ဖြေလျော့ပေးထားတဲ့ ကိစ္စရပ်တွေကလွဲလို့ ကိုဗစ်စည်းကမ်းသတ်မှတ်ချက်များကို နိုဝင်ဘာလကုန်ထိ ထပ်မံတိုးမြှင့်လိုက်ကြောင်း ကိုဗစ် ၁၉ ကာကွယ်၊ထိန်းချုပ်၊ကုသရေး အမျိုးသားအဆင့်ကော်မတီက ထုတ်ပြန်ကြေညာခဲ့ပါတယ်။

နောက်ထပ် တစ်လ ထပ်မံတိုးမြှင့်တဲ့ညွှန်ကြားချက်တွေထဲမှာ ညမထွက်ရအမိန့် ၊ စားသောက်ဆိုင်များပါဆယ်စနစ်သာရောင်းချရေး၊ ကေတီဗီနဲ့ နိုက်ကလပ်များဆက်လက်ပိတ်ထားရန်၊ ဘုရားစေတီများပိတ်ထားရန်နဲ့ ပြည်တွင်းပြည်ပ လေကြောင်းလမ်းများပျံသန်းခွင့် ရပ်နားထားရေး ကိစ္စရပ်များပါဝင်ပါတယ်။

ကျန်းမာရေးတာဝန်ရှိသူတွေအနေနဲ့ ပြည်တွင်းကူးစက်လူနာတွေ ယခင်ကထက်လျော့နည်းသွားပြီလို့ သုံးသပ်ထားပေမယ့်လည်း နေ့စဉ်ကူးစက်လူနာအရေအတွက်က ထောင်ဂဏန်းနီးပါး (သို့မဟုတ်) တစ်ထောင်ကျော်မှာရှိနေဆဲဖြစ်ပါတယ်။

နိုင်ငံတော် အတိုင်ပင်ခံဒေါ်အောင်ဆန်းစုကြည်ကိုယ်တိုက် သီတင်းကျွတ်မှာ လူစုလူဝေးမလုပ်ကြဖို့ကို မေတ္တာရပ်ခံပြောကြားထားတာဖြစ်ပါတယ်။

လက်ရှိနိုင်ငံတွင်း ကိုဗစ်ကူးစက်မှုက ထိန်းချုပ်နိုင်တဲ့အဆင့်သာရှိသေးပြီး လုံးဝထိန်းချုပ်နိုင်ဖို့အတွက်ကတော့ အများကြီးလုပ်ဆောင်ရမှာဦးမှာဖြစ်တယ်လို့သိရပါတယ်။

အောက်တိုဘာလ (၂၈)ရက်နေ့ ည ၈နာရီထုတ်ပြန်ချက်အထိ တစ်နိုင်ငံလုံးကိုဗစ်လူနာ (၄၉၀၇၂)ဦးမှာ ပြန်လည်ပျောက်ကင်းသူ (၂၈၆၃၆)ဦးနဲ့ သေဆုံးသူ (၁၁၇၂)ဦးရှိပါတယ်။