ကော်ဖီဆိုင်ဖွင့်ရာမှာ စာချုပ်စည်းကမ်းအတိုင်း လုပ်မပေးဘဲ လိမ်လည်ခဲ့တဲ့ အသက် ၃၃ နှစ် အရွယ် ဗီယက်နမ်နိုင်ငံသားကို အမှုဖွင့်ထားတယ်လို့ မြန်မာနိုင်ငံ ရဲတပ်ဖွဲ့က ဒီဇင်ဘာ ၂၀ ရက်မှာ သတင်းထုတ်ပြန်ပါတယ်။

ရေကြောင်း အင်ဂျင်နီယာ အလုပ်လုပ်ကိုင်သူ ဦးအောင်သူဆိုသူကနေ Tea Shop ဆိုင်ဖွင့်လှစ်ဖို့အတွက် ဆိုင်ဆောက်လုပ်ပေးဖို့နဲ့ လိုအပ်တာတွေကို ဆောင်ရွက်ပေးဖို့ ဆိုပြီး သြဂုတ်လအတွင်းက မင်္ဂလာတောင်ညွန့်မြို့နယ်၊ သပြေကုန်းရပ်ကွက်ရှိ F&B Consultant and Sctup ANZ Plus Jsc Group Co.Ltd မှ မန်နေးဂျင်း ဒါရိုက်တာ ဗီယက်နမ်နိုင်ငံသား Mr. Le Thein Phuc ကို သိန်း ၄၀၀ နဲ့ စာချုပ်ချုပ်ဆို လုပ်ငန်းအပ်နှံခဲ့တယ်လို့ သိရပါတယ်။

အဲဒီနောက် အောက်တိုဘာ ၄ ရက်မှာ တောင်ဥက္ကလာပမြို့နယ်၊ (၉)ရပ်ကွက်မှာ Easy Tea House အမည်နဲ့ ဆိုင်ဖွင့်ခဲ့ပေမယ့် စာချုပ်ပါစည်းကမ်းအတိုင်း ဆိုင်အတွင်းရှိ ပရိဘောဂ ပစ္စည်းတွေ၊ ကျွမ်းကျင်ဝန်ထမ်းတွေ၊ ဆိုင်သုံးပစ္စည်းတွေနဲ့ ဝန်ထမ်းဝတ်စုံတွေကို ပြည့်စုံအောင် ဆောင်ရွက်ပေးခဲ့ခြင်းမရှိတာကြောင့် အဆိုပါ ဗီယက်နမ်နိုင်ငံသားကို အရေးယူပေးဖို့ မင်္ဂလာတောင်ညွှန့် ရဲစခန်းကို တိုင်ကြားခဲ့တာလည်းဖြစ်ပါတယ်။