ဖြစ်စဉ်မှာ သြဂုတ်လ ၈ ရက် ညနေ ၅ နာရီအချိန်က မင်္ဂလာမန္တလေး ကားပါကင်ပထမထပ်မှာရန်ဖြစ်နေသံကြားရလို့ လုံခြုံရေးအရာရှိ ဦးအောင်မြင့်သူက သွားရောက်ကြည့်ရှုရာ ကားပါကင်အစောင့် မောင်သော်ဇင်ဦးကို အဆိုပါ ဆယ်ကျော်သက် လူငယ် ၁၁ ဦးက ဓားနဲ့ ရန်ပြုတိုက်ခိုက်နေတာကို တွေ့ရတယ်လို့ ဆိုပါတယ်။
မောင်သော်ဇင်ဦးရဲ့ ပြောပြချက်အရ အဲဒီလူငယ်အဖွဲ့ဟာ Strategy First University ပုဂ္ဂလိကကျောင်းမှ ကျောင်းသား ၄ ဦးကို အသင့်ပါလာတဲ့ သံတုတ်၊ ဓားမြှောင်တို့နဲ့ ချိန်ရွယ်ဆဲဆိုရိုက်နှက်ထိုးကြိတ်နေကြောင်း၊ ကားပေါ်မှာ တပ်ဆင်ထားတဲ့ စီစီတီဗီကိုလည်း ဖျက်ဆီးလိုက်တယ်လို့ သိရပါတယ်။
အဲဒီနောက် လုံခြုံရေးအရာရှိ ဦးအောင်မြင့်သူက နယ်မြေအပိုင်ရဲစခန်း ချမ်းမြသာစည်မြို့နယ် အမှတ် ၁၁ နယ်မြေရဲစခန်းဆီ ဆက်သွယ်အကြောင်းကြားရာမှာ လူငယ်အဖွဲ့ကို ဖမ်းဆီးခဲ့တယ်လို့ ရဲမှတ်တမ်းမှာ ဖော်ပြထားပါတယ်။
အခင်းဖြစ်စဉ်အတွင်း Strategy First University မှ ပုဂ္ဂလိက ကျောင်းသား ၄ ဦးမှာ ဦးခေါင်းပိုင်း၊မေးရိုးနဲ့ မျက်နှာပေါ်မှာ ဖူးယောင်ဒဏ်ရာတွေရရှိခဲ့ပါတယ်။
ပြစ်မူကျုးလွန်သူ တွေမှာ အသက် ၁၅ နှစ်အရွယ်ကနေ အသက် ၂၀ အရွယ်အထိသာ ရှိကြတဲ့လူငယ် (၁၁) ဦးဖြစ်ပြီး ရဲစခန်းက (ပ)၄၇၃/၂၀၁၉ ရာဇသတ်ကြီးဥပဒေပုဒ်မ ၄၄၀ နဲ့အမှုဖွင့်ထားတယ်လို့ သိရပါတယ်။
အသက် မပြည့်သေးတဲ့လူငယ်တွေပါဝင်တာကြောင့် အရေးယူနိုင်ဖို့ လူငယ်သင်တန်းကျောင်းနဲ့ ဆက်သွယ်ဆောင်ရွက်နေတယ်လို့သိရပါတယ်။
"အခုက စခန်းမှာဖမ်းထားပါတယ်။ ဖွင့်ထားတဲ့ပုဒ်မကအာမခံမရပါဘူး။ ကျူးလွန်တဲ့အထဲမှာ ၁၈ နှစ် မပြည့်သေးတဲ့လူငယ်တွေပါလို့ သူတို့ကို လူငယ်သင်တန်းကျောင်းမှာထိန်းသိမ်းခွင့်တောင်းရမှာပါ" လို့ ချမ်းမြသာစည်မြို့နယ် အမှတ် ၁၁ နယ်မြေရဲစခန်းမှ ရဲတပ်ကြပ်ကြီးတစ်ဦးက Duwun Media ကိုပြောပါတယ်။