ပြင်သစ်နိုင်ငံ ပါရီမြို့လယ်ရှိ ထင်ရှားတဲ့ Notre-Dame ခရစ်ယာန်ဘုရားကျောင်းမှာ မီးလောင်မှုအကြီးအကျယ် ဖြစ်ပွားခဲ့ပြီး အဆောက်အအုံတစ်ခုလုံးကို လျင်မြန်စွာ ကူးစက်လောင်ကျွမ်းခဲ့ကြောင်း သိရပါတယ်။
(Photo: AFP/Getty Images)
ဧပြီ ၁၅ ရက် ဒေသစံတော်ချိန် ညနေ ၆ နာရီ ၅၀ မိနစ်ဝန်းကျင်မှာ ဘုရားကျောင်း မီးလောင်မှု စတင်ဖြစ်ပွားခဲ့ပြီး မီးလောင်မှုဖြစ်ရတဲ့ အကြောင်းရင်းကို အတိအကျ မသိရသေးပါဘူး။ အာဏာပိုင်တွေကတော့ ပြုပြင်မွမ်းမံမှုတွေ လုပ်ဆောင်ခြင်းနဲ့ ဆက်နွယ်နိုင်ကြောင်း ခန့်မှန်းထားပါတယ်။ ဆိုရှယ်မီဒီယာနဲ့ သတင်းမီဒီယာ ဓာတ်ပုံတွေအရ ဘုရားကျောင်းအပေါ်ဘက်မှာ မီးခိုးများ ထူထပ်စွာထွက်ရှိနေပြီး ကြီးမားတဲ့ မီးတောက်ကိုမြင်တွေ့ရပါတယ်။
ယခု မီးလောင်မှုဖြစ်ပွားခဲ့တဲ့ ဂေါ့သစ် (Gothic) ဗိသုကာလက်ရာပုံစံ ခရစ်ယာန်ဘုရားကျောင်းကြီး စတင်ဆောက်လုပ်ခြင်း အုတ်မြစ်ချမှုကို ၁၁၆၃ ခုနှစ်မှာ ဆောင်ရွက်ခဲ့ရာ လက်ရှိအချိန်မှာ သက်တမ်းအားဖြင့် နှစ်ပေါင်း ၈၅၀ ကျော်ရှိပြီလည်း ဖြစ်ပါတယ်။ Notre-Dame ခရစ်ယာန်ဘုရားကျောင်းကြီးကို ၁၃၄၅ ခုနှစ်မှာ ဆောက်လုပ်ပြီးစီးခဲ့တယ်လို့ သိရပါတယ်။ ဘုရားကျောင်းမီးလောင်မှုကို ငြှိမ်းသတ်နိုင်ရန် မီးသတ်သမား ၄၀၀ က ကြိုးပမ်းနေပြီး အနီးပတ်ဝန်းကျင် အဆောက်အအုံများမှ လူတွေကို ရွှေ့ပြောင်းထားတယ်လို့ အာဏာပိုင်တွေက ပြောပါတယ်။
(Photo: EPA)
(Photo: AP)
UNESCO ကမ္ဘာ့အမွေအနှစ်စာရင်းဝင်ဖြစ်တဲ့ ပါရီမြို့လယ်ရှိ Notre-Dame ခရစ်ယာန်ဘုရားကျောင်းကို နှစ်စဉ် ဝတ်ပြုဆုတောင်းသူ သန်းနဲ့ချီ လာရောက်လေ့ရှိပါတယ်။ အဆိုပါ ဘရားကျောင်းကြီးရဲ့ ကျောက်ပြားမှာ အက်ကွဲရာများ ဖြစ်ပေါ်လာခဲ့ရာမှ အဆောက်အအုံ ခိုင်ခံ့မှုအပေါ် စိုးရိမ်မှုတွေရှိလာခဲ့ပြီးနောက် လက်ရှိမှာ ပြုပြင်မွမ်းမံမှုတွေ လုပ်ဆောင်နေကြောင်း သိရပါတယ်။
Source: BBC, AFP, NBC News