မကွေးတိုင်း ၂၅မြို့နယ်မှာ (၂၁) မြို့နယ်တွင် Covid 19 ရောဂါပိုးတွေ့ရှိလာပြီဖြစ်တဲ့အတွက် တိုင်းအတွင်းရှိဆေးရုံများတွင် အောက်ဆီဂျင်ပိုက်လိုင်းသွယ်တန်းမှုများ ပြင်ဆင်ဆောင်ရွက်နေပြီလို့ မကွေးတိုင်းပြည်သူ့ကျန်းမာရေးနှင့်ကုသရေးဦးစီးဌာနကနေ သိရပါတယ်။
မကွေးတိုင်းဒေသကြီးအတွင်း အောက်တိုဘာလ ၉ ရက်မှာ ပိုးတွေ့ လူနာ(၆၀)ဦး ၊ အောက်တိုဘာ ၁၅ရက်နေ့တွင် (၅၉)ဦး စံချိန်တင်တွေခဲ့ပြီး ယခုအခါမှာ ပိုးတွေ့လူနာ ၃၀၀ ကျော်ရှိလာခဲ့ပြီးတဲ့နောက် အခုလို စီစဥ်နေခြင်းလည်း ဖြစ်ပါတယ်။
"အခုလို ပိုးတွေ့လူနာတွေ များလာတဲ့အတွက် တိုင်းအတွင်းက မြို့နယ်တွေမှာ လူနာ ၅ ဦးကနေ ၁၀ ဦးလောက်ထိ သုံးနိုင်တဲ့ အောက်ဆီဂျင်ပိုက်လိုင်း သွယ်တန်းမှုတွေ လုပ်ဆောင်နေတာပါ" လို့ မကွေးတိုင်း ပြည်သူ့ကျန်းမာရေးဦးစီးဌာန၊ လက်ထောက်ညွှန်ကြားရေးမှူး ဒေါက်တာခင်မောင်သန်းက ပြောပါတယ်။
ဓာတ်ပုံ - မကွေးပို့စ် (တောင်တွင်းကြီးမြို့နယ် ပြည်သူ့ဆေးရုံတွင် အောက်စီဂျင်တပ်ဆင်နိုင်ရန် ပြင်ဆင်နေမှု မြင်ကွင်း)
မကွေးတိုင်းဆေးရုံကြီးမှာ လူနာအယောက် (၂၀) စာ High Dependency Unit' HDU တစ်ခန်း ဖြစ်မြောက်ရေးအတွက် အောက်ဆီဂျင်ပိုက်လိုင်း သွယ်တန်းနိုင်ဖို့ ကျပ်သိန်း(၁၀၀)ကျော်ကုန်ကျနိင်ပြီး အလှူရှင်များက ကျပ်သိန်း(၄၀) မတည်လှူဒါန်းထားတယ်လို့ အလှူငွေများ ကူညီလက်ခံစုဆောင်းပေးနေသူ ဒေါ်စန္ဒာဆွေထံကနေ သိရပါတယ်။
မကွေးတိုင်းမှာ ဓာတ်ခွဲစစ်ဆေးသူပေါင်း (၁၇,၂၄၄) ဦး ရှိခဲ့ပြီး အမြန် RDT ဖြင့် စစ်ဆေးပေးသူ ၉၀၀၀ ကျော်ရှိကာ ၊ NHLသို့ ထပ်မံဓါတ်ခွဲနမူနာ ၁၀၀၀ ကျော် ထပ်ပို့ရန်ရှိကြောင်း အောက်တိုဘာလ ၂၀ ရက်နေ့က မကွေးတိုင်း ပြည်သူ့ကျန်းမာရေးနှင့်ကုသရေးဦးစီးဌာန တိုင်းဦးစီးမှူးဒေါက်တာသောင်းလှိုင်ထံမှ သိရသည်။
မကွေးတိုင်းဒေသကြီးတွင် Covid 19ရောဂါပိုး လူနာစတွေ့ခဲ့သည့်ဧပြီလ၁၃ ရက်နေ့မှ ယနေ့အောက်တိုဘာ(၂၀)ရက်နေ့ နံနက်ပိုင်းအထိရောဂါပိုးတွေ့ရှိသူ စုစုပေါင်း ၃၅၁ဦး ၊ တက်ရောက်ကုသဆဲ အတည်ပြုလူနာ (၁၄၈)ဦးရှိနေပြီး (၂၀၃)ဦး ဆေးရုံမှ ဆင်းခွင့်ရရှိပြီဟု မကွေးတိုင်းပြည်သူ့ကျန်းမာရေးနှင့်ကုသရေးဦးစီးဌာနမှသိရပါတယ်။
Magway Post မှ ပေးပို့ထားသော သတင်းဖြစ်ပါသည်။