ဖ်) (Photo: AFP)

ရာဟက်ဖ်ဖြစ်ရပ်နဲ့ ပတ်သက်ပြီး ထိုင်းအာဏာပိုင်တွေက မိသားစုပြဿနာဖြစ်ကြောင်းနဲ့ သူမကို ကူဝိတ်သို့ပြန်စေလွှတ်မယ်လို့ အစောပိုင်းမှာ ပြောခဲ့ကြပါတယ်။ ထို့နောက် ရာဟက်ဖ်က သူမကို အကူအညီပေးကြရန် Twitter မှာ ဆက်တိုက် ရေးသားတောင်းဆိုခဲ့ရာမှ လူ့အခွင့်အရေးစောင့်ကြည့်အဖွဲ့နဲ့ သတင်းသမားတွေက ယခုဖြစ်ရပ်ကို သိရှိသွားခဲ့ကြပါတယ်။ နောက်ပိုင်းမှာတော့ ထိုင်းအာဏာပိုင်တွေက ရာဟက်ဖ်ကို ဘန်ကောက်မှာနေခွင့်ပေးခဲ့ပြီး ကုလသမဂ္ဂက သူမရဲ့ ခိုလှုံခွင့်တောင်းခံမှုကို လက်ခံလိုက်တာဖြစ်ပါတယ်။



ဆက်စပ်အကြောင်းအရာများ



က္က