သေဆုံးသူ သူနာပြုဆရာမဟာ ဆီးချို ရောဂါအခံရှိသူဖြစ်ပါတယ်။

ဗဟိုစည်ဆေးရုံမှာ သူနာပြုအကူဝန်ထမ်းအဖြစ် အလုပ်လုပ်ကိုင်တဲ့ အသက် (၂၃) နှစ်အရွယ် အမျိုးသမီးတစ်ဦး ဒီကနေ့ စက်တင်ဘာ (၁၈) ရက်မှာ ကိုဗစ်-၁၉ ရောဂါနဲ့ သေဆုံးသွားခဲ့တယ်လို့ သိရပါတယ်။

သေဆုံးသွားတဲ့ သူနာပြုဆရာမမှာ ဗဟိုစည်ဆေးရုံမှာ အချိန်ပိုင်းအဖြစ် လာရောက်လုပ်ကိုင်သူတစ်ဦးဖြစ်ပြီး ပြင်ပမှာနေထိုင်သူတစ်ဦးဖြစ်ကာ ဗဟိုစည်ဆေးရုံ လော့ဒေါင်းချခဲ့တဲ့ကာလမှာတော့ ဆေးရုံမှာမရှိခဲ့ဘူးလို့လည်း လမ်းမတော်မြို့နယ်၊ ဆယ်ရပ်ကွက်အုပ်ချုပ်ရေးမှူး ဦးတင့်ဝေက Duwun ကိုပြောပါတယ်။



အဆိုပါ သူနာပြုဆရာမဟာ ဖျားနာလို့ စက်တင်ဘာ (၁၃) ရက်နေ့က ရန်ကုန်ပြည်သူ့ဆေးရုံကြီးမှာ တက်ရောက်ကုသနေစဉ် ကိုဗစ်-၁၉ ပိုးတွေ့ရှိခဲ့ကြောင်း သိရပါတယ်။ သေဆုံးသွားသူမှာ ဆီးချိုရောဂါအခံရှိပြီး ဆေးကုသမှုခံယူစဉ်အတွင်း ဆီးချိုတက်ကာ သတိလစ်မေ့မြောပြီး သေဆုံးသွားခဲ့တာဖြစ်တယ်လို့လည်း ဆိုပါတယ်။

“သူက ဆီးချို ရောဂါအခံရှိတယ်လို့ ပြောတယ်။ ရောဂါအခံရှိတော့ မောပြီး တက်သွားတာ။ ဇာတိကတော့ ပန်းတနော်က ။ ဗဟိုစည်ဆေးရုံမှာ အချိန်ပိုင်းဝန်ထမ်းလုပ်တာပေါ့။ နေတာကတော့ ဆေးရုံဝင်းထဲမဟုတ်ဘူး ။ ပြင်ပမှာနေတာ။ ဘယ်မှာနေလဲဆိုတာကိုတော့ စုံစမ်းနေတုန်းပါပဲ” လို့ ဦးတင့်ဝေ က Duwun ကို ပြောပါတယ်။

ကျန်းမာရေးနှင့်အားကစားဝန်ကြီးဌာနရဲ့ ထုတ်ပြန်တဲ့စာရင်းမှာတော့ အခုသေဆုံးသွားတဲ့လူနာနဲ့ပတ်သက်တဲ့အချက်အလက် ပါဝင်ခြင်းမရှိသေးဘဲ လူနာအမှတ်ဘယ်လောက်ဆိုတာကိုလည်း မသိရသေးပါဘူး။ 

လက်ရှိ လော့ဒေါင်းချထားတဲ့ ဗဟိုစည်ဆေးရုံမှာတော့ လူဦးရေ ၂၀၀ ကျော်လောက်ရှိုတဲ့အနက် ကိုဗစ်-၁၉ ပိုးတွေ့ထားသူ ၃၁ ဦးရှိခဲ့ပြီး ဒီကနေ့ စက်တင်ဘာ ၁၈ ရက်မှာလည်း နောက်ထပ် ၁၉ ဦးတွေ့ရှိထားတာကြောင့် စုစုပေါင်း ပိုးတွေ့လူနာ (၅၀) ဦးအထိ ရှိလာခဲ့ပြီလို့လည်း လမ်းမတော်မြို့နယ် လွှတ်တော်ကိုယ်စားလှယ် ဦးကျော်ထွန်းက Duwun ကိုပြောပါတယ်။ နောက်ထပ် ဗဟိုစည်ဆေးရုံအတွင်းက လူနာ (၁၀၀) ကျော်ကိုဓာတ်ခွဲနမူနာရယူစစ်ဆေးသွားဖို့ ဆောင်ရွက်နေတယ်လို့လည်းသိရပါတယ်။ 



က္က