ယနေ့ မနက်အထိ အကျဉ်းသားငါးဦးကိုသာ ပြန်ဖမ်းမိပါသေးတယ်။
Ko John

ဆူပူအုံကြွမှုတွေ ဖြစ်ပွားခဲ့တဲ့ အင်ဒိုနီးရှားနိုင်ငံ အနောက်ပါပူအာပြည်နယ်မှာ အကျဉ်းထောင်ကနေ ထွက်ပြေးလွတ်မြောက်သွားတဲ့ အကျဉ်းသား ၂၅၀ ကျော်ကို အာဏာပိုင်တွေက လိုက်လံရှာဖွေနေကြောင်း သိရပါတယ်။

(Photo: AFP)

တနင်္လာနေ့ (သြဂုတ် ၁၉ ရက်) က ဖြစ်ပွားခဲ့တဲ့ ဆူပူအုံကြွမှုအတွင်း ဒေသဆိုင်ရာ လွှတ်တော်အဆောက်အအုံနဲ့ အကျဉ်းထောင်ကို မီးရှို့ခဲ့ကြပြီး လမ်းအချို့ကို ပိတ်ဆို့ထားခဲ့ကြပါတယ်။ Surabaya မြို့မှာ အင်ဒိုနီးရှား နိုင်ငံတော်အလံကို မလေးမစားပြုမူခဲ့ကြောင်း စွပ်စွဲခံရတဲ့ ပါပူအာကျောင်းသားများ ထိန်းသိမ်းခံရပြီးနောက် ဆူပူအုံကြွမှုတွေ ပေါ်ပေါက်ခဲ့တာဖြစ်ပါတယ်။ ပါပူအာမှာ နောက်ထပ် ဆန္ဒပြမှုတွေ မတိုင်မီ ရဲတပ်ဖွဲ့က နောက်ထပ် တပ်ဖွဲ့ဝင်တွေကို ပါပူအာသို့ စေလွှတ်ထားကြောင်းလည်း သိရပါတယ်။

(Photo: AFP)

သြဂုတ် ၁၉ ရက်နေ့က Sorong, Manokwari နဲ့ Jayapura အပါအဝင် မြို့တွေရဲ့ လမ်းမများပေါ်မှာ ပါပူအာဒေသခံ ထောင်ပေါင်းများစွာ ဆူပူအုံကြွ ဆန္ဒပြခဲ့ကြပါတယ်။ ထိုသို့ ဆူပူအုံကြွမှုများအတွင်း Sorong မြို့ရှိ အကျဉ်းထောင် မီးရှို့ခံရတယ်လို့ တရားစီရင်ရေးဌာန ပြောခွင့်ရအမျိုးသမီး Marlien Lande က ဆိုပါတယ်။

"အကျဉ်းသား ၂၅၈ ယောက် လွတ်သွားပါတယ်၊ ဒီမနက်အထိ သူတို့ထဲက ငါးယောက်ကိုပဲ ပြန်ဖမ်းမိပါသေးတယ်" လို့ သူမက ယနေ့ (သြဂုတ် ၂၁ ရက်) ပြောပါတယ်။ အကျဉ်းထောင် မီးရှို့ခံရပြီး အကျဉ်းသားများ ထွက်ပြေးကြမှုကို ဟန့်တားထိန်းသိမ်းရန် ကြိုးပမ်းခဲ့ကြတဲ့ အကျဉ်းထောင်စောင့်နဲ့ ဝန်ထမ်းတွေ ဒဏ်ရာရခဲ့ကြောင်းလည်း Marlien Lande က ဖြည့်စွက်ပြောခဲ့ပါတယ်။

(Photo: AFP)

ယခင်က ဒတ်ချ်ကိုလိုနီဖြစ်ခဲ့တဲ့ ပါပူအာက ၁၉၆၁ ခုနှစ်မှာ ကိုယ်ပိုင်လွတ်လပ်ရေး ကြေညာခဲ့ပေမဲ့ နောက်ပိုင်းမှာ ၎င်းရဲ့ ပိုမိုကြီးမားတဲ့ အနောက်ပိုင်းနယ်မြေကို အင်ဒိုနီးရှားက ထိန်းချုပ်ခဲ့ပါတယ်။ ပါပူအာ ခွဲထွက်ရေးလှုပ်ရှားမှုတွေ ယနေ့အထိ ဆက်လက်ရှိနေဆဲဖြစ်ပြီး အင်ဒိုနီးရှားအာဏာပိုင်တွေဟာ အဆိုပါပြည်နယ်မှာ လူ့အခွင့်အရေးချိုးဖောက်နေကြောင်း စွပ်စွဲမှုတွေနဲ့ ရင်ဆိုင်နေရကြောင်း BBC သတင်းက ဖော်ပြထားပါတယ်။ 



က္က