ကိုဗစ်-၁၉ ရောဂါကုသရာမှာ အသုံးပြုနေတဲ့ Remdesivir ဆေးက အထောက်အကူပြုဆေးတစ်ခုအနေနဲ့သာ အသုံးဝင်တာဖြစ်ပြီး ရောဂါအဆင့်တိုင်းမှာတော့ အသုံးမတည့်ဘူးလို့ တောင်ဥက္ကလာပဆေးရုံမှာ ကုသမှု အပိုင်း တာဝန်ယူဆောင်ရွက်ပေးနေတဲ့ ပါမောက္ခဒေါက်တာမိုးမိုးစန်းက ပြောလိုက်ပါတယ်။

“ အထောက်အကူဆေးတစ်ခုအနေနဲ့သာ အသုံးဝင်တယ်။ ရောဂါအဆင့်တိုင်းမှာ အသုံးမတည့်ပါဘူး။ ဥပမာ ရောဂါသိပ်မပြင်းထန်တဲ့လူတွေမှာ ပေးဖို့မလိုဘူး။ သိပ်ဆိုးတဲ့လူတွေမှာလည်း အကျိုးမရှိဘူး။ အချိန်တိုင်းအတွက်လည်း အသုံးမတည့်ဘူး။ နောက်ကျမှရောက်လာတယ်။ ဆယ်ရက်ကျော်တယ်။ နှစ်ပတ်ကျော်တဲ့လူတွေမှာ သုံးလို့လည်း အကျိုးမရှိပါဘူးး။ ရောဂါလုံးဝပျောက်ကင်းစေတဲ့ကုထုံးတွေ မပေါ်သေးတဲ့ ရောဂါအသစ်တွေမှာ အထောက်အကူပြုစေတဲ့ဆေးတွေကို သူ့နေရာနဲ့ သူ သူ့အချိန်နဲ့သူသုံးပြီးတော့ အကျိုးရှိအောင်လုပ်ရပါတယ်။” လို့ ပါမောက္ခဒေါက်တာမိုးမိုးစန်းက ပြောခဲ့ပါတယ်။

မြန်မာနိုင်ငံမှာ Remdesivir ဆေးကိုစက်တင်ဘာ (၂၄) ရက်ကစတင်အသုံးပြုခဲ့ပြီး တောင်ဥက္ကလာပဆေးရုံမှာ လူနာ (၄၅) ဦးခန့်ကို အသုံးပြုကြည့်ခဲ့ရာ (၄၀) ဦးက ရောဂါသက်သာ ပျောက်ကင်းသွားပြီး (၂) ဦးမှာတော့ ဆုံးပါးသွားခဲ့တယ်လို့ သိရပါတယ်။

“ ၄၀ ဦးကသက်သာပျောက်ကင်းပြီး တော်တော်များများက ဆေးရုံဆင်းလို့ရနေပြီ။ ဆုံးပါးသူ (၂) ဦးမှာ တစ်ဦးက အသက်ရှုစက်ပေါ်မှာ ရှိနေတယ်။ တော်တော် နောက်ကျမှပေးရတယ်။ နောက်တစ်ဦးကတော့ ကျောက်ကပ်မကောင်းတဲ့အတွက်ဆုံးပါးသွားတာပါ” လို့ ဒေါက်တာမိုးမိုးစန်းက ပြောပြပါတယ်။

Remdesivir ဆေးဝါးအကျိုးသက်ရောက်မှုကို WHOနဲ့ အမေရိကန်ပြည်ထောင်စု ကူးစက်ရောဂါ အမျိုးသားအင်စတီကျုဒ်ရဲ့ လေ့လာချက်နှစ်ခုမှာ တူညီမှုမရှိတာကို တွေ့ရတယ်လို့ မေးမြန်းမှုကို ဒေါက်တာမိုးမိုးစန်းက ပြန်လည်ဖြေကြားခဲ့တာဖြစ်ပါတယ်။