ထိုင်းနိုင်ငံ ဘန်ကောက်မြို့တော် အများပြည်သူမြင်ကွင်းမှာ ခိုစာကျွေးသူတွေကို ထောင်ဒဏ်ချမှတ်ရန် စဉ်းစားနေကြောင်း အာဏာပိုင်တွေက ယနေ့ (စက်တင်ဘာ ၂၆ ရက်) ပြောပါတယ်။ ငှက်တုပ်ကွေးနဲ့ အခြား ရောဂါအန္တရာယ် လျှော့ချနိုင်ရန်အတွက် ထိုသို့ ထောင်ဒဏ်ချမှတ်ရန် စဉ်းစားနေခြင်းဖြစ်တယ်လို့ ဆိုပါတယ်။

ဘန်ကောက်မြို့တော် အုပ်ချုပ်ရေးအဖွဲ့က ခိုများဖမ်းဆီးရေး ဆောင်ရွက်နေပြီး ခိုစာကျွေးသူတွေကို ထောင်ဒဏ်သုံးလ၊ ဒဏ်ငွေ ၂၅,၀၀၀ (မြန်မာကျပ်ငွေ ၁၂ သိန်းဝန်းကျင်) သို့မဟုတ် ဒဏ်နှစ်ရပ်လုံး ချမှတ်နိုင်ရန် စီစဉ်သွားမယ်လို့ ပြောထားပါတယ်။

Photo: Soe Zeya Tun/Reuters

အီတလီနိုင်ငံရှိ ကမ္ဘာလှည့်ခရီးသည် လာရောက်မှုများပြားတဲ့ ဗင်းနစ်မြို့မှာလည်း ခိုစာကျွေးခြင်းကို ဥပဒေချိုးဖောက်မှုအဖြစ် သတ်မှတ်ပြီး တားမြစ်ပိတ်ပင်ထားပါတယ်။ သို့သော် ဗင်းနစ်မြို့မှာမူ ဘန်ကောက်မှာကဲ့သို့ ထောင်ဒဏ်ချမှတ်ရန် သတ်မှတ်ထားခြင်းမရှိပါဘူး။

ဘန်ကောက်မြို့မှာ 'တောင်ပံပါတဲ့ကြွက်များ' လို့လည်း ခေါ်ဝေါ်ကြလေ့ရှိတဲ့ ခိုတွေကို ဘုရားကျောင်းများ၊ ဈေးများနဲ့ အများပြည်သူပန်းခြံများ အပါအဝင် လူထူထပ်ရာနေရာတွေမှာ တွေ့ရလေ့ရှိပါတယ်။

Photo: Soe Zeya Tun/Reuters

ခိုတွေထံမှ အသက်ရှူလမ်းကြောင်းဆိုင်ရာရောဂါ၊ ဦးနှောက်အမြှေးရောင်ရောဂါနဲ့ ငှက်တုပ်ကွေး အပါအဝင် ကျန်းမာရေးအန္တရာယ်များ ရှိနေကြောင်း Taweesak က ပြောခဲ့ပါတယ်။

"လူတွေအတွက် ကျန်းမာရေးအန္တရာယ်မဖြစ်အောင်လုပ်ဖို့ အထိရောက်နည်းလမ်းက ခိုစာကျွေးတာကို တားမြစ်ဖို့ပါပဲ" လို့လည်း ၎င်းကဆိုပါတယ်။ ထိုင်းဝန်ကြီးချုပ် ပရာယွတ်ချန်အိုချာကလည်း နိုင်ငံတစ်ဝှမ်း လူနေထူထပ်တဲ့နေရာတွေမှာ ခိုအကောင်ရေလျှော့ချရန် ယခုလအတွင်း ညွှန်ကြားခဲ့ကြောင်း သိရပါတယ်။