နိုဝင်ဘာလလ (၈)ရက်နေ့၊ ရွေးကောက်ပွဲနေ့မှာ တာဝန်ထမ်းဆောင်ခဲ့တဲ့ ရန်ကုန်တိုင်းဒေသကြီးက ရွေးကောက်ပွဲကော်မရှင်အဖွဲ့ခွဲ ဥက္ကဌအပါအဝင်၊ အဖွဲ့ဝင်တွေနဲ့ မိသားစုဝင်စုစုပေါင်း (၈၃) ဦး ကိုဗစ်ကူးစက်ခံထားရတယ်လို့ ရန်ကုန်တိုင်းဒေသကြီးရွေးကောက်ပွဲ ကော်မရှင်အဖွဲ့ခွဲက သိရပါတယ်။

" ဟုတ်ပါတယ်။ အားလုံးကတော့ အခုကုသရေးစင်တာတွေမှာ ကျန်းမာရေး ကောင်းမွန်ကြပါတယ်။ တာဝန်ထမ်းဆောင်တဲ့ဝန်ထမ်းတွေပါကူးတော့ သူတို့မိသားစုဝင်တွေပါ ပါပြီပေါ့။ ရွေးကောက်ပွဲပြီးတော့ အဲဒီနေ့မှာတာဝန်ကျတဲ့သူတွေကို ကိုဗစ်ရှိ၊မရှိစစ်တယ်။ ပိုးတွေ့တဲ့သူတွေရဲ့ မိသားစုဝင်တွေပါ စစ်တယ်။ အခုဆို အားလုံးပေါင်း (၈၃)ဦးထိ ကူးစက်ခံထားရတာပါ”လို့ ရန်ကုန်တိုင်းဒေသကြီးရွေးကောက်ပွဲကော်မရှင်အဖွဲ့ခွဲမှ အတွင်းရေးမှူး ဦးတင်မောင်အေးက Duwunကို ပြောပါတယ်။

ကူးစက်ခံရတဲ့သူတွေအနေနဲ့ ဘယ်ကနေစတင်ကူးစက်ခံရလည်းဆိုတာကို မသိရှိရဘဲ လက်ရှိမှာတော့ သက်ဆိုင်ရာ မြို့နယ်အလိုက် လူနာနဲ့ထိတွေ့မှုရှိခဲ့သူတွေကို စစ်ဆေးမှုတွေလုပ်နေတယ်လို့ သိရပါတယ်။

ကူးစက်ခံရတဲ့ မိသားစုဝင် (၁၂)ဦးမှာလည်း လက်ရှိအချိန်ထိဆေးကုသမှာခံယူနေတာပါ။ဆက်လက်ဆေးကုသမှု ခံယူနေရတဲ့ (၇၅)ဦးထဲမှာတော့ (၃)ဦးက အထူးကြပ်မတ်ဆောင်မှာ ကုသမှုခံယူနေရတယ်လို့ သိရပါတယ်။