တရုတ်အစိုးရက COVID-19 စတင်ကူးစက်ဖြစ်ပွားခဲ့တဲ့ ဝူဟန်မြို့မှာ သေဆုံးသူအရေအတွက်ကို ယနေ့ (ဧပြီ ၁၇ ရက်) တိုးမြှင့်ပြင်ဆင်လိုက်ပြီး ကပ်ရောဂါဗိုင်းရပ်စ်နဲ့ ပတ်သက်လို့ ဖုံးကွယ်ထားခြင်းမရှိကြောင်း ငြင်းဆိုခဲ့ပါတယ်။

(Photo: Reuters)

ထိုသို့ ပေါင်းထည့်လိုက်တာကြောင့် လက်ရှိအချိန်အထိ ဝူဟန်မြို့မှာ သေဆုံးသူအရေအတွက် စုစုပေါင်း ၃,၈၆၉ ဦးဖြစ်လာခဲ့ပါတယ်။ ယခု အပြောင်းအလဲအရ တရုတ်ပြည်မကြီးတစ်ခုလုံးမှာ သေဆုံးသူအရေအတွက်ဟာလည်း ၃၉ ရာခိုင်နှုန်း တိုးမြင့်သွားပြီး ၄,၆၃၂ ဦး ဖြစ်လာခဲ့ကြောင်း ယနေ့ အစောပိုင်းမှာ တရုတ်အစိုးရက ထုတ်ပြန်တဲ့ တရားဝင်အချက်အလက်အရ သိရှိရပါတယ်။

တရုတ်နိုင်ငံမှာ COVID-19 ကူးစက်မှုနဲ့ပတ်သက်ပြီး မည်သည့်အခါကမျှ ဖုံးကွယ်ခဲ့ခြင်းမရှိကြောင်းနဲ့ ဖုံးကွယ်မှုတွေကိုလည်း အစိုးရက ခွင့်မပြုကြောင်း နေ့စဥ် သတင်းစာရှင်းလင်းပွဲမှာ တရုတ်နိုင်ငံခြားရေးဝန်ကြီးဌာန ပြောခွင့်ရအမျိုးသား Zhao Lijian က ပြောခဲ့ပါတယ်။

ဝူဟန်မြို့မှာ COVID-19 ကြောင့် သေဆုံးသူအရေအတွက်ကို ပြန်လည်ပြင်ဆင်မှုဟာ ကိန်ဂဏန်းအချက်အလက်နဲ့ တိကျမှန်ကန်မှုအပေါ် စိစစ်အတည်ပြုမှုအရ ဖြစ်ကြောင်းနဲ့ ထိုသို့ ပြန်လည်ပြင်ဆင်မှုကို နိုင်ငံတကာမှာလည်း လုပ်ဆောင်လေ့ရှိကြောင်း ၎င်းကဆိုပါတယ်။

(Photo: AFP)

တရုတ်နိုင်ငံဟာ COVID-19 ကပ်ရောဂါဖြစ်ပွားစေတဲ့ SARS-CoV-2 ဗိုင်းရပ်စ်ကိစ္စနဲ့ ပတ်သက်ပြီး အမေရိကန်ဦးဆောင်တဲ့ အနောက်အုပ်စု အင်အားကြီးနိုင်ငံများထံမှ ဖိအားပေးမှုတွေ ရင်ဆိုင်နေရပါတယ်။ အနောက်အုပ်စုနိုင်ငံတွေက ဗိုင်းရပ်စ်နဲ့ပတ်သက်ပြီး တရုတ်ရဲ့ ပွင့်လင်းမြင်သာမှုအပေါ် သံသယတွေ တိုးမြင့်နေပြီး ဗိုင်းရပ်စ်ဟာ ဝူဟန်မှာရှိတဲ့ ဓာတ်ခွဲခန်းတစ်ခုကနေ အမှန်တစ်ကယ် လွတ်ထွက်လာခဲ့ခြင်းဟုတ် မဟုတ် စုံစမ်းစစ်ဆေးနေကြပါတယ်။

(Photo: Hector Retamal/AFP)

SARS-CoV-2 ဗိုင်းရပ်စ်ကို ယမန်နှစ် ဒီဇင်ဘာလကုန်က တရုတ်နိုင်ငံအလယ်ပိုင်း ဟူဘေးပြည်နယ် ဝူဟန်မြို့မှာ စတင်တွေ့ရှိခဲ့တာ ဖြစ်ပါတယ်။ SARS-CoV-2 ဗိုင်းရပ်စ်ကြောင့် ဖြစ်ပွားတဲ့ COVID-19 ကို ကမ္ဘာလုံးဆိုင်ရာ ကပ်ရောဂါအဖြစ် ကမ္ဘာ့ကျန်းမာရေးအဖွဲ့အစည်း (World Health Organization - WHO) က မတ်လ ၁၁ ရက်နေ့မှာ ကြေညာခဲ့ပါတယ်။ ယနေ့ညအစောပိုင်းအထိ ကမ္ဘာတစ်ဝှမ်းမှာ COVID-19 ကူးစက်ဖြစ်ပွားသူ ၂,၁၉၇, ၉၅၀ ဦး၊ သေဆုံးသူ ၁၄၇,၅၉၈ ဦးအထိ ဆက်လက် မြင့်တက်နေပြီး ပြန်လည်သက်သာသူ ၅၅၈,၀၅၅ ရှိခဲ့ကြောင်း သိရပါတယ်။