သင်္ဃန်းကျွန်းမြို့နယ်က Music Zone ကာရာအိုကေနဲ့ စားသောက်ဆိုင်ကို ယခုရက်ပိုင်းအတွင်းမှာတရားစွဲဆိုသွားဖို့ ရှိတယ်လို့ သင်္ဃန်းကျွန်းမြို့နယ် တိုင်းလွှတ်တော်ကိုယ်စားလှယ်တစ်ဦးက ပြောပါတယ်။
Music Zone ကိုတရားစွဲဖို့ သင်္ဃန်းကျွန်းမြို့နယ်ကိုဗစ်ကော်မတီအစည်းအဝေးကဆုံးဖြတ်လိုက်တာဖြစ်ပြီး ဇဝနရပ်ကွက် အုပ်ချုပ်ရေးမှူးကနေတရားလိုပြုလုပ်တိုင်ကြားသွားမှာဖြစ်တယ်လို့ သိရပါတယ်။ "ပြဌာန်းထားတဲ့ ကိုဗစ်သတ်မှတ်ချက်တွေကိုဖောက်ဖျက်ကျူးလွန်တယ်၊ဒီနေရာမှာ လူပေါင်း ၁၁၉ ဦးရှိနေတယ်။စားပွဲအလုံး ၃၀ လောက်ရှိတဲ့စားသောက်ဆိုင်တွေဖွင့်ခွင့်ပိတ်ထားတာကိုလူပေါင်း ၁၁၉ ဦးရှိနေတယ်။အဲ့ထဲမှ Positive တွေ့တဲ့လူအများကြီးဖြစ်သွားတယ်။ဒါကြောင့် သဘာဝဘေးအန္တရာယ်စီမံခန့်ခွဲမှုဥပဒေအရရောအရေးယူမှာဖြစ်ပါတယ်။အချက်အလက်တွေ ရယူပြီး ရက်ပိုင်းအတွင်းမှာပဲ တရားလိုဖြစ်သူနဲ့ရဲမှူးကဆက်လက်ဆောင်ရွက်ပါလိမ့်မယ်။"လို့ သင်္ဃန်းကျွန်းမြို့နယ် တိုင်းလွှတ်တော်ကိုယ်စားလှယ် ဦးမောင်မောင်ဦးက ပြောပါတယ်။
Music Zone ဆိုင်ရဲ့လူစုလူဝေးကနေ ကိုဗစ်-၁၉ ရောဂါကူးစက်ပြန့်ပွားမှုဟာ လူပေါင်း ၉၂ ဦးအထိရှိနေပြီး သင်္ဃန်းကျွန်းမြို့နယ်အတွင်းမှာ ကူးစက်ခံရမှုအများဆုံးနေရာလည်းဖြစ်ပါတယ်။ဒါ့အပြင် ကိုဗစ်ကာလအတွင်း Music Zone ကိုလာရောက်ခဲ့တဲ့ သူတွေကိုလည်း CCTV မှတ်တမ်းနဲ့ ရှာဖွေနေတယ်လို့သိရပြီးလတ်တလောမှာတော့ ဆိုင်ကို Lock Down လုပ်ထားပါတယ်။
လက်ရှိရန်ကုန်တိုင်းမှာ ပိုးတွေ့လူနာအများဆုံးရှိနေတဲ့ မြို့နယ်က သင်္ဃန်းကျွန်းမြို့နယ်ဖြစ်နေပြီး လူနာ ၂၀၀ ကျော်အထိ ရှိနေတယ်လို့ ထုတ်ပြန်ချက်တွေအရသိရပါတယ်။
(အလွတ်တန်းသတင်းထောက် ချစ်ခွန်းချိုပေးပို့သော သတင်းဖြစ်ပါသည်)