Ei Ei Htun

ကျန်ရှိနေတဲ့ ကျောင်းသူ(၃)ယောက်ကို တာဝန်ရှိသူတွေက ဆက်လက်ရှာဖွေနေပြီး စက်လှေသမားကိုတော့ ပေါ့ဆစွာမောင်းနှင်မှုနဲ့ အမှုဖွင့်အရေးယူထားတယ်လို့ မင်းတုန်းမြို့မရဲစခန်းမှ တာဝန်ရှိသူတစ်ဦးက ပြောပါတယ်။

photo - ပေါက်ပေါက်

မကွေးတိုင်းဒေသကြီး မင်းတုန်းချောင်းအတွင်း ဇူလိုင်လ(၁၂)ရက်နေ့က ကျောင်းသား၊ကျောင်းသူတွေလိုက်ပါစီးနင်းလာတဲ့ စက်လှေတစ်စီးတိမ်းမှောက်မှုမှာ ပျောက်ဆုံးနေတဲ့ ကျောင်းသူလေးဦးထဲက တစ်ဦးရဲ့အလောင်းကိုပြန်တွေ့ပြီလို့ မင်းတုန်းမြို့မရဲစခန်းကနေ သိရပါတယ်။

“ ပေါက်ကိုင်းကျေးရွာ ကနေ အထက(၃)မင်းတုန်းကျောင်းကို ကျောင်းသွားတက်တဲ့ ကျောင်းသားတွေ ကျောင်းကအပြန်မှာဖြစ်တာ။ စက်လှေက ရေလယ်ခေါင်မရောက်ခင် ကျောက်ဆောင်အနီးမှာ ကျောက်ဆောင်ကိုရှောင်ကွေ့ပြီးမောင်းလိုက်တာ စက်လှေကစောင်းပြီး ရေတွေဝင်ပြီးတော့ မှောက်သွားတာ။ စက်လှေပေါ်မှာ ကျောင်းသားကျောင်းသူတွေ အပါအဝင် အားလုံးလူ(၂၀)ပါတယ်။ စက်လှေမှောက်သွားတော့ လူတွေကရေစီးနဲ့မျောပါသွားပြီး ရေကူးတတ်တဲ့သူကကူး၊ မကူးတတ်တဲ့သူကရေစီးနဲ့ပါသွားတာ။ကျန်တဲ့သူအားလုံးအသက်ရှင်တယ်။ ကျောင်းသူ(၄) ယောက်ပျောက်နေတဲ့ထဲက ဒီနေ့ မနက် (၁၀)နာရီလောက်က တစ်ယောက်ကိုအသေပြန်တွေ့တယ်။ ကျန်တဲ့(၃) ယောက်ကို ခုထိရှာဖွေနေတုန်းပဲရှိသေးတယ် “ လို့ မင်းတုန်းမြို့မရဲစခန်းမှတာဝန်ရှိသူတစ်ဦးက Duwun ကိုပြောပါတယ်။

"မိုးတွင်းဆိုတော့ချောင်းကရေစီးသန်တယ်၊ပျောက်နေဆုံးတဲ့ ကျောင်းသူ(၄)ဦးက (၇)တန်းကျောင်းသူနှစ်ဦး၊ (၉)တန်းကျောင်းသူနှစ်ဦးထဲကနေ တစ်ဦးရဲ့အလောင်းကို ကင်မွန်းတိုင်ကျေးရွာနားမှာ ပြန်တွေ့တာဖြစ်တယ်" လို့ အဆိုပါ တာဝန်ရှိသူက ဆက်လက်ပြောပါတယ်။ အခုလည်း ကျန်ရှိနေတဲ့ ကျောင်းသူ(၃) ယောက်ကို တာဝန်ရှိသူတွေအနေနဲ့ ဆက်လက်ရှာဖွေနေတယ်လို့ပြောပါတယ်။ စက်လှေသမားကိုတော့ ပေါ့ဆစွာမောင်းနှင်မှု ပုဒ်မ(၂၈၀)နဲ့ အမှုဖွင့်အရေးယူထားတယ်လို့ သိရပါတယ်။


ဆက်စပ်အကြောင်းအရာများ


Duwun ဒီဂျစ်တယ် နေ့စဉ်သတင်းစာ

သင့် အီးလ်မေး ကနေ နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ ဒီနေရာမှာ စာရင်းသွင်းလိုက်ပါ။


Copyright © 2019 Duwun.

Privacy Policy | About Us | Jobs

က္က