ကျန်းမာရေးကောင်းမွန်ပြီး မိမိသဘောဆန္ဒအလျောက် ဗိုင်းရပ်စ်ကူးခံမယ့်သူတွေကို စုဆောင်းနေပါတယ်။
Ko John

ဗြိတိန်နိုင်ငံမှ သုတေသီတွေက လူတွေမှာ COVID-19 ရောဂါဖြစ်လာစေတဲ့ ဗိုင်းရပ်စ်ပမာဏကို သိရှိနိုင်ရေး ကျန်းမာရေးကောင်းမွန်ပြီး မိမိသဘောဆန္ဒအလျောက် စေတနာ့ဝန်ထမ်း လုပ်မယ့်သူတွေထံ ကိုရိုနာဗိုင်းရပ်စ် (SARS-CoV-2) ကူးစက်စေပြီး လေ့လာဆန်းစစ်သွားရန် မျှော်လင့်ထားတယ်လို့ အောက်တိုဘာ ၂၀ ရက်နေ့မှာ ပြောပါတယ်။

(Photo: Reuters)

Imperial College London က ပူးပေါင်းပါဝင်တဲ့ Human Challenge Programme ခေါ် ထိုလေ့လာမှုအစီအစဥ်က ကိုရိုနာဗိုင်းရပ်စ် ကူးစက်ပျံ့နှံ့မှုကို လျှော့ချရန်၊ ၎င်းရဲ့သက်ရောက်မှုနဲ့ သေဆုံးမှုကို လျော့နည်းစေရန် ကူညီနိုင်မယ်လို့ မျှော်လင့်ထားကြပါတယ်။ သုတေသီတွေက ကမ္ဘာ့ပထမဆုံးလို့ ပြောထားတဲ့ ထိုအစီအစဥ်ရဲ့ ပထမအဆင့်မှာ ကျန်းမာရေးကောင်းမွန်တဲ့ စေတနာ့ဝန်ထမ်းတွေကို SAR-CoV-2 ကူးစက်နိုင်ခြေအပေါ် လေ့လာဆန်းစစ်သွားမယ်လို့ ဆိုပါတယ်။

ကနဦးအဆင့် ရည်ရွယ်ချက်က လူတစ်ဦးကို COVID-19 ဖြစ်စေနိုင်တဲ့ အနည်းဆုံး ဗိုင်းရပ်စ်ပမာဏကို ဖော်ထုတ်သိရှိနိုင်ဖို့ ဖြစ်ပါတယ်

၎င်းတို့က အသက် ၁၈ နဲ့ ၃၀ နှစ်ကြားအရွယ် နှလုံးရောဂါ၊ ဆီးချို သို့မဟုတ် အဝလွန်ရောဂါကဲ့သို့ ကျန်းမာရေးပြဿနာမရှိထားဘဲ လေ့လာမှုအစီအစဥ်မှာ မိမိသဘောဆန္ဒအလျောက် ပါဝင်ကြမယ့် စေတနာ့ဝန်ထမ်းတွေ (ဗော်လန်တီယာတွေ)ကို စုဆောင်းသွားရန် ရည်ရွယ်ထားပါတယ်။

(Photo: Reuters)

"ဒီ ကနဦးအဆင့် ရည်ရွယ်ချက်က လူတစ်ဦးကို COVID-19 ဖြစ်စေနိုင်တဲ့ အနည်းဆုံး ဗိုင်းရပ်စ်ပမာဏကို ဖော်ထုတ်သိရှိနိုင်ဖို့ ဖြစ်ပါတယ်" လို့ Imperial College က ထုတ်ပြန်ချက်မှာ ပြောထားပါတယ်။ Human Challenge Studay လို့လည်း သိထားကြတဲ့ ယခု လေ့လာမှုပုံစံဟာ အန္တရာယ်ရှိတယ်လို့ ယူဆပြီး တစ်နည်းအားဖြင့် ကျန်းမာရေးကောင်းမွန်သူတွေ ဗိုင်းရပ်စ်ကူးစက်ခံခြင်းဟာ ကျင့်ဝတ်မညီတာကြောင့် ပြုလုပ်လေ့သိပ်မရှိဘဲ ရှားပါးတဲ့ လေ့လာမှုလို့ ဆိုပါတယ်။

သို့သော် COVID-19 ကို တိုက်ဖျက်ရန် အချိန်လုဆောင်ရွက်နေကြတဲ့ သုတေသီတွေက အန္တရာယ်ကင်းကောင်း အာမခံထားပြီး ယခုကဲ့သို့ လေ့လာဆန်းစစ်မှုတွေက ထိရောက်မှုအရှိဆုံး ကာကွယ်ဆေးကို လျင်လျင်မြန်မြန် ရွေးချယ်သိရှိနိုင်တဲ့ အလားအလာကောင်းရှိပြီး ကမ္ဘာတစ်ဝန်း လူဦးရေ ၁.၁ သန်းကျော် သေဆုံးခဲ့တဲ့ COVID-19 ကပ်ရောဂါ ထိန်းချုပ်ရေး ကူညီနိုင်မယ်လို့ ပြောထားပါတယ်။

(ဗော်လန်တီယာအဖြစ်ပါဝင်ရန် မျှော်လင့်ထားသူ Danica Marcos) (Photo: Frank Auterstein/AP)

ဗြိတိန်မှာ လုပ်ဆောင်သွားမယ့် ယခုလေ့လာမှု ပထမအဆင့်အရ သုတေသီတွေက လစာရရှိတဲ့ ဗော်လန်တီယာ ၉၀ ကို နှာခေါင်းမှတစ်ဆင့် အစက်ချနည်းဖြင့် ဗိုင်းရပ်စ်ကူးစက်အောင် လုပ်ဆောင်သွားပြီး COVID-19 ရောဂါဖြစ်စေရန် လိုအပ်တဲ့ အနည်းဆုံး ဗိုင်းရပ်စ်ပမာဏကို ဆန်းစစ်သွားမှာ ဖြစ်ပါတယ်။

ယခု လေ့လာမှုကို လန်ဒန်မြို့ရှိ Royal Free ဆေးရုံမှာ ပြုလုပ်သွားမယ်လို့ ဆိုပါတယ်။ Human Challenge လေ့လာမှုတွေကို ယခင်က အူရောင်ငန်းဖျား (တိုက်ဖွိုက်)၊ ကာလဝမ်းရောဂါနဲ့ ငှက်ဖျားကဲ့သို့ ရောဂါတွေအတွက် ကာကွယ်ဆေး ဖော်စပ်ထုတ်လုပ်ရန် အသုံးပြုခဲ့ဖူးကြောင်း CNA သတင်းမှာ ဖော်ပြထားပါတယ်။ 


Author


က္က