မန္တလေးမှာ ကိုဗစ်အတည်ပြုလူနာတွေ တစ်နေ့ထက်တစ်နေ့တွေ့ရှိမှုနှုန်းမြင့်တက်လာတာကြောင့် အတည်ပြုလူနာတွေကိုထားရှိကုသပေးမယ့်ဆေးရုံတစ်ခု ဒီကနေ့မနက်ပိုင်းမှာ ထပ်တိုးချဲ့လိုက်ရပါတယ်။
အရင်ကပုံမှန်အသုံးပြုနေတဲ့ လူနာ ၅၀ လောက်သာဆံ့တဲ့ ၆၂ လမ်းပေါ်က ကန်တော်နဒီဆေးရုံက အခုအခါမှာ ဆေးရုံပြည့်သွားပြီဖြစ်တာကြောင့်လည်း အဲဒီဆေးရုံနဲ့မလှမ်းမကမ်းမှာရှိတဲ့ ကုတင် ၃၀၀ ဆံ့သင်ကြားရေးဆေးရုံကို အတည်ပြုလူနာတွေထားရှိကုသပေးသွားဖို့ပြင်ဆင်တိုးချဲ့လိုက်တာဖြစ် တယ်လို့သိရပါတယ်။
လက်ရှိမှာတော့ ကန်တော်နဒီဆေးရုံမှာ အတည်ပြုလူနာ ၅၄ ဦးရှိနေပြီး ဒါဟာ ဆေးရုံရဲ့ဝင်ဆံ့ဦးရေပြည့်ပြီဖြစ်တာကြောင့် ကုတင် ၃၀၀ ဆံ့ဆေးရုံကို အသင့်ပြင်ထားတာဖြစ်တယ်လို့ မန္တလေးတိုင်းဒေသကြီးအစိုးရအဖွဲ့ဝင် လျှပ်စစ် စွမ်းအင်နှင့်ဆောက်လုပ်ရေးဝန်ကြီးဦးဇာနည်အောင်ကပြောပါတယ်။
သြဂုတ်လ ၁၆ ရက်နေ့ကနေပြန်စခဲ့ တဲ့ ပြည်တွင်းကိုရိုနာဗိုင်းရပ်စ်တကျော့ပြန်ကူးစက်ဖြစ်ပွားမှုကြောင့် မန္တလေးတိုင်းဒေသကြီးအတွင်းမှာ ဒီကနေ့မနက် ၈ နာရီအထိ အတည်ပြုလူနာ ၁၁၄ ဦးအထိရှိနေပြီး ဒါဟာ ရောဂါဖြစ်ပွားမှုတတိယအများဆုံးတိုင်းဒေသကြီးနေရာမှာရှိနေတာလည်းဖြစ်ပါတယ်။ နိုင်ငံအတွင်း ပိုးတွေ့ရှိမှု လူနာအရေအတွက် များပြားလာတဲ့ အတွက် အတည်ပြုလူနာတွေကို ထားရှိကုသဆောင်ရွက်ပေးဖို့ ဆေးရုံအခက်အခဲတွေရှိလာကြပါတယ်။
ရန်ကုန်မှာလည်း လက်ရှိကိုဗစ်အတည်ပြုလူနာတွေကို ကုသပေးနေတဲ့ ဆေးရုံတွေမှာ လူနာတွေပြည့်တော့မှာ ဖြစ်လို့ ယာယီဆေးရုံအဖြစ်တည်ဆောက်မှုတွေရှိနေသလို ကွာရန်တင်းစင်တင်တွေကိုလည်း ဆေးရုံအဖြစ် ပြင်ဆင်ဆောင်ရွက်မှုတွေရှိလာပါတယ်။ ကျန်းမာရေးနှင့် အားကစားဝန်ကြီးဌာနရဲ့ စက်တင်ဘာလ(၁၆)ရက်နေ့ မနက်ပိုင်းထုတ်ပြန်ချက်အထိ တစ်နိုင်ငံလုံး ကိုဗစ်အတည်ပြုလူနာ (၃၆၃၆)ဦးရှိပြီး ပြန်လည်ကောင်းမွန်သူ (၈၃၂)ဦးရှိကာ သေဆုံးသူ(၃၅)ဦးရှိပါတယ်။