ကိုဗစ်ကပ်ရောဂါဖြစ်ပွားနေတာကြောင့် အနည်းဆုံးလုပ်ခလစာ နူန်းထားသစ်ကို သတ်မှတ်ရမယ့်ကာ လထက်နောက်ကျနေပြီး နောက်နှစ် ၂၀၂၁ ခုနှစ်ရောက်မှသာ သတ်မှတ်နိုင်လိမ့်မယ်လို့ အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီကနေ သိရပါတယ်။

"ကိုဗစ်-၁၉ ကြောင့် စီးပွားရေးတွေလည်း အတော်လေးလှုပ်ခတ်သွားတယ်။ အဲ့တော့အနည်းဆုံးလုပ်လစာ သတ်မှတ်မယ့်ကာလာလည်း နောက်ကျမယ့်ရာခိုင်နူန်းကများနေပြီ။ ဘာကြောင့်လဲဆိုရင် အခုဆို သတ်မှတ်ရမယ့်ကာလကို အခုဆိုရင် ကျော်လာခဲ့ပြီ။ အစိုးရဘက်ကလည်းဘာမှမပြောဘူး၊ သေချာပါတယ်ဒီထက်ပိုပြီးနောက်ကျဖို့ပဲရှိတယ်။"လို့ အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီဝင်ကို သက်နှင်းအောင်ကပြောပါတယ်။

အခုလို လုပ်ခလစာနူန်းထားသစ်မသတ်မှတ်နိုင်ခြင်းက အလုပ်သမားတွေအတွက် နစ်နာမှုရှိတာကြောင့်  အစိုးရအနေနဲ့ ပွင့်လင်းမြင်သာစွာ အသိပေးထုတ်ပြန်ပေးဖို့ လိုအပ်နေတယ်လို့ ဆိုပါတယ် ။

ယခုတကြိမ် သတ်မှတ်မယ့် လုပ်ခလစာနူန်းထားသစ်ကို တစ်ရက် ၉၈၀၀ ရရှိဖို့ အလုပ်သမားတွေက တောင်းဆိုထားကြပါတယ်။

"အခုရနေတဲ့ တနေ့ ၄၈၀၀ က ကျမတို့အတွက်အဆင်မပြေပါဘူး။ ဒါကြောင့်ခုတခါသတ်မှတ်မယ့် လုပ်ခလစာကို ၉၈၀၀ သတ်မှတ်ပေးဖို့တောင်းဆိုထားကြတာဖြစ်တယ်။ ရင်လောက်တောင်းမှ ခါးလောက်ရတာပါ။ "လို့ လိူင်သာယာမြို့နယ်မှ စက်ရုံအလုပ်သမား တစ်ဦးကလည်း ပြောပါတယ်။

လက်ရှိမှာ အလုပ်သမားတစ်ဦးကို တစ်နာရီ (၆၀၀) နှုန်းနဲ့ (၈) နာရီအလုပ်ချိန်အတွက် (၄၈၀၀) ကျပ် သတ်မှတ်ပေးဆောင်နေတာကြောင့် ပျက်ရက်မရှိတဲ့အလုပ်သမားတစ်ဦးဟာ တစ်လကိုအနည်းဆုံး ၁၄,၄၀၀၀ ကျပ်ရရှိပြိး ၊ အချိန်ပိုလုပ်ကိုင်ရသူ ၊ လုပ်ငန်းကျွမ်းကျင်သည့်အလုပ်သမားတွေကတော့ တစ်လလုပ်ခလစာ (၂) သိန်းအထက်ရရှိတယ်လို့ သိရပါတယ်။

အလွတ်တန်းသတင်းထောက် ချစ်ခွန်းချိုပေးပို့သောသတင်းဖြစ်ပါသည်။