ကယားပြည်နယ် လွိုင်ကော်မြို့က လွိုင်ကော်တက္ကသိုလ်မှာ ကွာရန်တင်းဝင်နေသူ အမျိုးသားတစ်ဦး ထွက်ပြေးသွားတာကြောင့် ကျန်းမာရေးဝန်ထမ်း သူနာပြုဆရာမတစ်ဦးနဲ့ ရဲတပ်ဖွဲ့က လိုက်လံတားမြစ်ရာ ခိုက်ရန်ပြုခံခဲ့ရပြီး ကွာရန်တင်းစင်တာကနေ ထွက်ပြေးဖို့ ကြိုးစားသူကို အလုပ်နဲ့ ထောင်ဒဏ် တစ်နှစ်ခွဲ ချမှတ်လိုက်တယ်လို့ သိရပါတယ်။

“ သူ့ပုံစံကြည့်ရတာ အရက်ကြောင် ကြောင်နေတဲ့ပုံစံမျိုး ဖြစ်နေတယ်။ သိပ်မူမမှန်ဘူးပေါ့နော်။ သူ့အမေနဲ့ တူတူ ကွာရန်တင်းဝင်တော့ ကျွန်တော်တို့က သူ့အမေကို ထိန်းဖို့ မှာထားတယ်။ အဲဒီနေ့မှာ သူက ကျွန်တော် မနေနိုင်တော့ဘူးဆိုပြီးတော့ ပြေးဖို့ လုပ်တာ။ရဲတွေနဲ့လည်း သူတစ်ပြန်ကိုယ်တစ်ပြန်ဖြစ်ကြတာပေါ့။ သူက အခြေအနေတော်တော်ဆိုးနေတော့ စခန်းကို လှမ်းအကြောင်းကြားလိုက်ရတာပါ” လို့ ဦးရန်နိုင်ဝင်းက ပြောပါတယ်။

ဓာတ်ပုံ-ကယားပြည်နယ်အစိုးရအဖွဲ့ရုံး (မြို့အဝင်အထွက်မှာ စစ်ဆေးမှုတွေ လုပ်နေစဉ်)

လက်ရှိ အဆိုပါ အမျိုးသားကို ကွာရန်တင်းစင်တာက ထွက်ပြေးရန် ကြံစည်မှုဖြင့် သဘာဝဘေးအန္တရာယ်ဆိုင်ရာ စီမံခန့်ခွဲရေး ဥပဒေပုဒ်မ ၂၆/၂၉ အရ လွိုင်ကော်မြို့နယ်တရားရုံးသို့ တရားစွဲဆိုတင်ပို့ခဲ့ပြီး စက်တင်ဘာ (၂၉) ရက်မှာ သဘာဝဘေးအန္တရာယ်ဆိုင်ရာ စီမံခန့်ခွဲရေး ဥပဒေပုဒ်မ ၂၆ အရ အလုပ်နှင့် ထောင်ဒဏ်(၁)နှစ်၊ သဘာဝဘေးအန္တရာယ်ဆိုင်ရာ စီမံခန့်ခွဲရေး ဥပဒေပုဒ်မ ၂၉ အရ အလုပ်နှင့် ထောင်ဒဏ်(၆)လ စုစုပေါင်း အလုပ်နှင့်ထောင်ဒဏ် (၁)နှစ်နှင့်(၆)လ ချမှတ်ခဲ့တယ်လို့လည်း သိရပါတယ်။