ပြင်သစ်နိုင်ငံ Strasbourg မြို့ ခရစ်စမတ်ဈေးတန်းမှာ ဒီဇင်ဘာ ၁၁ ရက် ညပိုင်းက တိုက်ခိုက်ခဲ့တဲ့ သေနတ်သမားကို ရဲတပ်ဖွဲ့က အသေပစ်ခတ် ဖမ်းဆီးရမိခဲ့ကြောင်း ပြည်ထဲရေးဝန်ကြီးက ပြောပါတယ်။
(သေနတ်သမား Cherif Chekatt) (Photo: Reuters)
ယမန်နေ့ (ဒီဇင်ဘာ ၁၃ ရက်) က Strasbourg မြို့တစ်နေရာမှာ ရဲတပ်ဖွဲ့နဲ့ ထွက်ပြေးနေတဲ့ သေနတ်သမား Cherif Chekatt တို့ ထိပ်တိုက်တွေ့ခဲ့ရာ ၎င်းက စတင်ပစ်ခတ်ခဲ့ပြီးနောက် ရဲတပ်ဖွဲ့က ပြန်လည်ပစ်ခတ်မှုအတွင်း သေဆုံးသွားခဲ့တယ်လို့ သိရပါတယ်။ အသက် ၂၉ နှစ်အရွယ် Cherif Chekatt ဟာ ပြင်သစ်နဲ့ဂျာမနီနိုင်ငံတွေမှာ ရာဇဝတ်မှုများ ကျူးလွန်ခဲ့ပြီး ထောင်ဒဏ်ကျခံရစဉ် အစ္စလာမ်အစွန်းရောက်တစ်ဦး ဖြစ်လာခဲ့တယ်လို့ ဆိုပါတယ်။
(ပြင်သစ်လုံခြုံရေးတပ်ဖွဲ့ဝင်များ) (Photo: Reuters)
Strasbourg ခရစ်စမတ်ဈေးတန်းမှာ Cherif Chekatt က ပစ်ခတ်မှုကြောင့် လူသုံးဦးသေဆုံးပြီး ၁၂ ဦး ဒဏ်ရာရခဲ့ပါတယ်။ ခရစ်စမတ်ဈေးတန်းမှာ ပစ်ခတ်ခဲ့ပြီးနောက် Cherif Chekatt ဟာ လုံခြုံရေးတပ်ဖွဲ့နဲ့ အပြန်အလှန် ပစ်ခတ်မှုဖြစ်ခဲ့ပေမဲ့ ထွက်ပြေးလွတ်မြောက်နေခဲ့ပါတယ်။ ၎င်းကို ပြင်သစ်လုံခြုံရေးတပ်ဖွဲ့ဝင် ၇၀၀ ကျော်ဖြင့် လိုက်လံရှာဖွေနေခဲ့တာလည်း ဖြစ်ပါတယ်။
(သေနတ်သမားကို အသေပစ်ခတ်ဖမ်းဆီးခဲ့သည့်နေရာကို ရောက်ရှိလာသည့် ပြည်ထဲရေးဝန်ကြီး) (Photo: Christophe Castaner)
ဒီဇင်ဘာ ၁၃ ရက် ဒေသစံတော်ချိန် ည ၉ နာရီမှာတော့ Strasbourg တစ်နေရာမှာ ရဲအရာရှိသုံးဦးက သေနတ်သမား Cherif Chekatt ကို တွေ့ရှိသွားခဲ့တယ်လို့ ပြည်ထဲရေးဝန်ကြီး Christophe Castaner က ပြောပါတယ်။ ရဲအရာရှိတွေက Cherif Chekatt ကို ရပ်တန့်အဖမ်းခံရန် ညွှန်ကြားခဲ့ရာ ၎င်းက စတင်ပစ်ခတ်ခဲ့တယ်လို့ ဆိုပါတယ်။ ထို့နောက် ရဲအရာရှိတွေက ပြန်လည်ပစ်ခတ်ပြီး Cherif Chekatt ကို အသေဖမ်းဆီးခဲ့ပါတယ်။
(ပစ်ခတ်မှုဖြစ်ပွားခဲ့သည့် ခရစ်စမတ်ဈေးတန်းနေရာ) (Photo: AFP)
Strasbourg ခရစ်စမတ်ဈေးတန်း ပစ်ခတ်မှုနဲ့ဆက်နွယ်ပြီး လူငါးဦးကိုလည်း ဖမ်းဆီးခဲ့ကြောင်းနဲ့ သေနတ်သမား Cherif Chekatt ရဲ့ မိဘတွေနဲ့ ၎င်းရဲ့ညီအစ်ကိုတော်စပ်သူနှစ်ဦးလည်း ပါဝင်ကြောင်း BBC သတင်းက ပြောပါတယ်။ ခရစ်စမတ်ဈေးတန်း ပစ်ခတ်မှုဖြစ်ပွားခဲ့တဲ့ Strasbourg မြို့ဟာ ဂျာမနီနိုင်ငံနဲ့ နယ်စပ်အနီးမှာ တည်ရှိကြောင်း သိရပါတယ်။ ပြင်သစ်မှာ ၂၀၁၅ ခုနှစ်မှစပြီး အကြမ်းဖက်တိုက်ခိုက်မှုများ ဆက်တိုက်ဖြစ်ပွားခဲ့ပြီးနောက် လုံခြုံရေးတပ်ဖွဲ့တွေကို တပ်လှန့်ထားခဲ့ပါတယ်။