စည်းကမ်းမလိုက်နာတဲ့ လုပ်ငန်းရှင်တွေကို အရေးယူမှာပါ။

ပြည်တွင်းပြည်ပကနေ တင်သွင်းရောင်းချနေတဲ့ မည်သည့် လူသုံးကုန်ပစ္စည်းကိုမဆို လာမယ့် ဧပြီလမှစတင်ပြီး မြန်မာသာသာနဲ့သာ ဖော်ပြရတော့မယ်လို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စားသုံးသူရေးရာဦးစီးဌာနက သတင်းထုတ်ပြန်ပါတယ်။

ကုန်ပစ္စည်းတွေမှာ သုံးစွဲပုံနဲ့ပတ်သက်တဲ့ သတင်း၊ အချက်အလက် သို့မဟုတ် ညွှန်ကြားချက်တွေကို မြန်မာစာနဲ့ဖြစ်စေ၊ မြန်မာစာနဲ့ အခြားစာနဲ့ တွဲပြီး ဖြစ်စေ ဖော်ပြဖို့ အတွက် ၂၀၁၈ ခုနှစ် အောက်တိုဘာ ၂၆ ရက်က ကြော်ငြာစာထုတ်ပြန်ခဲ့ပြီး ၆ လအကြာမှာ စတင်အာဏာသက်ရောက်မှာ ဖြစ်တယ်လို့ စားသုံးသူရေးရာ ဦးစီးဌာနကကြေညာထားခဲ့ပါတယ်။



“ ကုန်ပစ္စည်းတွေမှာ မြန်မာလိုဖော်ပြရမယ်လို့ ၂၀၁၄ ခုနှစ်ဥပဒေမှာ ပါပြီးသားဖြစ်တယ်။ ဥပဒေပြဌာန်းပြီး ၄ နှစ်အကြာမှ ထုတ်ပြန်ခဲ့တာပါ။ ဒီလိုထုတ်ပြန်ပေးမှသာ ပြည်တွင်းSME လုပ်ငန်းတွေအတွက် အထောက်အကူပြုမှာဖြစ်တယ်လို့ လုပ်ငန်းရှင်တွေက တင်ပြလာတဲ့အတွက် ကျွန်တော်တို့ ထုတ်ပြန်ပေးခဲ့တာပါ။” လို့ စားသုံးသူကာကွယ်ပေးရေးဗဟိုကော်မတီရုံး မှ ညွန်ကြားရေးမှူး ဦးစိုးအောင်က Duwunကိုပြောပါတယ်။

ကုန်ပစ္စည်းလို့ဆိုရာမှာ အစားအသောက်၊ အိမ်သုံးပစ္စည်းတွေ၊ကလေးအသုံးအဆောင်ပစ္စည်းတွေ၊ ဆက်သွယ်ရေးသုံးပစ္စည်းတွေ၊ ဆေးဝါးနှင့်ဖြည့်စွက်စာတွေ၊ ဓါတုဗေဒပစ္စည်းတွေ၊ အလှကုန်ပစ္စည်းတွေ၊လူသုံးကုန်ပစ္စည်းတွေ၊ လုပ်ငန်းသုံးပစ္စည်းကိရိယာတွေ စတဲ့ ကုန်ပစ္စည်းတွေမှာ မြန်မာစာနဲ့ ဖော်ပြရမယ်ဆိုပြီး ကြေညာထားပါတယ်။

မြန်မာစာနဲ့ ဖော်ပြရမှာ သာမန်မျက်စိနဲ့ မြင်နိုင်တဲ့ စာလုံးအရွယ်အစားဖြစ်ရမှာဖြစ်ပြီး စားသုံးသူကို လက်လီရောင်းချမယ့် ကုန်ပစ္စည်းထုပ်ပိုးပစ္စည်းပေါ်မှာ ဖော်ပြရမှာဖြစ်ပြီး ပြည်ပကနေ တင်သွင်းလာတဲ့ ကုန်ပစ္စည်းတွေဖြစ်ပါက ဈေးကွက် ဖြန့်ဖြူးရောင်းချခြင်းမရှိခင်မှာ ပြုပြင်ရမယ်လို့လည်းသိရပါတယ်။

အဆိုပါ ညွှန်ကြားချက်စည်းကမ်းတွေကို မလိုက်နာတဲ့ စီးပွားရေးလုပ်ငန်းရှင်တွေကိုတော့ စားသုံးသူရေးရာ အကာအကွယ်ပေးရေးဥပဒေနဲ့ ပုဒ်မ ၁၉ အရ ဆိုင်ပိတ်သိမ်းတဲ့အထိ အရေးယူသွားမယ်လို့ ဝန်ကြီးဌာနက ကြေညာထားပါတယ်။


ဆက်စပ်အကြောင်းအရာများ



က္က