ဗဟန်းမြို့နယ်အတွင်း ဒေါ်အောင်ဆန်းစုကြည်ရဲ့နေအိမ် ခြံအမှတ် (၅၄) အတွင်း နေထိုင်သူတစ်ဦးမှာ ကိုဗစ်-၁၉ ပိုးတွေ့ရှိခဲ့ရတယ်လို့ အမျိုးသားဒီမိုကရေစီအဖွဲ့ချုပ် အလုပ်အမှုဆောင်အဖွဲ့ဝင် ဒေါက်တာမျိုးညွန့်က Duwun ကို အတည်ပြုပြောပါတယ်။

“ ခြံအမှတ် ၅၄ မှာ စီမံအုပ်ချုပ်ဖို့ အတွက် တာဝန်ပေးထားတဲ့သူပါ။ ပိုးဘယ်လိုကူးစက်ခံရတဲ့အကြောင်း အတည်ပြုလို့မရသေးဘူး။ သူ့ကိုတော့ ဖောင်ကြီးဆေးရုံမှာကုသဖို့အတွက် ပို့ဆောင်လိုက်ပြီ။ သူနဲ့ထိတွေ့ခဲ့တဲ့ ပုဂ္ဂိုလ်တွေကိုတော့ဆေးရုံကွာရန်တင်းထားတယ်လို့သိရပါတယ်” လို့ ဒေါက်တာမျိုးညွန့်က Duwun ကို ပြောပါတယ်။

ကျန်းမာရေးနှင့်အားကစားဝန်ကြီးဌာနရဲ့ ဒီနေ့ စက်တင်ဘာ ၆ ရက် မနက် ၈ နာရီထုတ်ပြန်ချက်အရ ဗဟန်းမြို့နယ်မှာနေထိုင်သူ နှစ်ဦးမှာ ကိုဗစ်-၁၉ ပိုးတွေ့ရှိတဲ့အနက် နှစ်ဦးစလုံးမှာ ဗဟန်းမြို့နယ်၊ ခြံအမှတ် (၅၄) လိပ်စာပေးထားတဲ့ အမျိုးသားနှစ်ဦးလို့ သတင်းတွေထွက်ပေါ်နေပေမယ့် လောလောဆယ်မှာတော့ တစ်ဦးမှာသာ ပိုးတွေ့တယ်လို့သိရကြောင်း ဒေါက်တာမျိုးညွှန့်ကဆိုပါတယ်။

အဆိုပါ ခြံအမှတ်၅၄ လိပ်စာ ပေးထားသူ နှစ်ဦးအနက် တစ်ဦးမှာတော့ ဘယ်သူဘယ်ဝါမှန်းအတိအကျမသိရသေးဘူးလို့လည်း ဗဟန်းမြို့နယ် ပြည်သူ့လွှတ်တော်ကိုယ်စားလှယ် ဦးထွန်းမြင့်က ဆိုပါတယ်။ 

“ အတိုင်ပင်ခံ ဒေါ်အောင်ဆန်းစုကြည့်ရဲ့ ခြံအမှတ် ၅၄ ကလို့တော့ ကြားပါတယ်။ တစ်ခြားမြို့နယ်မှာ နေထုခိင်ပြီး ဒီခြံမှာ တစ်လမှ ၄ ရက်လောက်၊ တစ်ပတ်မှ တစ်ကြိမ်၊နှစ်ကြိမ် အလုပ်ရှိလို့ ဝင်ထွက်သွားလာလို့ ဗဟန်းလိပ်စာပေးထားတာလည်းဖြစ်ကောင်းဖြစ်နိုင်တယ်။” လို့ လွှတ်တော်ကိုယ်စားလှယ် ဦးထွန်းမြင့်က ဆိုပါတယ်။ 

လက်ရှိ ဒီကိစ္စနဲ့ပတ်သက်ပြီး တိုင်းကျန်းမာရေးဦးစီးဌာနက အဓိက စီမံကွပ်ကဲနေတယ်လို့လည်း ဗဟန်းမြို့နယ် ပြည်သူ့ကျန်းမာရေးဦးစီးဌာနက ကျန်းမာရေးဦးစီးမှူး ဒေါက်တာနီနီသော်က ဆိုပါတယ်။

ဝန်ကြီးဌာနရဲ့ ဒီနေ့ မနက် ထုတ်ပြန်ချက်ထဲမှာ ပိုးတွေ့လူနာ ၆၆ ဦးတွေ့ရှိရတယ်လို့ ဖော်ပြထားရာမှာ ဗဟန်းမြို့နယ်မှာ နေထိုင်သူ နှစ်ဦးပါဝင်နေပြီး လူနာတွေရဲ့ အသေးစိတ်အချက်အလက်တွေကိုတော့ အခုချိန်ထိ ထုတ်ပြန်ထားခြင်းမရှိသေးတာလည်း ဖြစ်ပါတယ်။