ရန်ကုန်အဝင်ခရီးသည် (၈၀)ကျော်နဲ့ အထွက်ခရီးသည် (၇၀)ကျော် စီးနှင်းခဲ့တာပါ။
Ei Ei Htun

ပြည်တွင်းလေကြောင်းလိုင်းခရီးစဉ်တွေ စတင်ပြေးဆွဲတဲ့ ဒီဇင်ဘာလ (၁၆)ရက်နေ့မှာပဲ ခရီးသည် (၁၅၀)ခန့်စီးနင်းခဲ့တယ်လို့ သိရပါတယ်။

ရန်ကုန်လေဆိပ်ကနေ ထွက်ခွါတဲ့ ခရီးသည် (၇၀)ကျော်ရှိပြီး ဝင်ရောက်လာတဲ့ ခရီးသည်က (၈၀)ကျော်ရှိတယ်လို့ မင်္ဂလာဒုံမြို့နယ် လွှတ်တော်ကိုယ်စားလှယ် ဦးထွန်းထွန်းဝင်းက Duwun ကိုပြောပါတယ်။

“ လေဆိပ်တာဝန်ရှိသူကို လှမ်းမေးလိုက်တော့ မနေ့က တစ်ရက်တည်းတင် ခရီးသည် (၁၅၀)ခန့် လိုက်ပါစီးနင်းတယ်ပြောတယ်။ ဒီနေ့ ခရီးသည်ဦးရေတော့မသိသေးဘူးပေါ့နော်။ လေယာဉ်ခရီးစဉ်လိုက်ပါမယ့်သူတွေကတော့ ကျန်းမာရေးဌာနကထုတ်ပြန်ထားတဲ့အတိုင်း ကိုဗစ်ကင်းစင်ကြောင်းထောက်ခံစာပါမှဆိုတော့ ဒါကတော့မဖြစ်မနေ စစ်လာရမှာပေါ့။ လေဆိပ်တာဝန်ရှိသူတွေအနေနဲ့ကလည်း ဒါကိုကြပ်ကြပ်မတ်မတ်ဆောင်ရွက်နေတယ်”လို့ ဦးထွန်းထွန်းဝင်းက ပြောပါတယ်။

ပြည်တွင်းလေကြောင်းလိုင်းစတင်ပြေးဆွဲတဲ့ ပထမနေ့မှာတော့ ခရီးစဉ်လေးခုကို ပျံသန်းပြေးဆွဲခဲ့တာပါ။ ပျံသန်းခဲ့တဲ့ ခရီးစဉ်တွေကတော့ ရန်ကုန်-လွိုင်ကော်-ဟဲဟိုးခရီးစဉ် ၊ ရန်ကုန်-မြိတ်၊ ရန်ကုန်-တာချီလိတ်နဲ့ ရန်ကုန်-စစ်တွေခရီးစဉ် ဖြစ်ပါတယ်။ လေကြောင်းခရီးနဲ့ လိုက်ပါမယ့်သူတွေအနေနဲ့ ကိုဗစ်ကင်းစင်ကြောင်းထောက်ခံစာပါရှိမှ လိုက်ပါခွင့်ရမှာဖြစ်ပြီး ကိုယ်သွားရောက်မယ့်မြို့နယ်တွေအလိုက် ကွာရန်တင်းဝင်ရောက်ရမှာလည်းဖြစ်ပါတယ်။

ရန်ကုန်ကနေ လိုက်ပါမယ့်ခရီးသည်တွေကိုတော့ ကျောက်တံတားမြို့နယ်ရှိ Tourist Burma အဆောက်အအုံနဲ့ မင်္ဂလာဒုံအဝေးပြေးယာဉ်ရပ်နားစခန်းရှိ ကျန်းမာရေးဌာနတို့မှာ စစ်ဆေးမှုတွေပြုလုပ်ပေးနေတာပါ။ ဒီဇင်ဘာလ (၁၅)ရက်နေ့နဲ့ (၁၆)ရက်နေ့ နှစ်ရက်အတွင်း စစ်ဆေးမှုခံယူခဲ့တဲ့ လူဦးရေ (၃၀၀)ကျော်မှာ (၁၁)ဦးအထိ ပိုးတွေ့ရှိခဲ့ပါတယ်။




ဆက်စပ်အကြောင်းအရာများ


Author


က္က