COVID-19 ကူးစက်မှုတွေ မြင့်တက်နေတဲ့ ပြင်သစ်နိုင်ငံမှာ သမ္မတအီမန်နျူရယ်မက်ခရွန်က ကူးစက်မှုထိန်းချုပ်ရန် ပါရီမြို့နဲ့ အခြား မြို့ရှစ်မြို့မှာ ညမထွက်ရအမိန့် ထုတ်ပြန်ကြေညာလိုက်ကြောင်း သိရပါတယ်။

(ပြင်သစ်သမ္မတမက်ခရွန်) (Photo: BBC)

ပြင်သစ်မှာ ညမထွက်ရန်အမိန့် အကျုံးဝင်တဲ့မြို့များမှာ ပါရီ၊ Marseille ၊ Lyon ၊ Lille ၊ Saint-Etienne ၊ Rouen ၊ Toulouse ၊ Grenoble နဲ့ Montpellier တို့ ပါဝင်ပါတယ်။ ညမထွက်ရအမိန့်ဟာ လူဦးရေ ၂၂ သန်းဝန်းကျင်ကို သက်ရောက်မှုရှိပြီး ကနဦးမှာ သီတင်းလေးပတ်ကြာ သတ်မှတ်ထားကြောင်းနဲ့ အစိုးရအနေနဲ့ သီတင်းခြောက်ပတ်သို့ တိုးမြှင့်ရန်စီစဥ်သွားမယ်လို့ ဆိုပါတယ်။

(Photo: AFP)

ညမထွက်ရ စီမံဆောင်ရွက်ချက်အရ ညနေပိုင်းနဲ့ ညပိုင်းမှာ စားသောက်ဆိုင်သွားရောက်မှုနဲ့ စုရုံးမှုတွေ ရပ်တန့်သွားစေမယ်လို့ ပြင်သစ်သမ္မတမက်ခရွန်က ရှင်းပြပါတယ်။ ညမထွက်ရအမိန့် သတ်မှတ်ထားချိန်အတွင်း နေအိမ်ပြင်ပထွက်ပါက မှန်ကန်ဆီလျော်တဲ့ အကြောင်းပြချက်လိုအပ်ကြောင်းလည်း သမ္မတက ပြောပါတယ်။

(Photo: Reuters)

ထိုမြို့တွေမှာ အိမ်ရာအဆောက်အအုံထဲမှာ လူခြောက်ဦးထက်ပိုတဲ့ စုရုံးမှုတွေကို တားမြစ်ထားပြီး ကြီးမားတဲ့ မိသားစုတွေကတော့ ချွင်းချက်ဖြစ်ကြောင်း မက်ခရွန်က ရှင်းပြပါတယ်။ ပြင်သစ်မှာ အောက်တိုဘာ ၁၄ ရက် ထုတ်ပြန်မှုအရ COVID-19 ကူးစက်ခံရသူ နောက်ထပ် ၂၂,၉၅၁ ဦး တိုးလာခဲ့ပြီး စုစုပေါင်း ကူးစက်ခံရသူ ၇၇၉,၀၀၀ ကျော်နဲ့ သေဆုံးသူ ၃၃,၀၀၀ ကျော်ရှိလာပါတယ်။ 

အခြား ဥရောပနိုင်ငံအချို့ အခြေအနေ

ဂျာမနီမှာ ယနေ့ (အောက်တိုဘာ ၁၅ ရက်) မှာလည်း ကူးစက်ခံရသူ ၆,၆၃၈ ဦး တိုးလာခဲ့ပြီး COVID-19 ကပ်ရောဂါ စတင်ခဲ့ချိန်နောက်ပိုင်း နေ့အလိုက် ကူးစက်မှုအများဆုံးအဖြစ် နောက်ထပ် စံချိန်တင်ခဲ့ကြောင်း သိရပါတယ်။ ဂျာမနီမှာ တင်းကျပ်လိုက်တဲ့ စည်းမျဥ်းသစ်တွေအရ လူ ၁၀၀,၀၀၀ မှာ ကူးစက်ခံရသူ ၅၀ ကျော်တဲ့ နယ်မြေတွေမှာရှိတဲ့ ဘားဆိုင်နဲ့ စားသောက်ဆိုင်များဟာ ည ၁၁ နာရီမှာ ပိတ်ရမှာဖြစ်ပါတယ်။ ထို့အတူ စုရုံးတွေ့ဆုံမှုတွေကိုလည်း မိသားစု နှစ်ခုမှ လူ ၁၀ ဦးအထိသာ ကန့်သတ်ထားမယ်လို့ ဆိုပါတယ်။ 

ဥရောပမှာ လတ်တလောအတွင်း COVID-19 ကူးစက်မှုဒုတိယလှိုင်းကို ရင်ဆိုင်နေရပြီး အစိုးရတွေက ကူးစက်မှုထိန်းချုပ်ရေး ပိတ်ပင်ကန့်သတ်ချက်အသစ်များ ထုတ်ပြန်ဆောင်ရွက်နေကြရပါတယ်။ နယ်သာလန်မှာလည်း lockdown သတ်မှတ်ထားပြီး ကော်ဖီဆိုင်တွေနဲ့ စားသောက်ဆိုင်တွေ ပိတ်ထားကြောင်း သိရပါတယ်။

(Photo: Reuters)

အစောပိုင်းမှာ စပိန်အရှေ့မြောက်ပိုင်း ကတ်တလိုနီးယားနယ်မြေမှာ ဘားဆိုင်နဲ့ စားသောက်ဆိုင်တွေကို အောက်တိုဘာ ၁၅ ရက်နေ့မှစပြီး ၁၅ ရက်ကြာ ပိတ်ထားရန် ညွှန်ကြားချက်ထုတ်ခဲ့ပါတယ်။ ထို့အတူ ချက်ရီပတ်ဘလစ်နိုင်ငံမှာလည်း စာသင်ကျောင်းတွေနဲ့ ဘားဆိုင်တွေ ပိတ်ထားစေခဲ့ပါတယ်။ ချက်ရီပတ်ဘလစ်ဟာ ပြီးခဲ့တဲ့ သီတင်းနှစ်ပတ်မှာ ဥရောပဒေသတွင်း COVID-19 ကူးစက်မှုနှုန်း အမြင့်ဆုံးဖြစ်ခဲ့ရာ လူ ၁၀၀,၀၀၀ လျှင် ကူးစက်မှု ၅၈၁.၃ ဦးရှိခဲ့ပါတယ်။

အိုင်ယာလန်နိုင်ငံကလည်း အောက်တိုဘာ ၁၅ ရက် ညပိုင်းမှစပြီး မိသားစုများ အလည်အပတ်ထွက်မှုကို တားမြစ်လိုက်ပါတယ်။ ဥရောပရှိ အီတလီ၊ ပေါ်တူဂီ၊ ပိုလန်၊ ဘယ်လ်ဂျီယံ နိုင်ငံတွေမှာလည်း ကူးစက်မှုနဲ့ သေဆုံးမှုများ သိသိသာသာ မြင့်တက်နေခဲ့ရာ အစိုးရတွေက ပိတ်ပင်ကန့်သတ်ချက်အသစ်များ ထုတ်ပြန်ဆောင်ရွက်နေကြကြောင်း သိရပါတယ်။

.