ကိုဗစ်ကူးစက်မှုကြောင့် ပိတ်ထားရတဲ့ အခြေခံပညာကျောင်းတွေကို ယခုနှစ်မှာ ပြန်လည်ဖွင့်ဖို့ မဖြစ်နိုင်လောက်တော့ဘူးလို့ အခြေခံပညာဦးစီးဌာနမှ သိရပါတယ်။

“လက်ရှိအနေအထားထိကတော့ ကျောင်းတွေပြန်ဖွင့်ဖို့က ဘယ်လိုမှမဖြစ်နိုင်ပါဘူး။ စာသင်နှစ်တစ်နှစ်တောင်ကုန်ဆုံးတော့မယ်ဆိုတော့ ဒီချိန်ထိတောင်မဖွင့်နိုင်ရင် ဖွင့်နိုင်မှာမဟုတ်တော့ဘူး။ ရောဂါကူးစက်မှုတွေလည်း ထိန်းချုပ်နိုင်သေးတာမဟုတ်တော့ ကျောင်းတွေပြန်ဖွင့်ဖို့က တော်တော်စဉ်းစားရပါတယ်။ ပြန်ဖွင့်ရင်တောင် ပထမတစ်ခါတုန်းကလို ကိုဗစ်စည်းမျဉ်းတွေနဲ့အညီလုပ်ဆောင်ဖို့အချိန်ယူတာနဲ့ဘာနဲ့ဆို စာသင်နှစ်မှီနိုင်ပါ့မလားပေါ့နော်။ ပြန်ဖွင့်မယ်မဖွင့်ဘူးဆိုတာကတော့ ကိုဗစ်ကော်မတီရဲ့ ညွှန်ကြားချက်အတိုင်းပဲ လုပ်မှာပါ”လို့ ဒေါက်တာတင်မောင်ဝင်းက ပြောပါတယ်။

၂၀၂၀-၂၀၂၁ပညာသင်နှစ်မှာ မူလတန်းနဲ့ အလယ်တန်းကျောင်းသားတွေအနေနဲ့ တစ်နှစ်ပတ်လုံး သင်ယူတက်မြောက်ခွင့်မရှိခဲ့သေးပါဘူး။

ယခုပညာနှစ်မှာတော့ ပညာသင်ကြားခွင့်က အချိန် (၃)လသာ ကျန်ရှိတော့တာပါ။ လက်ရှိအချိန်ထိတော့ အခြေခံပညာကျောင်းတွေပြန်ဖွင့်ဖို့က မဖြစ်နိုင်သေးတဲ့အနေအထားဖြစ်လို့ ကိုဗစ်ကြောင့် ကျောင်းသား၊ကျောင်းသူတွေအနေနဲ့ ပညာသင်နှစ်တစ်နှစ်အောက်ရမယ့် အနေအထားမှာရှိနေတာဖြစ်ပါတယ်။