အောင်ရဲထွေးရိုက်နှက်ခံရပြီးသေဆုံးမှုနဲ့ပါတ်သတ်ပြီး ရာဇဝတ်ကျင့်ထုံးဥပဒေပုဒ်မ ၄၉၄(က)အရ ရုပ်သိမ်းခွင့်ပြုတာကြောင့် ဖမ်းဆီးထားသူ အမျိုးသားသုံးဦးကို အမှုကနေပြန်လွှတ်တယ်လို့ သိရပါတယ်။

အဲ့ဒီအမှုနဲ့ ပါတ်သတ်ပြီး သုဝဏ္ဏနယ်မြေရဲစခန်းက (ပ)၅/၂၀၁၈ အမှုဖွင့်စစ်ဆေးခဲ့ပြီးတော့ အသက် ၂၆ နှစ်အရွယ် သန်းထွဋ်အောင်(ခ)သားကြီး၊ အသက် ၂၆ နှစ်အရွယ်ပြည့်ဖြိုးအောင်(ခ)အောင်လေး၊ အသက် ၂၈ နှစ်အရွယ်ကျော်ဇောဟန်(ခ) ကျော်ဇော ကို တရားခံအဖြစ်နဲ့ ဖမ်းဆီးရမိခဲ့တယ်လို့ သိရပါတယ်။

အဲ့ဒီလို ဖမ်းဆီးထားတဲ့ သန်းထွဋ်အောင်အပါအဝင်သုံးဦးကို အရှေ့ပိုင်းခရိုင်တရားရုံးမှာ တရားရုံးအမှုအမှတ် ၃၄ / ၂၀၁၈ နဲ့ တရားစွဲဆိုတင်ပို့ခဲ့ပြီး ကြားနာစစ်ဆေးခဲ့ပြီးတော့ ရန်ုကုန်တိုင်းဒေသကြီး ဥပဒေချုပ်ရုံးက ဇူလိုင် ၆ ရက်နေ့ နေ့စွဲနဲ့ ပေးပို့လာတဲ့ စာအရ အမှုကို ရုပ်သိမ်းခွင့်ပြုတယ်ဆိုပြီးပြန်ကြားလာပြီးတော့ အမှုစစ်တရားသူကြီးက ရာဇဝတ်ကျင့်ထုံးဥပဒေပုဒ်မ ၄၉၄(က) အရ အမှုကို ရုပ်သိမ်းခွင့်ပြုပြီး အမှုကနေ ပြန်လွှတ်တယ်လို့ အမိန့်ချမှတ်ခဲ့ပါတယ်။

"ကျေနပ်လို့ အမှုငြိမ်းတယ်ဆိုတိုင်းအမှုက မပြီးဘူး။ ကာယကံရှင်ဘက်ကကျေအေးပေမယ့် နိုင်ငံတော်က တရားလိုဖြစ်တဲ့အတွက် အစိုးရကရုပ်သိမ်းမှရတယ်။ အကြောင်းပြချက်တွေပေးရတယ်။ ဥပဒေအရာရှိက ရုပ်သိမ်းခွင့်တင်ရတယ်။ ဥပဒေအရာရှိက ရုပ်သိမ်းခွင့်တင်တာကို ပေးသင့်မပေးသင့်က တရားရုံးက စဉ်းစားရတယ်။ တစ်ဖက် နစ်နာတဲ့သူက ဆက်မဆောင်ရွက်ချင်တာကို တင်ပြတဲ့အခါ နိုင်ငံအတွက် နစ်နာတယ်။ နမူူနာကြီးဖြစ်မယ်ထင်ရင် ရုပ်သိမ်းခွင့့်အပြည့်မပေးတာတွေရှိပါတယ်။ ဒါကတော့ ရုပ်သိမ်းခွင့်ကို တင်ပေးလိုက်တဲ့သဘောပါပဲ။"လို့ တရားလွှတ်တော်ရှေ့နေ ဦးခင်မောင်ဇော်က ပြောပါတယ်။

၂၀၁၇ ဒီဇင်ဘာလတုန်းက သရုပ်ဆောင်အောင်ရဲထွေး က The One Entertainment Park မှာလူတစ်စုရဲ့ ဝိုင်းဝန်းကန်ကျောက်ခြင်းကို ခံခဲ့ရပြီး ဦးခေါင်းက ဒဏ်ရာတွေကြောင့် ဇန်နဝါရီ ၂ ရက်နေ့မှာသေဆုံးခဲ့တာပါ။