ကိုဗစ်-၁၉ ရောဂါကာကွယ်ထိန်းချုပ်ရေးနဲ့ ပတ်သက်ပြီး အဆင့် (A) ရအောင် ပြင်ဆင်ထားတဲ့ (CMP) စက်ရုံ၊ အလုပ်ရုံတွေ၊ အသေးစား၊ အလတ်စားလုပ်ငန်းတွေကို အောက်တိုဘာ (၁၂) ရက်နေ့ကစပြီး ပြန်လည်လုပ်ကိုင်နိုင်ပြီလို့ ကျန်းမာရေးနှင့်အားကစားဝန်ကြီးဌာနက ကြေညာလိုက်ပါတယ်။

“ မနေ့က စာထွက်တာ အွန်လိုင်းမှာ တွေ့တယ်။ ဒါပေမယ့် ဝန်ကြီးလက်မှတ်မပါဘူး။ ထုတ်ပြန်တာက မှန်လား မှားလား မသိနိုင်ဘူးပေါ့နော်။ ကျွန်မတို့ဆီကိုတော့ တိုက်ရိုက်ညွန်ကြားလာတာမျိုးမရှိသေးဘူး။ ဒါပေမယ့် မနက်ဖန် ဖွင့်ခွင့်ရမှာကို ဒီနေ့မှ ကြေညာတာကတော့ ကျွန်မတို့ အတွက် ပြင်ဆင်ချိန် မရဘူး။ ဖွင့်ခွင့်ရမယ်ဆိုတော့ တနင်္လာနေ့ (အောက်တိုဘာ ၁၂) ရက်နေ့ ချက်ချင်းဖွင့်နိုင်သေးမှာမဟုတ်ဘူးပေါ့။ ရောဂါကာကွယ်ရေးနဲ့ပတ်သက်ပြီး အစကတည်းက စက်ရုံ၊အလုပ်ရုံတွေက ပြင်ဆင်ပြီးသားပါ။ ဒါပေမယ့် အသေးစိတ် ပြန်လုပ်ဖို့ကတော့ ရှိနိုင်တာပေါ့” လို့ ရွှေပြည်သာစက်မှုဇုန်မှ အထည်ချုပ်လုပ်ငန်းရှင်တစ်ဦးဖြစ်သူ မနှင်းသက်မွန်က Duwun ကိုပြောပါတယ်။

ကိုဗစ်-၁၉ ရောဂါကူးစက်ပျံ့နှံ့မှု မြင့်မားနေတဲ့ ရန်ကုန်တိုင်းကို စက်တင်ဘာ (၂၀) ရက်က စပြီး နေအိမ်မှာနေထိုင်ဖို့ အမိန့်ထုတ်ပြန်ရာမှာ ကုန်ကြမ်းယူ၊ ကုန်ချောပေးဆောင်ရွက်တဲ့ လက်ခစားလုပ်ငန်း (CMP) စက်ရုံ၊အလုပ်ရုံ တာဝန်ထမ်းဆောင်မယ့်သူတွေကို အောက်တိုဘာ (၂၁) ရက်အထိ လုပ်ငန်းခွင်မသွားဖို့ ထုတ်ပြန်ထားပြီးသားဖြစ်ပါတယ်။