စင်ကာပူနိုင်ငံမှာ COVID-19 ကူးစက်ခံရသူ နောက်ထပ် ၇၂၈ ဦး ယနေ့ (ဧပြီ ၁၆ ရက်) ထပ်မံတွေ့ရှိရပြီး နေ့စဥ် ကူးစက်မှုနှုန်း အမြင့်ဆုံးအဖြစ် နောက်တစ်ကြိမ် စံချိန်သစ်တင်ခဲ့ပါတယ်။

ယခု အသစ်တွေ့ရှိရတဲ့ ကူးစက်မှုတွေအနက် ၆၅၄ ဦးဟာ နိုင်ငံခြားအလုပ်သမား အဆောင်များမှဖြစ်ပြီး ၂၆ ဦးကတော့ အဆောင်တွေမှာ နေထိုင်ခြင်းမရှိတဲ့ အလုပ်လုပ်ခွင့်ပါမစ် ကိုင်ဆောင်ထားသူတွေ ဖြစ်ပါတယ်။ အသစ်တွေ့ရှိရတဲ့ ကူးစက်ခံရသူတွေအနက် စင်ကာပူနိုင်ငံသား ၄၈ ဦးလည်း ပါဝင်ခဲ့ပြီး ပြည်ပမှ ဝင်ရောက်လာသူတွေမှာတော့ နောက်ထပ် ကူးစက်ခံရမှု မတွေ့ခဲ့ရပါဘူး။

(Photo: AFP)

COVID-19 ကူးစက်မှုတိုက်ဖျက်ရေး စင်ကာပူအစိုးရက Circuit Breaker အမည်ဖြင့် အစီအမံများ ဆောင်ရွက်နေပါတယ်။ ထိုအစီအမံအရ လုပ်ငန်းများနဲ့ ကျောင်းများ ပိတ်ထားခြင်း၊ လူစုလူဝေး မပြုလုပ်စေခြင်း၊ လူများ သတ်မှတ်အကွာအဝေးအတိုင်း ခပ်ခွာခွာနေစေခြင်း အပါအဝင် စည်းမျဥ်းစည်းကမ်းများ ထုတ်ပြန်ထားပြီး မလိုက်နာသူတွေကို စင်ကာပူဒေါ်လာ ၃၀၀ ဒဏ်ငွေပေးဆောင်စေပါတယ်။