Ko John

မက္ကစီကိုနိုင်ငံ ဂူအာဒါလာဂျာရာ (Guadalajara) မြို့မှာ မကြုံစဖူး ထူးထူးခြားခြား မိုးသီးမုန်တိုင် ကျရောက်မှုကြောင့် မြို့ခံများ အံ့သြတုန်လှုပ်ခဲ့ကြပြီး ခြောက်ပေခွဲအထိနက်တဲ့ မိုးသီးထုများ ဖုံးလွှမ်းသွားမှုကြောင့် ကားများ မောင်းနှင်မရဘဲ ပိတ်မိနေခဲ့ကြောင်း သိရပါတယ်။

(Photo: AFP)

မိုးသီးထုဟာ ကားများ ကိုယ်ထည်တစ်ဝက် နစ်မြုပ်တဲ့အထိ ဖြစ်ခဲ့တယ်လို့ဆိုပါတယ်။ မက္ကစီကိုရဲ့ လူဦးရေအထူထပ်ဆုံး မြို့တစ်မြို့ဖြစ်တဲ့ ဂူအာဒါလာဂျရာမြို့မှာ ယမန်နေ့ (ဇွန် ၃၀ ရက်) က ထူးထူးခြားခြား မိုးသီးမုန်တိုင်း ကျရောက်ခဲ့တာဖြစ်ပါတယ်။

"ဂူအာဒါလာဂျာရာမှာ ဒီလိုမြင်ကွင်းမျိုးတွေ ကျွန်တော် တစ်ခါမျှ မမြင်ဖူးဘူး၊ ရာသီဥတုပြောင်းလဲမှုက အမှန်တစ်ကယ်ပဲလားလို့ ကျွန်တော်တို့ ကိုယ့်ကိုယ်ကိုယ် ပြန်မေးမိတယ်၊ ဒါတွေက အရင်က တစ်ခါမျှ မမြင်ခဲ့ဖူးတဲ့ သဘာဝဖြစ်စဉ်တွေပဲ" လို့ ပြည်နယ်အုပ်ချုပ်ရေးမှူး အန်းနရစ်အယ်လ်ဖာရိုက AFP သတင်းဌာနကို ပြောပါတယ်။


(Photo: AFP)

မိုးသီးမုန်တိုင်း ကျရောက်ခဲ့တဲ့ ဂူအာဒါလာဂျာရာမြို့ဟာ မက္ကစီကိုနိုင်ငံ မြောက်ပိုင်းမှာတည်ရှိပြီး လူဦးရေငါးသန်းဝန်းကျင် နေထိုင်ကြပါတယ်။ အဆိုပါမြို့မှာ လတ်တလော ရက်များအတွင်း နွေရာသီအပူချိန် ၃၁ ဒီဂရီဆဲလ်စီးယပ် ဖြစ်နေကြောင်းလည်း သိရပါတယ်။ ဂူအာဒါလာဂျာရာမြို့ရဲ့ ဆင်ခြေဖုံးနေရာ အနည်းဆုံး ခြောက်ခုမှာ ငါးပေမှ ခြောက်ပေခွဲအထိ အနက်ရှိနိုင်တဲ့ မိုးသီးများဖုံးလွှမ်းနေခဲ့ပါတယ်။

(Photo: @HT_IC6/Twitter)

ကလေးတွေက တစ်ဦးနဲ့တစ်ဦး မိုးသီးများဖြင့် ပစ်ပေါက်ဆော့ကစားခဲ့ကြပြီး ပြည်သူ့ကာကွယ်ရေးဌာနနဲ့ စစ်သားတွေက စက်ယန္တရားကြီးများသုံးကာ လမ်းမတွေကို ရှင်းလင်းခဲ့ကြရတယ်လို့ ဆိုပါတယ်။ နေအိမ်နဲ့ စီးပွားရေးလုပ်ငန်းနေရာ ၂၀၀ နီးပါး မိုးသီးများထိမှန်မှုကြောင့် အပျက်အစီးဖြစ်ပေါ်ခဲ့ပြီး ကားအစီးရေ ၅၀ ထက်မနည်း မိုးသီးဖုံးလွှမ်းမှုအတွင်း ပိတ်မိနေခဲ့ကြောင်း သိရပါတယ်။



ဆက်စပ်အကြောင်းအရာများ


Duwun ဒီဂျစ်တယ် နေ့စဉ်သတင်းစာ

သင့် အီးလ်မေး ကနေ နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ ဒီနေရာမှာ စာရင်းသွင်းလိုက်ပါ။


Copyright © 2019 Duwun.

Privacy Policy | About Us | Jobs

က္က