ကျောင်း ၄ ကျောင်းက ဆဌမတန်း ကျောင်းသားကျောင်းသူ အယောက် (၃၀) စီကို သင်ကြားပေးနေပါတယ်။
Mi Thawdar Aung

ရန်ကုန်နဲ့ မန္တလေးမြို့ အခြေခံပညာ အထက်တန်းကျောင်း (၄) ကျောင်းက ကျောင်းသားကျောင်းသူတွေကို ပထမဆုံးအကြိမ် ပြင်သစ်ဘာသာစကားသင်ကြားပေးမယ်လို့ ပြင်သစ်ယဉ်ကျေးမှုဌာန (Institut français de Birmanie) ကနေ သိရပါတယ်။

Photo- ပြင်သစ်ယဉ်ကျေးမှုဌာန (Institut français de Birmanie)

အ.ထ.က (၁၆) မန္တလေး၊ အ.ထ.က (၁) ဒဂုံ၊ အ.ထ.က (၂) ဗဟန်းနှင့် ရန်ကုန်ပညာရေးတက္ကသိုလ်လေ့ကျင့်ရေးကျောင်းတို့က ဆဌမတန်း ကျောင်းသားကျောင်းသူ အယောက် (၃၀) ကို စက်တင်ဘာလ တတိယပတ်ကစတင်ကာ သင်ကြားပေးနေပြီလို့ သိရပါတယ်။

“ ကျွန်မတို့ အခုပညာရေးဝန်ကြီးဌာနက ပေးတဲ့ ကျောင်းတွေကနေပြီးတော့ ကျောင်း ၄ ကျောင်းကို ပြန်ရွေးထားတာပေါ့။ လောလောဆယ် ကျောင်းသားအားလုံးကိုတော့ မသင်ပေးနိုင်သေးဘူး။ နောင်များမှာတော့ ကျောင်းသားတွေလည်း ထပ်တိုးချဲ့ပြီးသင်ပေးမယ်။ ကျောင်းတွေလည်း ထပ်တိုးပြီး သင်ပေးဖို့ အစီအစဉ်တွေ ရှိပါတယ်” လို့ ပြင်သစ်ယဉ်ကျေးမှုဌာန (Institut français de Birmanie) မှ တာဝန်ရှိသူတစ်ဦးက Duwun ကိုပြောပါတယ်။

ပညာရေးဝန်ကြီးဌာနနဲ့ ပြင်သစ်သံရုံးတို့ ပူးပေါင်းလုပ်ဆောင်တာဖြစ်ပြီး  ပြင်သစ်ဘာသာစကားသင်ကြားပေးနိုင်ဖို့ ရှေ့ပြေးစီမံကိန်းအနေနဲ့ ကျောင်း ၄ ကျောင်းကို ရွေးချယ်ထားတာလည်းဖြစ်ပါတယ်။

Photo- ပြင်သစ်ယဉ်ကျေးမှုဌာန (Institut français de Birmanie)

တစ်ပတ်ကို စာသင်ချိန် နှစ်ချိန်ရှိပြီး  ပြင်သစ်စာရေးဆရာကြီး မိုးလျံရဲ့ မိခင်ဘာသာစကားကို သင်ကြားပေးနေပြီး ပျော်ရွှင်စရာ သင်ကြားရေးအစီအစဉ်တွေ လည်း ပါဝင်တယ်လို့ ဆိုပါတယ်။

ဒီသင်ရိုးညွှန်းတမ်းကို ပြင်သစ်ယဉ်ကျေးမှုဌာန (IFB) နှင့် မန္တလေးပြင်သစ်စင်တာတို့မှ ဆရာ၊ ဆရာမများနှင့် ကျွမ်းကျင်သူများက ရေးဆွဲပြုစုထားတယ်လို့လည်း သိရပါတယ်။

ပြင်သစ်ဘာသာစကားကို နိုင်ငံခြားဘာသာစကားတစ်ခုအဖြစ် ကမ္ဘာ့နိုင်ငံတွေမှာ သင်ကြားပေးနေရာ ပညာရေးဝန်ကြီးဌာနရဲ့ မြန်မာ့ပညာရေးစနစ် တိုးတက်စေရေးအတွက် ပြင်သစ်ပညာရေး ကျွမ်းကျင်အဖွဲ့အစည်းနဲ့ ပူးပေါင်းဆောင်ရွက်ခဲ့ပြီး အဆိုပါ ရှေ့ပြေးစီမံကိန်း ဆောင်ရွက်တာဖြစ်ပါတယ်။


က္က